ໃນປີ 2022 ຜ່ານມາ, ການນຳເຂົ້າຍານພາຫະນະຢູ່ ສປປ ລາວ ມີທັງໝົດ 80.780 ຄັນ. ໃນນີ້, ລົດໃຫຍ່ 21.887 ຄັນ ແລະ ລົດຈັກ 58.893 ຄັນ. ສ່ວນການນຳເຂົ້າລົດໄຟຟ້າ (EV) ມີ 1.408 ຄັນ. ສຳລັບ 4 ເດືອນຕົ້ນປີ 2023 ໄດ້ນຳເຂົ້າລົດໃຫຍ່ 6.884 ຄັນ, ລົດຈັກ 17. 796 ຄັນ ແລະ ລົດ EV ມີ 526 ຄັນ.
ຂໍ້ມູນດັ່ງກ່າວ ໄດ້ຮັບການລານງານຈາກ ທ່ານ ປະສາດໄຊ ພິລາພັນເດຊ ປະທານສະມາຄົມອຸດສາຫະກໍາຍານພາຫະນະລາວ ໃນກອງປະຊຸມປະຈຳປີ ຂອງສະມາຄົມດັ່ງກ່າວ ແລະ ທ່ານຍັງໃຫ້ຮູ້ອີກວ່າ: ສະມາຄົມອຸດສາຫະກໍາຍານພາຫະນະລາວ ແມ່ນອົງການຈັດຕັ້ງໜຶ່ງທີ່ເຕົ້າໂຮມ ບັນດາຫົວໜ່ວຍທຸລະກິດນໍາເຂົ້າພາຫະນະ, ທຸລະກິດ ກ່ຽວກັບຍານພາຫະນະທຸກຊະນິດ, ອາໄຫລ່ປ່ຽນຖ່າຍ ແລະ ອຸ ປະກອນການຜະລິດ ແລະ ຜະລິດສິນຄ້າອື່ນໆ ເພື່ອສົ່ງອອກ ແລະ ທົດແທນການນໍາເຂົ້າສິນຄ້າຈາກຕ່າງປະເທດ. ປັດຈຸບັນ, ສະມາຄົມ ອຸດສາຫະກໍາຍານພາຫະນະລາວ ມີສະມາຊິກ 34 ບໍລິສັດ ໃນນີ້, ບໍລິສັດຕົວແທນຈໍາໜ່າຍຍີ່ຫໍ້ຕ່າງໆ 25 ບໍລິສັດ, ບໍລິສັດຕົວແທນຈຳໜ່າຍ ຍານພາຫະ ແລະ ອາໄຫລ່ກົນຈັກໜັກ 6 ບໍລິສັດ, ຫ້ອງການຜູ້ຕາງໜ້າ ແລະ ບໍລິສັດວິໄຈຂໍ້ມູນ 3 ບໍລິສັດ.
ໄລຍະຜ່ານມາ, ສະມາຄົມອຸດສາຫະກໍາຍານພາຫະນະລາວ ໄດ້ຮ່ວມກັບກະຊວງແຮງງານ ແລະ ສະຫວັດດີການສັງຄົມ ສ້າງຫລັກສູດຕາມມາດຕະຖານແຫ່ງຊາດ ສີມືແຮງງານສາຂາລົດຍົນ(ລົດໃຫຍ່) ໃນນີ້, ປະກອບມີ: ສາຂາຊ່າງສ້ອມແປງຊ່ວງລ່າງລົດໃຫຍ່, ຊ່າງສ້ອມແປງສົ່ງກຳລັງ, ຊ່າງສ້ອມແປງແອລົດ, ຊ່າງສ້ອມແປງໄຟຟ້າລົດ, ຊ່າງສ້ອມແປງເຄື່ອງຈັກລົດ, ຊ່າງພົ່ນສີລົດ ແລະ ຊ່າງສ້ອມແປງໂຕຖັງລົດໃຫຍ່, ປັດຈຸບັນ ແມ່ນລໍຖ້າການປະກາດນຳໃຊ້ຄູ່ມືສະບັບປັບປຸງດັ່ງກ່າວ. ແຕ່ເຖິງຢ່າງໃດກໍຕາມ ສະມາຄົມຍັງມີສິ່ງທ້າທາຍຫລາຍດ້ານ ຕໍ່ການສ້າງຄວາມເຂັ້ມແຂງໃນສະມາຄົມ ເປັນຕົ້ນ ອາກອນຊົມ ໃຊ້ອາໄຫລ່ສູງຂຶ້ນ ແລະ ເກີດມີການນຳເຂົ້າແບບບໍ່ເສຍພາສີ (ລັກລອບ), ບັນດາຕົວແທນລົດໃຫຍ່ຈຳ ນວນຫລາຍ ຍັງບໍ່ໄດ້ເຂົ້າເປັນສະມາຊິກ (ຕົວແທນຈາກ ສປ ຈີນ), ຮວບຮວນໂຮງງານປະກອບ ແລະ ຂາຍອາໄຫລ່ລາຍໃຫຍ່ເຂົ້າເປັນສະມາຊິກ ແລະ ບັນຫາລົດນຳເຂົ້າບໍ່ຖືກຕ້ອງ (ທັງລົດບໍ່ເປັນຕົວແທນ ແລະ ລົດໜີພາສີ), ເຊິ່ງສະມາຄົມອຸດສາຫະກໍາຍານພາຫະນະລາວ ຈະຕ້ອງໄດ້ຮ່ວມມືກັບພາກສ່ວນທີ່ກ່ຽວຂ້ອງສືບຕໍ່ແກ້ໄຂ.
