ທ່ານ ວິໄລວົງ ບຸດດາຄໍາ ເຈົ້າແຂວງຈໍາປາສັກ ພ້ອມຄະນະ ໄດ້ຕ້ອນຮັບ ທ່ານ ລີນຄໍາ ດວງສະຫວັນ ປະທານກໍາມາທິການເສດຖະກິດ ເຕັກໂນໂລຊີ ແລະ ສິ່ງແວດລ້ອມ, ສະພາແຫ່ງຊາດ ພ້ອມດ້ວຍຄະນະ ເມື່ອບໍ່ດົນມານີ້ ທີ່ຫ້ອງວ່າການແຂວງຈຳປາສັກ. ໃນໂອກາດລົງເຄື່ອນໄຫວເຮັດວຽກ ຢູ່ ແຂວງຈໍາປາສັກ.
ໂອກາດນີ້, ທ່ານ ວິໄລວົງ ບຸດດາຄໍາ ໄດ້ສະແດງການຕ້ອນຮັບ ແລະ ຊົມເຊີຍ ທີ່ທ່ານປະທານກໍາມາທິການເສດຖະກິດ ເຕັກໂນໂລຊີ ແລະ ສິ່ງແວດລ້ອມ, ສະພາແຫ່ງຊາດ ພ້ອມດ້ວຍຄະນະ ທີ່ໄດ້ລົງມາຕິດຕາມ, ຊຸກຍູ້ ວຽກງານ ໂດຍສະເພາະ ການສົ່ງເສີມການຜະລິດກະສິກໍາ, ການຄຸ້ມຄອງລາຄາ-ການນໍາເຂົ້າສິນຄ້າ ແລະ ການຟື້ນຟູປ່າໄມ້ ຢູ່ພາຍໃນແຂວງຈໍາປາສັກ, ພ້ອມນັ້ນ ທ່ານເຈົ້າແຂວງຈໍາປາສັກ, ທ່າເຈົ້າແຂວງຈຳປາສັກ ໄດ້ລາຍງານ ສະພາບລວມ, ຜົນງານອັນພົ້ນເດັ່ນ ໂດຍໄດ້ສືບຕໍ່ຈັດຕັ້ງປະຕິບັດບັນດາແຜນວຽກຈຸດສຸມທີ່ສະພາປະຊາຊົນແຂວງໄດ້ຮັບຮອງ, ສຸມໃສ່ປະຕິບັດບັນດາເປົ້າໝາຍ ໃນການພັດທະນາເສດຖະກິດ-ສັງຄົມ ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ ທີ່ໄດ້ຮັບໝາກຜົນໃນຫຼາຍດ້ານ. ແລະ ອົງການປົກຄອງແຂວງ ຍັງໄດ້ສົມທົບ ກັບ ສະພາປະຊາຊົນແຂວງຈໍາປາສັກ ໃນການສ້າງ ນິຕິກຳ ລຸ່ມກົດໝາຍ ໃນການຈັດສັນພື້ນທີ່ທຳການຜະລິດ, ຊ່ວຍໃນການຄຸ້ມຄອງ ປ້ອງກັນການບຸກລຸກປ່າ, ຈັດສັນໃຫ້ມີ ການປູກ ການລ້ຽງ ໂດຍສະເພາະພືດເມືອງໜາວ ເພື່ອປະກອບສ່ວນໃນການພັດທະນາເສດຖະກິດ-ສັງຄົມ ຂອງແຂວງຈຳປາສັກ ໃຫ້ດີຂຶ້ນເປັນກ້າວໆ.
ທ່ານ ລີນຄໍາ ດວງສະຫວັນ ໄດ້ກ່າວຈຸດປະສົງ ແລະລາຍງານການລົງເຄື່ອນໄຫວຕິດຕາມວຽກງານຄັ້ງນີ້ ແມ່ນ ໄດ້ເຮັດວຽກຮ່ວມກັບສະພາປະຊາຊົນແຂວງ ແລະ ບັນດາພະແນກການຂອງແຂວງ ກ່ຽວກັບການຈັດຕັ້ງປະຕິບັດ ການສົ່ງເສີມການຜະລິດກະສິກໍາ, ການຄຸ້ມຄອງການນໍາເຂົ້າສິນຄ້າ, ການຄຸ້ມຄອງລາຄາສິນຄ້າ ແລະ ການຟື້ນຟູປ່າໄມ້ ຢູ່ແຂວງຈໍາປາສັກ, ພ້ອມທັງຢ້ຽມຢາມ ເຮັດວວຽກທີ່ດ່ານສາກົນ ວັງເຕົ່າ, ເຂດພັດທະນາ ທ່ານບົກ ວັງເຕົ່າ ໂພນທອງ, ເຄື່ອນໄຫວຢ້ຽມຢາມເບິ່ງເຂດຜະລິດກະສິກໍາຢູ່ເມືອງປາກຊ່ອງ ຕື່ມອີກ.
ຂ່າວ: ທັດຊະນະ, ພາບ: ພູທິບສະຫວັນ
