ກະຊວງກະສິກຳ ແລະ ປ່າໄມ້ ຈັດພິທີປູກຕົ້ນໄມ້ ເພື່ອສະເຫລີມສະຫລອງວັນປູກຕົ້ນໄມ້ແຫ່ງຊາດ ຄົບຮອບ 43 ປີ ແລະ ວັນເດັກນ້ອຍສາກົນ ໃນຕອນເຊົ້າຂອງວັນທີ 1 ມິຖຸນາ 2023 ຢູ່ ເຂດດົງໝາກຄາຍ ເມືອງໄຊທານີ ນະຄອນຫລວງວຽງຈັນ ໂດຍມີ ທ່ານ ກິແກ້ວ ໄຂຄຳພິທູນ ຮອງນາ ຍົກລັດຖະມົນຕີ, ທ່ານ ເພັດ ພົມພິພັກ ລັດຖະມົນຕີກະຊວງ ກະສິກຳ ແລະ ປ່າໄມ, ມີຮອງລັດຖະ ມົນຕີ, ອົງການກຳມະບານ, ສະຫະພັນແມ່ຍິງລາວ, ນ້ອງນ້ອຍເຍົາວະຊົນ, ບັນດາບໍລິສັດ ແລະ ພາກ ສ່ວນກ່ຽວຂ້ອງ ເຂົ້າຮ່ວມ.
ໃນພິທີ, ທ່ານ ທອງພັດ ວົງມະນີ ຮອງລັດຖະມົນຕີ ກະຊວງກະສິກຳ ແລະ ປ່າໄມ້ ໄດ້ກ່າວວ່າ: ເນື້ອທີ່ ປູກຕົ້ນໄມ້ໃນມື້ນີ້ມີ ປະມານ 4 ເຮັກຕາ, ຈໍານວນເບ້ຍໄມ້ທີ່ປູກປະມານ 8.500 ເບ້ຍ, ປະກອບດ້ວຍ ໄມ້ອຸດສາຫະກຳ ມີ: ໄມ້ຍາງ, ໄມ້ແຕ້ຄ່າ, ໄມ້ແຕ້ຮໍ, ໄມ້ດູ່ ແລະ ໄມ້ແຄນ ລວມທັງໝົດ 2.000 ເບ້ຍ; ປະເພດໄມ້ໃຫ້ໝາກມີ: ໄມ້ຂາມປ້ອມ, ໝາກມ່ວງ, ລຳໄຍ ແລະ ລິ້ນຈີ່ ປະມານ 250 ເບ້ຍ ແລະ ປະເພດໄມ້ປະດັບມີ: ຝາງແດງ, ໄມ້ຄູນ ແລະ ກາງກະເລົາ ປະມານ 250 ເບ້ຍ. ນອກນັ້ນຍັງມີ ໄມ້ວິກ ທີ່ບໍລິສັດ ໃຫ້ການສະໜັບສະໜູນ ຈຳນວນ 6.000 ເບ້ຍ.
ຈຸດປະສົງຂອງການປູກຕົ້ນໄມ້ຮ່ວມກັນໃນມື້ນີ້ ເພື່ອສົ່ງເສີມການປູກຕົ້ນໄມ້ ແລະ ຟື້ນຟູປ່າ ຕາມທິດທາງນະໂຍບາຍ ແລະ ເປົ້າໝາຍຂອງຍຸດທະສາດປາໄມ້ ທີ່ກໍານົດໄວ້ ຄື: ເພີ່ມເນື້ອທີ່ປົກຫຸ້ມຂອງປ່າໄມ້ ໃຫ້ໄດ້ 70% ຕາມມະຕິຂອງຄະນະບໍລິ ຫານງານສູນກາງພັກ ສະບັບເລກທີ 026/ຄບສພ, ລົງວັນທີ 3 ສິງຫາ 2017 ແລະ ມະຕິກອງປະຊຸມສະພາແຫ່ງຊາດ ສະບັບເລກທີ 098/ສພຊ, ລົງວັນທີ 28 ມິຖຸນາ 2018, ພ້ອມທັງປູກຈິດສຳນຶກ ໃຫ້ນ້ອງນ້ອຍເຍົາວະຊົນ ຮູ້ຈັກຄຸນຄ່າ, ຮັກປ່າໄມ້ ແລະ ຊັບພະຍາກອນປ່າໄມ້.
