ຂ່າວສານຊີອາໄອລາຍງານ ໃນທ້າຍອາທິດຜ່ານມາ, ທ່ານ ຈ່າງຈວິ່ນ ຜູ້ຕາງໜ້າຖາວອນຈີນປະຈຳອົງການສະຫະປະຊາຊາດໄດ້ກ່າວຄຳປາໄສໃນກອງປະຊຸມຂັ້ນສູງປະເທດທີ່ມີລາຍຮັບປານກາງໃນສະມັດຊາໃຫຍ່ອົງການສະຫະປະຊາຊາດ ໂດຍຮຽກຮ້ອງໃຫ້ປະຊາຄົມໂລກສະໜັບສະໜູນການພັດທະນາປະເທດທີ່ມີລາຍຮັບປານກາງ.
ທ່ານ ຈ່າງຈວິ່ນ ກ່າວວ່າ: ປັດຈຸບັນເສດຖະກິດໂລກຟື້ນຕົວຄືນຢ່າງຊັກຊ້າ, ປັດໄຈທີ່ບໍ່ແນ່ນອນ ປະເພດຕ່າງໆໄດ້ເພີ່ມຂຶ້ນ. ບັນດາປະເທດພວມພັດທະນາ ຊຶ່ງລວມທັງປະເທດທີ່ມີລາຍຮັບປານກາງໄດ້ປະເຊີນໜ້າກັບສິ່ງທ້າທາຍຫຼາຍຢ່າງໃນການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ. ປະຊາຄົມໂລກຄວນສາມັກຄີ ແລະ ຮ່ວມມືກັນ ພ້ອມກັນສະໜັບສະໜູນປະເທດທີ່ມີລາຍຮັບປານກາງ ຊອກຄົ້ນຫາເສັ້ນທາງພັດທະນາທີ່ສອດຄ່ອງກັບສະພາບແຫ່ງຊາດຂອງປະເທດຕົນ, ວາງບາດກ້າວໄປສູ່ເປົ້າໝາຍການພັດທະນາແບບຍືນຍົງທີ່ມີຄຸນນະພາບສູງຢ່າງບໍ່ຢຸດຢັ້ງ.
ທ່ານ ຈ່າງຈວິ່ນ ກ່າວຕື່ມວ່າ: ຈີນໄດ້ລິເລີ່ມຂະບວນການໃໝ່ທີ່ສ້າງປະເທດສັງຄົມນິຍົມທັນສະໄໝຢ່າງຮອບດ້ານ, ຈີນຍິນດີຮ່ວມກັບບັນດາປະເທດພ້ອມກັນຊຸກຍູ້ການພັດທະນາຮ່ວມກັນ ເພື່ອສ້າງອະນາຄົດຮ່ວມ.
