ເມື່ອບໍ່ດົນຜ່ານມາ, ທີ່ກະຊວງການເງິນ, ທ່ານ ສັນຕິພາບ ພົມວິຫານ ລັດຖະມົນຕີກະຊວງການເງິນໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ດໍມີນິກສຄິສເວນ ປະທານກຸ່ມບໍລິສັດ ມັງກອນການລົງທຶນຫວຽດນາມພ້ອມດ້ວຍຄະນະ ໃນໂອກາດທີ່ມາຢ້ຽມຢາມ ແລະ ເຮັດວຽກຢູ່ ສປປ ລາວ ເພື່ອປຶກສາຫາລື ແລະ ເກັບກໍາຂໍ້ມູນກ່ຽວກັບພາລະບົດບາດຂອງກະຊວງການເງິນ ແລະ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງ ສປປ ລາວ ເພື່ອຊອກຫາຊ່ອງທາງການລົງທຶນຢູ່ ສປປ ລາວ.
ພ້ອມກັນນີ້, ທັງສອງຝ່າຍໄດ້ແລກປ່ຽນຄໍາເຫັນ, ປຶກສາຫາລືສະພາບຄວາມຫຍຸ້ງຍາກທາງດ້ານເສດຖະ ກິດ-ການເງິນຂອງພາກພື້ນ ແລະ ສາກົນ ໂດຍສະເພາະສະພາບພາຍໃນປະເທດ ເຫັນວ່າ ສປປ ລາວ ຍັງຈະພົບພໍ້ຄວາມຫຍຸ້ງຍາກທາງດ້ານເສດຖະກິດ-ການເງິນ ຈາກສະພາບພາຍນອກ ແລະ ພາຍໃນປະເທດຂະແໜງການເງິນ, ຍັງສືບຕໍ່ພົບພໍ້ບັນຫາສິ່ງທ້າທາຍຫລາຍດ້ານ ແລະ ຕ້ອງເພີ່ມທະວີຄົ້ນຄວ້າກໍານົດບັນດານະໂຍບາຍ ແລະ ມາດຕະ ການທາງດ້ານການເງິນປະຕິບັດຕາມວາລະແຫ່ງຊາດ ເພື່ອໃຫ້ສາມາດຮັບມື ແລະ ແກ້ໄຂທັນສະພາບການທີ່ຕິດພັນກັບຂະແໜງການເງິນ.
ໂອກາດນີ້, ທ່ານລັດຖະມົນຕີກະຊວງການເງິນ ໄດ້ກ່າວຕ້ອນຮັບ ແລະ ສະເໜີໂດຍສັງເຂບກ່ຽວກັບພາລະບົດບາດ, ໜ້າທີ່ ແລະ ຂອບເຂດສິດຂອງກະຊວງການເງິນ, ຊຶ່ງເປັນເສນາທິການໃຫ້ລັດຖະບານ ໃນການຄົ້ນຄວ້າວິເຄາະ, ວິໄຈຂໍ້ມູນສະພາບດ້ານການເງິນ-ງົບປະມານແຫ່ງລັດ ແຕ່ລະໄລຍະ ເພື່ອສ້າງ ແລະ ປັບປຸງກົດໝາຍ, ນະ ໂຍບາຍ, ມາດຕະການທາງດ້ານການເງິນ-ງົບປະມານ, ພາສີ, ສ່ວຍສາອາກອນ, ຊັບສິນ, ໜີ້ສິນ, ລັດວິສາຫະກິດ-ການປະກັນໄພ ແລະ ນະໂຍບາຍອື່ນໆໃນຂົງເຂດການເງິນແຫ່ງລັດ ແລະ ຄົ້ນຄວ້າວິທະຍາສາດການເງິນ, ເພື່ອສະ ເໜີຕໍ່ລັດຖະບານ ພິຈາລະນາສ້າງ ແລະ ປັບປຸງວິໄສທັດ, ຍຸດທະສາດ, ແຜນງົບປະມານແຫ່ງລັດ, ແຜນພັດທະນາຂະແໜງການເງິນໄລຍະຍາວ ແລະ ສະຫລຸບການຈັດຕັ້ງປະຕິບັດແຜນງົບປະມານແຫ່ງລັດໄລຍະກາງ (1+2), ປະຈໍາປີໃນຂອບເຂດທົ່ວປະເທດ ລວມທັງລາຍຈ່າຍທາງດ້ານການເງິນອື່ນ ທີ່ລັດຖະບານຮັບຜິດຊອບຕາມກົດໝາຍ ແລະ ລະບຽບການ. ພ້ອມນີ້, ຍັງຮັບຜິດຊອບວຽກງານ ການລະດົມທຶນການຊ່ວຍເຫລືອທາງການ ເພື່ອການພັດທະນາ (ODA) ມາລົງທຶນໃນບັນດາໂຄງການຂອງລັດ ເພື່ອມາດຸ່ນດ່ຽງງົບປະມານມະຫາພາກ.
ຂ່າວ-ພາບ: ກະຊວງການເງິນ
