ວຽກງານສ່ອງແສງຂ່າວແມ່ນວຽກງານຍຸດທະສາດໜຶ່ງຂອງວຽກງານການເມືອງ-ແນວຄິດ ຊຶ່ງມີໜ້າທີ່, ມີຄວາມຮັບຜິດຊອບ ແລະ ມີການເຄື່ອນໄຫວເພື່ອສະໜອງຂໍ້ມູນຂ່າວສານໃຫ້ແກ່ການນຳພາຂອງພັກ, ຂອງລັດແຕ່ລະຂັ້ນໃຫ້ມີຄວາມຖືກຕ້ອງ, ຊັດເຈນ ແລະ ຄົບຖ້ວນ.
ທ່ານ ສາຄອນ ພົມມະລາດ ຫົວໜ້າຫ້ອງການຄະນະໂຄສະນາອົບຮົມສູນກາງພັກໃຫ້ຮູ້ວ່າ:ການເຄື່ອນໄຫວວຽກງານສ່ອງແສງຂ່າວປີ 2023 ໂດຍຈະເພີ່ມທະວີການຕິດຕາມ, ເກັບກໍາສະພາບການທີ່ພົ້ນເດັ່ນ, ສະພາບແນວຄິດ-ຫາງສຽງສັງຄົມ ທີ່ມີຕໍ່ການນໍາພາຂອງພັກ ແລະ ການຄຸ້ມຄອງຂອງລັດໃຫ້ເລິກເຊິ່ງ, ຍົກສູງຄວາມສາມາດໃນການສັງລວມສະພາບແນວຄິດຫາງສຽງສັງຄົມໃຫ້ຖືກຕ້ອງ, ຄົບຖ້ວນ ແລະ ເຂົ້າໃຈງ່າຍ, ເພີ່ມຄວາມແຫຼມຄົມໃນການອະທິບາຍຕອບແກ້ບັນຫາຕ່າງໆ ທີ່ສັງຄົມມີຄວາມສົນໃຈ ເປັນຫ່ວງເປັນໃຍ ໃຫ້ທ່ວງທັນກັບສະພາບການ, ສະພາບການທີ່ພົ້ນເດັ່ນ ແລະ ຫາງສຽງສັງຄົມ ທີ່ເກັບກໍາສັງລວມມາໄດ້ນັ້ນ ຕ້ອງໄດ້ຮັບການຄົ້ນຄວ້າ, ວິເຄາະ, ວິໄຈຢ່າງຈະແຈ້ງ, ຮູ້ຜົນໄດ້, ຜົນເສຍ ເພື່ອສະໜອງຂໍ້ມູນຂ່າວສານໃຫ້ການນໍາຂັ້ນຂອງຕົນ ແລະ ຂັ້ນເທິງເປັນບ່ອນອີງໃນການນໍາພາ-ຊີ້ນໍາ ແລະ ພິຈາລະນາແກ້ໄຂບັນຫາໃຫ້ຖືກຕ້ອງ, ສອດຄ່ອງ ແລະ ທັນການ, ຄະນະພັກ, ຄະນະນໍາແຕ່ລະຂັ້ນ ຕ້ອງເປັນເຈົ້າການຊີ້ນໍາການເກັບກໍາສະພາບແນວຄິດ-ຫາງສຽງສັງຄົມ ແລະ ແກ້ໄຂຫາງສຽງສັງຄົມທີ່ຫຍໍ້ທໍ້ໃນຄວາມຮັບຜິດຊອບຂອງຕົນ, ຈັດຕັ້ງການຝຶກອົບຮົມຄວາມຮູ້ພື້ນຖານກ່ຽວກັບວຽກວິຊາສະເພາະໃນການຕິດຕາມ, ເກັບກໍາສະພາບແນວຄິດ-ຫາງສຽງສັງຄົມ ໃຫ້ຄະນະຮັບຜິດຊອບວຽກງານສ່ອງແສງຂ່າວ, ສ້າງເງື່ອນໄຂໃນການແລກປ່ຽນ ແລະ ຖອດຖອນບົດຮຽນນໍາໜ່ວຍງານວິຊາສະເພາະທີ່ກ່ຽວຂ້ອງ ຢູ່ທັງພາຍໃນ ແລະ ຕ່າງປະເທດ.
