ທ່ານ ນາງ ອິນລາວັນ ແກ້ວບຸນພັນ ກຳມະການສູນກາງພັກ ປະທານຄະນະບໍລິຫານງານ ສູນກາງສະຫະພັນແມ່ຍິງລາວ (ສສຍລ) ໄດ້ຕ້ອນຮັບ ທ່ານ ນາງ ເຕເຣສາ ມາເຣຍ ອາມາເຣເຢບຸຍ(Teresa Amarelle Boue) ກຳມະການກົມການເມືອງສູນກາງພັກ ສະມາຊິກສະພາແຫ່ງລັດ ເລຂາທິການໃຫຍ່ຂອງສະຫະພັນແມ່ຍິງແຫ່ງຊາດ ກູບາ ພ້ອມດ້ວຍຄະນະ ໃນວັນທີ 17 ພຶດສະພາ ນີ້ ທີ່ ສສຍລ ຊຶ່ງທ່ານ ຈະເລີນ ເຢຍປາວເຮີ ຮອງປະທານສະພາແຫ່ງຊາດ ປະທານສະມາຄົມມິດຕະພາບລາວ-ກູບາ, ທ່ານເອກະອັກຄະລັດຖະທູດ ຜູ້ມີອໍານາດເຕັມ ແຫ່ງສາທາລະນະລັດ ກູບາ ປະຈຳ ສປປ ລາວ. ໃນໂອກາດທີ່ມາປະຕິບັດໜ້າທີ່ ຢູ່ ສປປ ລາວ ໃນລະຫວ່າງ ວັນທີ 17-21 ພຶດສະພາ 2023 ນີ້.
ທ່ານ ນາງ ອິນລາວັນ ແກ້ວບຸນພັນ ໄດ້ກ່າວວ່າ: ເພື່ອຜັນຂະຫຍາຍສາຍພົວພັນ. ການຮ່ວມມືອັນເປັນມູນເຊື້ອ ແລະ ຄວາມສາມັກຄີ ມິດຕະພາບ ລະຫວ່າງ ພັກ, ລັດ ສອງປະເທດ ເວົ້າລວມ, ເວົ້າສະເພາະ ການຮ່ວມມືລະຫວ່າງ ສະຫະພັນແມ່ຍິງລາວ-ສະຫະພັນແມ່ຍິງກູບາ ໃຫ້ເລິກເຊິ່ງ ແລະ ກວ້າງຂວາງກວ່າເກົ່າ; ໂດຍຕອບສະໜອງຕາມການເຊື້ອເຊີນຂອງສະຫະພັນແມ່ຍິງ ກູບາ ໃນເດືອນກຸມພາ 2022 ຜ່ານມາ ຄະນະຜູ້ແທນຂັ້ນສູງຂອງສະຫະພັນແມ່ຍິງລາວ ກໍໄດ້ເດີນທາງໄປຢ້ຽມຢາມ ແລກປ່ຽນບົດຮຽນວຽກງານພັດທະນາແມ່ຍິງ ຢ່າງເປັນທາງການ ແລະ ໄດ້ເຊັນບົດບັນທຶກການຮ່ວມສອງຝ່າຍ 5 ປີ (2023-2027) ຢູ່ ສ ກູບາ, ເພື່ອສືບຕໍ່ເສີມຂະຫຍາຍສາຍພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມື ລະຫວ່າງ ສອງອົງການຈັດຕັ້ງແມ່ຍິງຂອງສອງປະເທດ ໃຫ້ມີຄວາມເຂັ້ມແຂງ ແລະ ນັບມື້ໄດ້ຮັບການພັດທະນາ ແລະ ກ້າວເຂົ້າສູ່ລວງເລິກນັ້ນ. ທິດທາງຮ່ວມມືໃນຕໍ່ໜ້າ ສະຫະພັນແມ່ຍິງ ທັງສອງປະເທດ ຈະສືບຕໍ່ ຈັດຕັ້ງປະຕິບັດ ບົດບັນທຶກຮ່ວມມື (MOU) 2023-2027 ໃຫ້ມີປະສິດທິພາບ ແລະ ປະສິດທິຜົນສູງກວ່າເກົ່າ ເປັນຕົ້ນ: 1. ຊຸກຍູ້ໃຫ້ມີການພົວພັນ ແລະ ຮ່ວມມືອັນເປັນມູນເຊື້ອ ແລະ ມິດຕະພາບແບບພິເສດລະຫວ່າງສອງປະເທດ ແລະ ຊຸກຍູ້ການຮ່ວມມືລະຫວ່າງ ສະຫະພັນແມ່ຍິງລາວ-ສະຫະພັນແມ່ຍິງກູບາ ໃຫ້ກວ້າງຂວາງກວ່າເກົ່າ ເປັນຕົ້ນແມ່ນການແລກປ່ຽນຄະນະຜູ້ແທນຂັ້ນສູງລະຫວ່າງ ສອງອົງການຈັດຕັ້ງສະຫະພັນແມ່ຍິງລາວ-ສະຫະພັນແມ່ຍິງກູບາ; 2. ການສຶກສາອົບຮົມການເມືອງ-ແນວຄິດໃຫ້ສະຫະພັນແມ່ຍິງ ແລະ ແມ່ຍິງໃນການສົ່ງເສີມການຮ່ວມມືທີ່ເປັນມູນເຊື້ອຂອງສອງພັກ, ສອງລັດ ແລະ ສອງອົງການຈັດຕັ້ງແມ່ຍິງຂອງສອງປະເທດໃຫ້ເລິກເຊິ່ງ ແລະ ກວ້າງຂວາງ, ເອົາໃຈໃສ່ເປັນພິເສດຕໍ່ການມີສ່ວນຮ່ວມຂອງແມ່ຍິງເຂົ້າໃນການກໍ່ສ້າງພັກ-ພະນັກງານ ແລະ ສົ່ງເສີມການສຶກສາໃຫ້ພະນັກງານສະຫະພັນແມ່ຍິງລາວໄປຍົກລະດັບຄວາມຮູ້ດ້ານວິຊາສະເພາະ ໄລຍະຍາວ, ໄລຍະສັ້ນ ຢູ່ ສ ກູບາ ຕາມສະພາບ ແລະ ເງື່ອນໄຂຕົວຈິງ; 3. ສອງຝ່າຍຈະຊຸກຍູ້ ການແລກປ່ຽນວັດທະນະທໍາ ແລະ ຮີດຄອງປະເພນີ, ພັດທະນາສື່, ສິ່ງພິມ ເພື່ອເປັນເຄື່ອງມືໃນການເຜີຍແຜ່ໃຫ້ແມ່ຍິງ ແລະ ປະຊາຊົນ, ຄົນຮຸ່ນໜຸ່ມກ່ຽວກັບ ການອະນຸລັກຮັກສາ ມູນເຊື້ອວັດທະນະທໍາ ແລະ ຮີດຄອງປະເພນີອັນດີງາມ; 4. ຈັດກອງປະຊຸມລະດັບຕ່າງໆລະຫວ່າງ ສອງອົງການຈັດຕັ້ງສະຫະພັນແມ່ຍິງລາວ-ສະຫະພັນແມ່ຍິງກູບາ ເພື່ອແລກປ່ຽນບົດຮຽນ ແລະ ຮັບຮູ້ຂໍ້ມູນຂ່າວສານດ້ານຕ່າງໆ ຊຶ່ງກັນ ແລະ ກັນ; ແລະ 5. ສືບຕໍ່ສະໜັບສະໜູນຊຶ່ງກັນ ແລະ ກັນ ໃນການຈັດຕັ້ງປະຕິບັດຄໍາໝັ້ນສັນຍາທີ່ສອງປະເທດເປັນພາຄີຂອງສາກົນທີ່ຕິດພັນກັບວຽກແມ່ຍິງ ແລະ ເດັກນ້ອຍ ເປັນຕົ້ນແມ່ນ ສົນທິສັນຍາວ່າດ້ວຍ ການລຶບລ້າງຂອງທຸກຮູບການຈຳແນກຕໍ່ແມ່ຍິງ (CEDAW), ສິດທິເດັກ (CRC), ການຈັດຕັ້ງປະຕິບັດຖະແຫຼງການ ແລະ ແຜນປະຕິບັດງານປັກກິ່ງ, ການຈັດຕັ້ງປະຕິບັດ ເປົ້າໝາຍການພັດທະນາແບບຍືນຍົງ 2030 ແລະ ອື່ນໆ. ໃນໂອກາດດັ່ງກ່າວ ທ່ານ ນາງ ອິນລາວັນ ແກ້ວບຸນພັນ ໃນນາມຄະນະບໍລິຫານງານສູນກາງສະຫະພັນແມ່ຍິງລາວ ແລະ ແມ່ຍິງລາວທົ່ວປະເທດ ໄດ້ອວຍພອນຢ່າງຈິງໃຈມາຍັງ ທ່ານ ນາງ ເຕເຣສາ ມາເຣຍ ອາມາເຣເຢບຸຍ ພ້ອມດ້ວຍຄະນະນຳສະຫະພັນແມ່ຍິງກູບາ ແລະ ເອື້ອຍນ້ອງແມ່ຍິງກູບາທຸກຖ້ວນໜ້າ ຈົ່ງມີສຸຂະພາບພະລານາໄມເຂັ້ມແຂງ, ມີຄວາມຜາສຸກ ແລະ ປະສົບຜົນສໍາເລັດໃໝ່ໃຫຍ່ຫຼວງກວ່າເກົ່າ ໃນໜ້າທີ່ວຽກງານອັນມີກຽດສູງສົ່ງຂອງບັນດາທ່ານ. ອວຍພອນໃຫ້ສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມື ລະຫວ່າງ ພັກ-ລັດ ແລະ ປະຊາຊົນສອງຊາດ, ກໍຄື ແມ່ຍິງລາວ ແລະ ແມ່ຍິງກູບາ ຈົ່ງໝັ້ນຄົງຂະໜົງແກ່ນ ຕະຫຼອດໄປ.
ໃນໂອກາດດັ່ງກ່າວ ປະທານ ສະຫະພັນແມ່ຍິງກູບາ ກໍໄດ້ສະແດງຄວາມຂອບໃຈໃນການຕ້ອນຮັບອັນອົບອຸ່ນ ແລະ ໄດ້ລາຍງານໃຫ້ທ່ານປະທານຄະນະບໍລິຫານງານ ສູນກາງສະຫະພັນແມ່ຍິງລາວ ຮັບຊາບກ່ຽວກັບແຜນເຄື່ອນໄຫວຂອງ ທ່ານປະທານສະຫະພັນແມ່ຍິງກູບາ ຊຶ່ງຈະໄດ້ປາຖະກະຖາການພົວພັນຮ່ວມມື ລະຫວ່າງ ສອງພັກ, ສອງລັດ ແລະ ສອງອົງການຈັດຕັ້ງສະຫະພັນແມ່ຍິງ; ເພື່ອເປັນການປຸກລະດົມ ສຶກສາອົບຮົມການເມືອງແນວຄິດໃຫ້ເອື້ອຍນ້ອງແມ່ຍິງ ເຫັນໄດ້ ແລະ ເຂົ້າໃຈເລິກເຊິ່ງຕໍ່ສາຍພົວພັນ ທີ່ເປັນມູນເຊື້ອ ຄວາມສາມັກຄີ ທີ່ໄດ້ຊ່ວຍເຫຼືອ ຊຶ່ງກັນ ແລະ ກັນ ໃນສະໄໝຕໍ່ສູ້ປົດປ່ອຍປະເທດຊາດ ແລະ ການສ້າງສາພັດທະນາປະເທດຊາດ; ຈະໄດ້ເຄື່ອນໄຫວຢ້ຽມຢາມທຸລະກິດຕົວແບບ ຂອງເອື້ອຍນ້ອງແມ່ຍິງ ແລະ ສະຖານທີ່ທາງວັດທະນາທຳ ແລະ ປະຫວັດສາດຕ່າງໆຢູ່ນະຄອນຫຼວງວຽງຈັນ ແລະ ແຂວງວຽງຈັນ, ປູກຕົ້ນໄມ້ ຢູ່ ໂຮງຮຽນ ມ.ສ ດົງບັງ ມິດຕະພາບ ລາວ-ກູບາ ຕື່ມອີກ.
ຂ່າວ-ພາບ: ຍຸພິນທອງ-ວັນເພັງ
