ຕາມຂ່າວຈາກວິທະຍຸສາກົນຫວຽດນາມ ກອງປະຊຸມລະດັບພາກພື້ນ “ຂໍ້ລິເລີ່ມການນຳໜຸ່ມອາຊີຕາເວັນອອກສ່ຽງໃຕ້ (YSEALI) 2023” ໂດຍສະຖານທູດອາເມລິກາ ປະຈຳ ສສ ຫວຽດນາມ ແລະ ມະຫາວິທະຍາໄລເສດຖະກິດແຫ່ງຊາດ ສົມທົບກັນ ຈັດຂຶ້ນໃນວັນທີ 16 ພຶດສະພານີ້, ຢູ່ນະຄອນຫລວງຮ່າໂນ້ຍ ຂອງ ສສ ຫວຽດນາມ ເພື່ອແນໃສ່ຊຸກຍູ້ການຮ່ວມມືສາກົນແມ່ນໂອກາດເພື່ອໃຫ້ຜູ້ແທນໄດ້ແລກປ່ຽນ ກ່ຽວກັບແນວຄວາມຄິດການສຶກສາ, ຮຽນຮູ້ບົດຮຽນປະສົບການ ຈາກນັກຊ່ຽວຊານ, ທີ່ປຶກສາດ້ານການສຶກສາທີ່ມີອິດທິພົນຊື່ສຽງ, ຈາກນັ້ນ ສ້າງພື້ນຖານແກ່ບັນດາມາດຕະການປະດິດຄິດສ້າງຕໍ່ການທົດສອບ ເຊິ່ງໂລກພວມຜະເຊີນໜ້າ. ສຳລັບກອງປະຊຸມຄັ້ງນີ້ມີຄູ ອາຈານ, ນັກວາງກຳນົດນະໂຍບາຍ, ທີ່ປຶກສາ ແລະ ນັກຊ່ຽວຊານໜຸ່ມທີ່ເຮັດວຽກຢູ່ຮາກຖານການສຶກສາຕ່າງໆ, ອົງການລັດຖະບານ, ອົງການບໍ່ຂຶ້ນກັບລັດຖະບານ ແລະ ບັນດາອົງການຈັດຕັ້ງສັງຄົມ ຈຳນວນ 75 ຄົນ ຫລັງຈາກບັນດາການນຳໜຸ່ມດີເດັ່ນທີ່ໄດ້ຜ່ານການຄັດເລືອກຢ່າງເຄັ່ງຄັດ ຈາກຜູ້ສະໝັກຫລາຍກວ່າ 900 ຄົນ ຂອງກຸ່ມປະເທດສະມາຊິກອາຊຽນ.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
