ສຳນັກຂ່າວໄທ ວັນທີ 15 ພຶດສະພານີ້ ປະທານຄະນະກຳມະການເລືອກຕັ້ງຂອງໄທ ຖະແຫລງຜົນການເລືອກຕັ້ງສະພາຜູ້ແທນລາຊະດອນ (ສສ) ຊຸດໃໝ່ທົ່ວປະເທດຢ່າງບໍ່ເປັນທາງການ ແມ່ນພັກກ້າວໄກຍາດໄດ້ບ່ອນນັ່ງ ສສ ເປັນອັນດັບ 1 ຫລັງຈາກນີ້ຈະເລັ່ງພິຈາລະນາ ຮັບຮອງ ຜົນການເລືອກຕັ້ງ ທົ່ວປະເທດ ພາຍໃນ 90ວັນ ຕາມທີ່ ກົດໝາຍ ກຳນົດ ໂດຍມີ ຜູ້ອອກມາໃຊ້ສິດການເລືອກຕັ້ງຫລາຍທີ່ສຸດໃນປະຫວັດສາດ. ສຳລັບຜົນການເລືອກຕັ້ງແບບບໍ່ເປັນທາງການ ໂດຍ ສສ ແບບແບ່ງເຂດເລືອກຕັ້ງ, ອັນດັບທີ 1 ແມ່ນພັກກ້າວໄກ ຍາດໄດ້ 152 ບ່ອນນັ່ງ ຕາມມາດ້ວຍ ພັກເພື່ອໄທ 141 ບ່ອນນັ່ງ, ພັກພູມໃຈໄທ 70ບ່ອນນັ່ງ, ພັກພະລັງ ປະຊາຣັດ 40 ບ່ອນນັ່ງ ແລະ ພັກລວມໄທສ້າງຊາດ 36 ບ່ອນນັ່ງຕາມລຳດັບ.
ຂະນະທີ່ ຄະນະ ກຳມະການ ເລືອກຕັ້ງ ຂອງໄທ ຍັງຈະກວດສອບ ການນັບຄະແນນ ຢ່າງລະອຽດ ກ່ອນຈະ ປະກາດ ຮັບຮອງ ຜົນການ ເລືອກຕັ້ງ ຄັ້ງນີ້ ຢ່າງເປັນທາງການ.ປັດຈຸບັນ ທ່ານ ປຣະຢຸດ ຈັນໂອຊາ ຍັງເປັນນາຍົກ ລັດຖະມົນຕີ ຮັກສາການ ຂອງໄທ ຈົນກວ່າ ຈະມີການແຕ່ຕັ້ງ ຄະນະລັດຖະບານ ຊຸດໃໝ່ ຢ່າງເປັນທາງການ./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
