ຕາມຂ່າວຈາກວິທະຍຸສາກົນຫວຽດນາມ ບັນດາລັດຖະມົນຕີກະຊວງການເງິນຂອງກຸ່ມບັນດາປະເທດອຸດສາຫະກຳ ພັດທະນາແຖວໜ້າໂລກ (G7) ຈະສະໜອງບ້ວງເງິນ ຊ່ວຍເຫລືອໃຫ້ບັນດາປະເທດ ທີ່ມີລາຍຮັບຕ່ຳ ແລະ ປານກາງ ເພື່ອໃຫ້ບັນດາປະເທດເຫລົ່ານັ້ນ ສາມາດມີບົດບາດທີ່ໃຫຍ່ຫລວງກວ່າໃນລະບົບສະໜອງ ຜະລິດຕະພັນ ທີ່ກ່ຽວ ຂ້ອງເຖິງ ພະລັງງານ. ໃນຮ່າງຖະແຫລງການ ສະບັບ ສຸດທ້າຍ ຂອງ ກອງປະຊຸມ ລັດຖະມົນຕີ ກະຊວງ ການເງິນ ແລະ ຜູ້ວ່າການທະນາ ຄານ ສູນກາງ ຈີ7 ຈັດຂຶ້ນ ເມື່ອບໍ່ດົນມານີ້ ຢູ່ນະຄອນ ນິກາຕະ (Niigata) ຂອງ ຍີ່ປຸ່ນ ໄດ້ຕົກລົງ ເຫັນດີ ການຫັນລະບົບ ສະໜອງ ທົ່ວ ໂລກ ເປັນຫລາຍຮູບ ຫລາຍແບບ ສາມາດ ປະກອບສ່ວນ ປ້ອງກັນ ຄວາມ ໝັ້ນຄົງ ດ້ານພະລັງ ງານ ແລະ ຊ່ວຍຮັກສາ ເສດຖະກິດ ມະຫາພາກ ເປັນ ປົກກະຕິ. ຂະນະທີ່ ຈີ7 ຈະເຮັດວຽກກັບ ບັນດາປະເທດ ທີ່ມີຄວາມສົນໃຈ ແລະ ອົງການ ຈັດຕັ້ງ ສາກົນ ທີ່ກ່ຽວຂ້ອງ ດ້ວຍເປົ້າໝາຍ ເລີ່ມປະຕິບັດ ແຜນການນີ້ ຊ້າສຸດ ແມ່ນ ໃນທ້າຍປີນີ້./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
