ໃນຕອນເຊົ້າຂອງວັນທີ 10 ມິຖຸນາ 2022 ນີ້ ທ່ານ ພົຕ ວົງສອນ ອິນປານພິມ ຮອງເລຂາພັກແຂວງ, ພ້ອມດ້ວຍຄະນະ ແລະ ທ່ານ ດົວຊົ່ງ ເລ່ຍໂກ້ ຮອງເລຂາພັກເມືອງ ໄດ້ລົງຢ້ຽມຢາມ ເພື່ອຊຸກຍູ້ວຽກງານກໍ່ສ້າງຮາກຖານຢູ່ ບ້ານ ອອມ ແລະ ບ້ານ ກໍໄຮ ໂດຍການຕ້ອນຮັບ ຂອງທ່ານ ພັທ ບຸນທວງ ຈັນທະລີວົງ ຫົວໜ້າໜ່ວຍງານກໍສ້າງຮາກຖານ ປະຈຳບ້ານ ກໍໄຮ, ທ່ານ ຮທ ວົງພະຈັນ ຄຳພັນມີ່ງ ຫົວໜ້າໜ່ວຍງານກໍສ້າງຮາກຖານ ປະຈຳບ້ານ ອອມ ພ້ອມດ້ວຍພະນັກງານຮາກຖານ, ອຳນາດການປົກຄອງບ້ານ ແລະ ພໍ່ແມ່ປະຊາຊົນ ທັງ 2 ບ້ານ ເຂົ້າຮ່ວມ.
ໃນໂອກາດດັ່ງກ່າວ ຫົວໜ້າໜ່ວຍງານກໍ່ສ້າງຮາກຖານທັງ 2 ບ້ານ ກໍ່ໄດ້ລາຍງານໂດຍຫຍໍ້ສະພາບວຽກງານຮອບດ້ານ ຂອງໜ່ວຍງານຮາກຖານປະຈຳບ້ານ ອອມ ແລະ ບ້ານ ກໍໄຮ ປະຈຳ 6 ເດືອນຕົ້ນປີ 2022 ແລະ ທິດທາງແຜນການ 6 ເດືອນທ້າຍປີ 2022 ຊຶ່ງໄດ້ຕີລາຄາລວມ 4 ເນື້ອໃນ 4 ຄາດໝາຍ ໃນໄລຍະຜ່ານມາໜ່ວຍງານພະນັກງານລົງຮາກຖານໄດ້ສົມທົບກັບຄະນະພັກ-ຄະນະບ້ານອອມ ແລະ ບ້ານ ກໍໄຮ ເປັນເຈົ້າການສ້າງລະບົບການເມືອງຂອງບ້ານ ໃຫ້ມີຄວາມເຂັ້ມແຂງ ໜ່ວຍພັກບ້ານໄດ້ຮັບນາມມະຍົດ ເປັນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ປະຈຳປີ 2021 ແລະ ແຜນສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ປີ 2022 ອົງການຈັດຕັ້ງບ້ານ ມີຄວາມເຂົ້າໃຈໃນການບໍລິຫານລັດຂອງຕົນຢ່າງເຂັ້ມງວດ. ນອກນີ້ ຍັງໄດ້ສຶກສາອົບຮົມການເມືອງແນວຄິດ ໃຫ້ກັບພໍ່ແມ່ປະຊາຊົນບັນດາເຜົ່າ ພ້ອມທັງ ຮ່ຳຮຽນເອກະສານຂອງພັກ-ລັດ ເປັນຕົ້ນແມ່ນ ເຂົ້າຮ່ວມການເຜີຍແຜ່ຜົນສຳເລັດກອງປະຊຸມສະພາແຫ່ງຊາດ, ກອງປະຊຸມສະພາແຂວງໄຊສົມບູນ, ເຊື່ອມຊຶມບັນດານິຕິກຳ, ຄຳສັ່ງຂອງສູນກາງພັກ-ລັດຖະບານ ຢ່າງເປັນປົກກະຕິ. ປະຊາຊົນບັນດາເຜົ່າມີຄວາມສາມັກຄີປອງດອງຊ່ວຍເຫຼືອເຊິ່ງກັນ ແລະ ກັນ.
