ກະຊວງສຶກສາທິການ ແລະ ກີລາ (ສສກ) ສປປ ລາວ ແລະ ສະມາຄົມໂພຊະນາການແຫ່ງຊາດຍີ່ປຸ່ນ ພົບປະຫາລືກັນກ່ຽວກັບວຽກງານການຊຸກຍູ້ໂຄງການປັບປຸງໂພຊະນາການ ລາວ-ຍີ່ປຸ່ນ ເມື່ອບໍ່ດົນຜ່ານມາ ທີ່ຫ້ອງປະຊຸມສະຖາບັນຄົ້ນຄວ້າວິທະຍາສາດການສຶກສາ ໂດຍມີ ທ່ານ ຮສ ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກີລາ ທ່ານ ນະກະມູລະ ເທຈິ ປະທານສະມາຄົມໂພຊະນາການແຫ່ງຊາດຍີ່ປຸ່ນ ແລະ ທ່ານ ໂຄດະມະ ເຄຈິ ປະທານສະມາຄົມການສຶກສາສາກົນໂຄດະມະ ພ້ອມດ້ວຍຄະນະ ມີຫົວໜ້າ ຮອງຫົວໜ້າກົມ ແລະ ຄະນະຮັບຜິດຊອບວຽກງານກ່ຽວຂ້ອງເຂົ້າຮ່ວມ.
ການພົບປະໃນຄັ້ງນີ້ ເພື່ອປຶກສາຫາລືກັນກ່ຽວກັບການຊຸກຍູ້ໂຄງການປັບປຸງໂພຊະນາການ ລາວ-ຍີ່ປຸ່ນ ເຊິ່ງໂຄງການດັ່ງກ່າວໄດ້ລິເລີ່ມມາຕັ້ງແຕ່ເດືອນກັນຍາ 2022 ຜ່ານມາ ໂອກາດດັ່ງກ່າວ ທ່ານ ກະມູລະ ເທຈິ ໄດ້ສະເໜີກ່ຽວກັບຄວາມເປັນມາ ແລະ ຕົ້ນກໍາເນີດຂອງ ນັກໂພຊະການຂອງປະເທດຍີ່ປຸ່ນ ອາຫານທ່ຽງໃນໂຮງຮຽນຂອງນັກຮຽນຍີ່ປຸ່ນ ແລະ ການປູກຝັງຈິດສໍານຶກດ້ານໂພຊະການໃຫ້ແກ່ນັກຮຽນ ແລະ ພໍ່ແມ່ນັກຮຽນຂອງຄົນຍີ່ປຸ່ນ ພ້ອມທັງນໍາສະເໜີກ່ຽວກັບໂພຊະການ ແລະ ອາຫານທ່ຽງໃນໂຮງຂອງນັກຮຽນ ສປປ ລາວ.
ສໍາລັບຜົນຂອງການຢ້ຽມຢາມໃນຄັ້ງນີ້ ໄດ້ສ້າງຄວາມເຂົ້າໃຈຢ່າງເລິກເຊິ່ງລະຫວ່າງສອງຝ່າຍກ່ຽວກັບໂຄງການ ເປົ້າໝາຍ ວິທີການຈັດຕັ້ງປະຕິບັດ ພ້ອມທັງໄດ້ມີການແລກປ່ຽນຂໍ້ມູນທີ່ເປັນປະໂຫຍດ ແລະ ກະກຽມສ້າງຕັ້ງທີມງານ ແລະ ຄະນະຈັດຕັ້ງປະຕິບັດໂຄງການໃຫ້ກວມເອົາທຸກພາກສ່ວນກ່ຽວຂ້ອງເພື່ອຮ່ວມມືກັນໃຫ້ບັນລຸເປົ້າໝາຍ.