ໃນປີ 2022 ຜ່ານມາ, ກະຊວງກະສິກໍາ ແລະ ປາໄມ້ ໄດ້ສົມທົບກັບອົງການປົກ ຄອງທ້ອງຖິ່ນ ໃນຂອບເຂດທົ່ວປະເທດ ກະກຽມແຜນການ ແລະ ຂະບວນການປູກໄມ້ ຢູ່ແຕ່ທ້ອງຖິ່ນຕາມທ່າແຮງຕົນ ໃຫ້ເປັນຂະບວນຟົດຟື້ນ ໂດຍກໍານົດເປັນແຜນການ ຄື: ເກັບແກ່ນ 20.000 ກິໂລ, ກ້າເບ້ຍ 34 ລ້ານ ກວ່າເບ້ຍ ແລະ ການປູກໄມ້ 42.000 ເຮັກຕາ. ໃນນີ້ປູກໄມ້ ເພື່ອປົກປັກຮັກສາສິ່ງແວດລ້ອມ 8.535 ເຮັກຕາ ຢູ່ໃນຂອບເຂດປ່າປ້ອງກັນ, ປ່າສະຫງວນ ແລະ ປູກປ່າທົດແທນເຂດພັດທະນາພື້ນ ຖານໂຄງລ່າງ ແລະ ປູກໄມ້ອຸດຫາຫະກຳເປັນສິນຄ້າ ໃນຂອບເຂດປ່າຜະລິດ 29.565 ເຮັກຕາ ແລະ ທີ່ດິນຂອງບຸກຄົນ ແລະ ນິຕິບຸກຄົນ 3.900 ເຮັກຕາ.
ສໍາລັບປີ 2023 ນີ້, ການສ້າງຂະບວນ ການປູກໄມ້ ເນື່ອງໃນວັນ ປູກຕົ້ນໄມ້ ແຫ່ງ ຊາດ ວັນທີ 1 ມິຖຸນາ ໃນຂອບເຂດທົ່ວປະເທດ ມີແຜນຈະປູກຕົ້ນໄມ້ ໃຫ້ໄດ້ທັງໝົດ 3.480 ເຮັກຕາ, ປູກເບ້ຍໄມ້ ທັງ ໝົດ 3.484.000 ກວ່າເບ້ຍ ຊຶ່ງປະກອບມີ: ໄມ້ ອຸດສາຫະກຳ, ໄມ້ໃຫ້ໝາກ, ໄມ້ປະດັບ ແລະ ຊະນິດອື່ນ. ພ້ອມນີ້, ຢູ່ແຕ່ ລະແຂວງ ແລະ ນະຄອນຫລວງວຽງຈັນ ມີແຜນການຈັດງານວາງສະແດງເບ້ຍໄມ້ ເພື່ອເປັນການສົ່ງເສີມການປູກໄມ້ເປັນສິນຄ້າ ແລະ ປົກປັກຮັກສາສິ່ງແວດລ້ອມ. ສໍາລັບ ອົງການປົກຄອງນະຄອນຫຼວງວຽງຈັນ ມີແຜນການເພື່ອດໍາເນີນການສ້າງຂະບວນການປູກໄມ້ ເນື່ອງໃນວັນປູກໄມ້ ແຫ່ງຊາດ ວັນທີ 1 ມິຖຸນາ 2023 ໃນ 9 ຕົວເມືອງ ທົ່ວນະຄອນຫລວງ ໃນເນື້ອທີ່ 101 ເຮັກຕາ, ເບ້ຍໄມ້ 101.000 ກວ່າເບ້ຍ.
ຂ່າວ-ພາບ: ສຸກສະຫວັດ