ທ່ານກ່າວຕື່ມວ່າ: ວຽກງານລະອຽດຂອງກອງປະຊຸມສ່ອງແສງຂ່າວຂັ້ນສູນກາງຕ້ອງຍົກສູງຄຸນນະພາບຂອງວຽກງານກອງປະຊຸມສ່ອງແສງຂ່າວ ທັງເປັນການຕິດຕາມ, ເກັບກໍາ ແລະ ຕອບຕ້ານບັນດາຫາງສຽງສັງຄົມທີ່ສັງຄົມຕັ້ງຂຶ້ນ ແລະ ປະກົດການຫຍໍ້ທໍ້ຕ່າງໆ ໃຫ້ມີຄວາມວ່ອງໄວ, ຊັດເຈນ. ສະນັ້ນ ການດໍາເນີນກອງປະຊຸມໃນຕໍ່ໜ້າ ໂດຍສະເພາະບາງໄລຍະທີ່ເຫັນວ່າມີຄວາມຈໍາເປັນ ຄວນຈັດເປັນຫົວຂໍ້ສະເພາະໂດຍອີງໃສ່ສະພາບ ແລະ ເງື່ອນໄຂຕົວຈິງຂອງແຕ່ລະໄລຍະ ໂດຍມອບໃຫ້ແຕ່ລະພາກສ່ວນມີຄໍາເຫັນ, ສ່ວນວ່າວຽກວິຊາສະເພາະຂອງແຕ່ລະພາກສ່ວນແມ່ນລາຍງານເປັນລາຍລັກອັກສອນ ໃຫ້ກອງເລຂາກອງປະຊຸມ ຫຼື ມີບັນຫາທີ່ຮີບດ່ວນແມ່ນໃຫ້ປະສານສົມທົບກັບຄະນະໂຄສະນາອົບຮົມສູນກາງພັກ ເພື່ອເປັນໃຈກາງປະສານສົມທົບກັບພາກສ່ວນກ່ຽວຂ້ອງຕິດຕາມ, ເກັບກໍາຂໍ້ມູນຕົວຈິງ ແລະ ຊອກວິທີທາງແກ້ໄຂ ແຕ່ຖ້າບໍ່ມີມູນຄວາມຈິງ ກໍສະເໜີແກ້ຂ່າວຢ່າງທັນການ ແລະ ເພື່ອເຮັດໃຫ້ການດໍາເນີນວຽກງານສ່ອງແສງຂ່າວ ມີປະສິດທິພາບ ແລະ ມີປະສິດທິຜົນ, ສາມາດເປັນເສນາທິການໃຫ້ແກ່ຄະນະພັກຂັ້ນຕ່າງໆ ໃນການຕິດຕາມ, ເກັບກໍາສະພາບແນວຄິດ-ຫາງສຽງສັງຄົມ, ປະກົດການຫຍໍ້ທໍ້ຕ່າງໆທີ່ເກີດຂຶ້ນໃນສັງຄົມ, ນັບທັງຖ້ອຍທໍານອງບິດເບືອນໃສ່ຮ້າຍປ້າຍສີຕໍ່ການນໍາພາຂອງພັກ, ການຄຸ້ມຄອງຂອງລັດ ໄດ້ຢ່າງຖືກຕ້ອງ, ຄົບຖ້ວນ, ຊັດເຈນ ແລະ ກວມລວມທຸກເປົ້າໝາຍຈຶ່ງສະເໜີເພີ່ມພາກສ່ວນທີ່ກ່ຽວຂ້ອງ ແລະ ຈໍາເປັນຈໍານວນໜຶ່ງເຂົ້າຮ່ວມກອງປະຊຸມຄື: ກະຊວງຍຸຕິທໍາ, ກະຊວງແຜນການ ແລະ ການລົງທຶນ, ກະຊວງພາຍໃນ ແລະ ທະນາຄານແຫ່ງ ສປປ ລາວ ແລະ ບັນດາຂະແໜງການຢູ່ຂັ້ນສູນກາງ ແລະ ທ້ອງຖິ່ນ ຈະຕ້ອງໄດ້ຈັດຕັ້ງຜູ້ຊີ້ນໍາ, ຜູ້ປະສານງານ ແລະ ຜູ້ຮັບຜິດຊອບຕົວຈິງ ບົນພື້ນຖານເນື້ອໃນຈິດໃຈຄໍາສັ່ງ ເລກທີ 04/ຄລສພ, ຄໍາແນະນໍາເລກທີ 08/ ຄອສພ ແລະ ຂໍ້ກໍານົດ 133/ຄອສພ, ຂະແໜງການທີ່ກ່ຽວຂ້ອງຕ້ອງເປັນເຈົ້າການສ້າງແຜນການເຄື່ອນໄຫວ, ປະກອບງົບປະມານທີ່ຈໍາເປັນຈໍານວນໜຶ່ງເພື່ອຮັບປະກັນໃຫ້ແກ່ການເຄື່ອນໄຫວວຽກງານຢ່າງມີປະສິດທິພາບ, ຕິດແທດເຫດການ ແລະ ເປົ້າ ໝາຍຕົວຈິງ, ໃນນັ້ນເພື່ອຮັບປະກັນໃຫ້ແກ່ການເຄື່ອນໄຫວໃຫ້ມີລັກສະນະຍຸດທະສາດຍາວນານ ໃນຕໍ່ໜ້າຈະໄດ້ກະກຽມສ້າງ ແລະ ປັບປຸງນິຕິກໍາຈໍານວນໜຶ່ງທີ່ມີຄວາມຈໍາເປັນໃຫ້ໄດ້ຜ່ານ ແລະ ຮັບຮອງຈາກ ການຈັດຕັ້ງຂັ້ນເທິງເປັນຕົ້ນແມ່ນ: ຂໍ້ກໍານົດ, ຂໍ້ຕົກລົງ ແລະ ເອກະສານທີ່ກ່ຽວຂ້ອງອື່ນໆເພື່ອເປັນບ່ອນອີງ ໃນການເຄື່ອນໄຫວຂອງຄະນະຮັບຜິດຊອບສ່ອງແສງຂ່າວຂັ້ນສູນກາງ.
ໂດຍ: ສຳນານ ພົມພັກດີ