ນອກຈາກນີ້ຍັງໄດ້ສ້າງແຜນເຄື່ອນໄຫວວຽກງານຈຸດສຸມ ໂດຍສືບຕໍ່ລົງກໍ່ສ້າງຮາກຖານການເມືອງ ໂດຍສຸມໃສ່ 4 ເນື້ອໃນ 4 ຄາດໝາຍ ຂອງການສ້າງບ້ານ ແລະ ກຸ້ມບ້ານພັດທະນາ ເປັນຕົ້ນ ແມ່ນສືບຕໍ່ຈັດຕັ້ງປະຕິບັດແຜນຮັບຮອງແຜນການສ້າງບ້ານທັງ 2 ບ້ານໃຫ້ກາຍເປັນຕົວເມືອງນ້ອຍໃນຊົນນະບົດ ໂດຍສືບຕໍ່ບັນດາມາດຖານສ້າງບ້ານໃຫຍ່ໃຫ້ກາຍເປັນຕົວເມືອງນ້ອຍໃນຊົນນະບົດ ໃຫ້ບັນລຸ ແລະ ສືບຕໍ່ສຶກສາອົບຮົມການເມືອງແນວຄິດໃຫ້ພໍ່ແມ່ປະຊາຊົນ, ແກ້ໄຂບັນຫາໜໍ່ແໜງຄ້າຂາຍ ແລະ ເສບຢາເສບຕິດ ຕິດພັນກັບບັນດາປະກົດການຫຍໍ້ທໍ້ໃນສັງຄົມ ເຊັ່ນ: ຂີ້ລັກງັດແງະ ແລະ ອື່ນໆອີກດ້ວຍ. ໂອກາດດຽວກັນນີ້ ທ່ານ ພົຕ ວົງສອນ ອິນປານພິມ ກໍໄດ້ໂອ້ລົມ ຊື່ງ ທ່ານໄດ້ເນັ້ນໜັກໃຫ້ໜ່ວຍກໍ່ສ້າງຮາກຖານ ຈົ່ງສືບຕໍ່ເອົາໃຈໃສ່ສຶກສາອົບຮົມການເມືອງແນວຄິດ ໃຫ້ພໍ່ແມ່ປະຊາຊົນມີແນວຄິດອຸ່ນອ່ຽງທຸ່ນທ່ຽງຕໍ່ການນຳພາຂອງພັກ-ລັດ, ສຸມໃສ່ນຳພາອຳນາດການປົກຄອງ-ພໍ່ແມ່ປະຊາຊົນ ໃຫ້ມີຄວາມສະຫງົບປອດໄພຈາກກຸ້ມຄົນປໍລະປັກຂອງຊາດ, ສືບຕໍ່ແກ້ໄຂປະກົດການຫຍໍ້ທໍ້ຂອງສັງຄົມ ເພື່ອຮັບປະກັນຊິວິດການເປັນຢູ່ຂອງປະຊາຊົນໃຫ້ມີບາດກ້າວຂະຫຍາຍຕົວດີຂຶ້ນ, ສືບຕໍ່ແກ້ໄຂຊີວິດການເປັນຢູ່ຂອງປະຊາຊົນໃຫ້ຫຼຸດພົ້ນອອກຄວາມທຸກຍາກ ຕາມແຜນການທີ່ວາງໄວ້. ໃນຕອນທ້າຍການນຳແຂວງໄຊສົມບູນ ຍັງໄດ້ມອບເຄື່ອງຈຳນວນໜຶ່ງໃຫ້ພະນັກງານກໍສ້າງຮາກຖານ ແລະ ອຳນາດການປົກຄອງທັງ 2 ບ້ານເພື່ອແຈກຍ້າຍໃຫ້ກັບພໍ່ແມ່ປະຊາຊົນບັນດາເຜົ່າ ຕື່ມອີກ.
ບກ: ຄໍາສາວ ເລືອງຄໍາທິບ
ນັກຂ່າວ: ແກ່ນຈັນ ທຳມະນີ
