ຂ່າວສານຊີອາໄອລາຍງານ ເມື່ອທ້າຍອາທິດຜ່ານມາ, ງານຕະຫຼາດນັດສິນຄ້າຂາເຂົ້າ-ຂາອອກຈີນຄັ້ງທີ 133 ຜ່ານທາງອັອຟລາຍ (Offline) ໄດ້ປິດລົງຢູ່ນະຄອນກວາງໂຈວ, ສ່ວນເວທີທາງອອນລາຍ (Online) ຈະສືບຕໍ່ດຳເນີນທຸລະກິດເປັນປົກກະຕິ. ງານຕະຫຼາດນັດສິນຄ້າຂາເຂົ້າ-ຂາອອກຈີນຄັ້ງນີ້ມີເນື້ອທີ່ວາງສະແດງທັງໝົດ 1.500.000 ຕາແມັດ, ມີວິສາຫະກິດເຂົ້າຮ່ວມວາງສະແດງຜ່ານທາງອັອຟລາຍເຖິງ 35.000 ແຫ່ງ, ມີຄົນເຂົ້າຊົມໃນສູນວາງສະແດງເຖິງ 2.900.000 ເທື່ອຄົນ ໄດ້ສ້າງສະຖິຕິໃໝ່ເປັນປະຫວັດສາດ. ງານຕະຫຼາດນັດສິນຄ້າຂາເຂົ້າ-ຂາອອກຈີນຄັ້ງນີ້ໄດ້ດຶງດູດນັກທຸລະກິດຕ່າງປະເທດທີ່ມາຈາກ 220 ກວ່າປະເທດ ແລະ ເຂດແຄ້ວນເຂົ້າຮ່ວມງານວາງສະແດງຜ່ານທາງອອນລາຍ ແລະ ອັອຟລາຍ. ໃນນັ້ນ, ມີນັກທຸລະກິດຕ່າງປະເທດທີ່ໄດ້ເຂົ້າຮ່ວມວາງສະແດງຜ່ານທາງອັອຟລາຍເກືອບ 130.000 ຄົນ ຊຶ່ງໃນນັ້ນມີນັກທຸລະກິດທີ່ມາຈາກປະເທດຕ່າງໆຢູ່ລຽບຕາມ “ໜຶ່ງແລວໜຶ່ງເສັ້ນທາງ” ກວມເອົາເກືອບເຄິ່ງໜຶ່ງ. ງານຕະຫຼາດນັດສິນຄ້າຂາເຂົ້າ-ຂາອອກຈີນ ຄັ້ງທີ 133 ໄດ້ບັນລຸມູນຄ່າການຄ້າຂາອອກເຖິງ 21,69 ຕື້ໂດລາ ຜ່ານທາງອັອຟລາຍ. ເຂດວາງສະແດງອຸດສາຫະກຳແບບອັດຕະໂນມັດ ແລະ ການຜະລິດແບບອັດສະລິຍະ, ລົດພະລັງງານໃໝ່ ແລະ ລົດອັດສະລິຍະ, ຊີວິດການເປັນຢູ່ແບບປັນຍາປະດິດ ແລະ ເຂດວາງສະແດງເນື້ອໃນໃໝ່ອື່ນໆມີຄວາມຟົດຟື້ນຫຼາຍ, ຜະລິດຕະພັນການປະດິດສ້າງໃໝ່ ແລະ ຜະລິດຕະພັນສີຂຽວກາກບອນຕ່ຳໄດ້ຮັບຄວາມສົນໃຈຫຼາຍ.
