ແຫລ່ງຂ່າວຈາກ ແຂວງໄຊສົມບູນ ໃຫ້ຮູ້ວ່າ: ເມືອງອະນຸວົງ ແຂວງໄຊສົມບູນ ປະກາດບ້ານຫລັກ 18 ເປັນບ້ານວັດທະນະທຳ ແຫ່ງທີ 14 ຂອງເມືອງ ແລະ ແຫ່ງທີ 68 ຂອງແຂວງ ໃນວັນທີ 12 ພຶດສະພາ ຜ່ານມາ ໂດຍການເຂົ້າຮ່ວມຂອງທ່ານ ຕົ່ງມົວ ຊົວໂກ້ ຮອງເຈົ້າແຂວງໄຊສົມບູນ, ທ່ານ ຮືທໍ່ ເພຍຫລວງ ເຈົ້າເມືອງອະນຸວົງ, ທ່ານ ທົງສະຫວັນ ໂພສະລາດ ຫົວໜ້າພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແຂວງໄຊສົມບູນ ພ້ອມດ້ວຍອຳນາດການປົກຄອງບ້ານ ແລະ ປະຊາຊົນພາຍໃນບ້ານເຂົ້າຮ່ວມ.
ທ່ານ ແສງຈັນ ສົມບຸນເຮືອງ ຮອງນາຍບ້ານ ຫລັກ 18 ໄດ້ລາຍງານວ່າ: ບ້ານຫລັກ 18 ເປັນບ້ານທີ່ມີພູມສັນຖານ ລັກສະນະເປັນເຂດພູດອຍ (ພູສູງ), ມີເນື້ອທີ່ຄຸ້ມຄອງທັງໝົດ 17.800 ກວ່າເຮັກຕາ, ມີພົນລະເມືອງ 200 ກວ່າຄົນ, ຍິງ 100 ກວ່າຄົນ, ມີ 2 ຊົນເຜົ່າຄື: ເຜົ່າກຶມມຸ ກວມເອົາ 88,61%, ເຜົ່າລາວລຸ່ມກວມເອົາ 11,38%, ມີ 40 ກວ່າຫລັງຄາເຮືອນ, 50 ກວ່າຄອບຄົວ, ມີ 3 ໜ່ວຍສາມັກຄີ ແລະ ມີການຈັດຕັ້ງຄົບຊຸດ. ໃນໄລຍະຜ່ານມາ ຄະນະພັກ, ອໍານາດການປົກຄອງບ້ານ ໄດ້ເອົາໃຈໃສ່ນໍາພາ-ຊີ້ນຳ ສຶກສາອົບຮົມການເມືອງແນວຄິດ ໃຫ້ພໍ່ແມ່ປະຊາຊົນ ເປັນປົກກະຕິ ເຮັດໃຫ້ປະຊາຊົນພາຍໃນບ້ານ ເຂົ້າໃຈຕໍ່ແນວທາງນະໂຍບາຍຂອງພັກ-ລັດ ແລະ ໄດ້ພ້ອມກັນສຸມສະຕິປັນຍາ ກຳລັງແຮງ ຊຸກຍູ້ປະຊາຊົນ ສ້າງເສດຖະກິດຄອບຄົວ ເພື່ອໃຫ້ມີຊີວິດການເປັນຢູ່ດີຂຶ້ນ ເພື່ອໃຫ້ຫລຸດພົ້ນ ອອກຈາກຄວາມທຸກຍາກເທື່ອລະກ້າວ. ຄຽງຄູ່ກັນນີ້ ກໍໄດ້ຈັດສັນທີ່ດິນທຳການຜະລິດໃຫ້ປະຊາຊົນ ເພື່ອທຳການຜະລິດໃຫ້ກາຍເປັນສິນຄ້າ, ເຊິ່ງທົ່ວບ້ານມີເນື້ອທີ່ປູກເຂົ້າທັງໝົດ 40 ກວ່າເຮັກຕາ, ຜົນຜະລິດໄດ້ 100 ກວ່າໂຕນ, ສະມັດຕະພາບ ສະເລ່ຍ 2 ໂຕ່ນກວ່າ/ເຮັກຕາ, ສະເລ່ຍຕໍ່ຫົວຄົນຜູ້ໜຶ່ງໄດ້ຮັບເຂົ້າເປືອກ 300 ກວ່າກິໂລ/ຄົນ/ປີ. ນອກນີ້, ຍັງມີສັດລ້ຽງ 1.000 ກວ່າໂຕ ເຮັດໃຫ້ປະຊາຊົນພາຍໃນບ້ານ ສາມາດກຸ້ມຢູ່ກຸ້ມກິນ.
ໂອກາດນີ້, ທ່ານ ຕົ່ງມົວ ຊົວໂກ້ ໄດ້ຍົກໃຫ້ເຫັນເຖິງຄວາມໝາຍຄວາມສໍາຄັນ ຂອງການສ້າງບ້ານວັດທະນະທຳ ມັນສະແດງໃຫ້ເຫັນເຖິງຜົນສຳເລັດ ຂອງການສ້າງບຸກຄົນ, ຄອບຄົວ ແລະ ບ້ານວັດທະນະທຳ ໄດ້ບັນລຸໄປຕາມຈຸດປະສົງ ແລະ ລະດັບຄາດໝາຍທີ່ວາງໄວ້ ພ້ອມທັງຮຽກຮ້ອງໃຫ້ປະຊາຊົນເອົາໃຈໃສ່ ໃນການສ້າງເສດຖະກິດຄອບຄົວ ໂດຍສະເພາະ ການປູກຝັງ-ລ້ຽງສັດ ຜະລິດເປັນສິນຄ້າ ເພື່ອເປັນກຳລັງແຮງໃນການສ້າງບ້ານຂອງຕົນ ໃຫ້ກາຍເປັນບ້ານພັດທະນາໃນອະນາຄົດ ພ້ອມທັງ ຮັກສາຮີດຄອງປະເພນີອັນດີງາມຂອງຊາດ ຂອງເຜົ່າ ແລະ ປົກປັກຮັກສານາມມະຍົດບ້ານວັດທະນະທຳ ໃຫ້ຍືນຍົງຕະຫລອດໄປ.
ຂ່າວ: ພຸດທະສອນ ເວດສະວົງ
