ໃນໂອກາດວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ ຄົບຮອບ 43 ປີ (1/6/1980-1/6/2023) ຄະນະໂຄສະນາອົບຮົມສູນກາງພັກ (ຄອສພ) ໄດ້ຈັດກິດຈະກຳປູກຕົ້ນໄມ້ ແລະ ໃສ່ຝຸ່ນຕົ້ນໄມ້ (ທີ່ໄດ້ປູກຜ່ານມາ) ຂຶ້ນໃນຕອນເຊົ້າວັນທີ 1 ມິຖຸນາ ນີ້ ທີ່ສູນຝຶກອົບຮົມ ຂອງ ຄອສພ ຢູ່ບ້ານຫ້ວຍຢາງ ເມືອງໄຊທານີ ນະຄອນຫຼວງວຽງຈັນ (ເຂດດົງໝາກຄາຍ). ໂດຍເປັນກຽດເຂົ້າຮ່ວມ ຂອງ ທ່ານ ລາວປາວຊົງ ນະວົງໄຊ ກຳມະການສູນກາງພັກ ຮອງເລຂາຄະນະພັກ ຮອງຫົວໜ້າ ຄອສພ, ມີຄະນະພັກ, ຄະນະນຳ, ຫົວໜ້າກົມ, ຮອງກົມ ແລະ ພະນັກງານ-ລັດຖະກອນ ເຂົ້າຮ່ວມຢ່າງພ້ອມພຽງ.
ຈຸດປະສົງເພື່ອເປັນການສະເຫຼີມສະຫຼອງວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ ເພື່ອໃຫ້ເປັນຂະບວນຟົດຟື້ນ ທັງເປັນການປະກອບສ່ວນຟື້ນຟູສະພາບແວດລ້ອມ, ສ້າງພື້ນທີ່ໃຫ້ເປັນສີຂຽວ ແລະ ເພື່ອຄວາມອຸດົມສົມບູນໃຫ້ແກ່ທຳມະຊາດ ຕາມແນວທາງຂໍ້ລິເລີ່ມເຂດສີຂຽວ ຂອງລັດຖະບານ ສປປ ລາວ ທີ່ວາງເປົ້າໝາຍໄວ້ໃນຂອບເຂດທົ່ວປະເທດ ປູກຕົ້ນໄມ້ໃຫ້ໄດ້ 3 ລ້ານກວ່າຕົ້ນ; ໃນສະເພາະປີ 2023 ນີ້, ເບ້ຍໄມ້ທີ່ນຳມາປູກແມ່ນຕົ້ນໄມ້ໃຫ້ໝາກ, ຕົ້ນໄມ້ອຸດສາຫະກຳເປັນຕົ້ນແມ່ນ: ໄມ້ດູ່ ແລະ ຕົ້ນມ່ວງ.
(ຂ່າວ-ພາບ: ພັດ ລໍວັນໄຊ)
