ຕາມຂ່າວຈາກວໍຊີງຕັນ, ທ່ານ ອາເຈຍ ບັງກາ (Ajay Banga) ຊາວອາເມລິກາເຊື້ອສາຍອິນເດຍ ຈະເປັນປະທານທະນາຄານໂລກຄົນໃໝ່ ພ້ອມແກ້ໄຂບັນຫາທ້າທາຍດ້ານການພັດທະນາ ຫລັງຈາກຄະນະກຳມະການບໍລິຫານທະນາຄານ ໄດ້ລົງມະຕິ ເປັນເອກະພາບກັນໃຫ້ດຳລົງຕຳແໜ່ງດັ່ງກ່າວ ໃນໄລຍະ ເວລາ 5 ປີ ແລະ ຈະເລີ່ມຈັດຕັ້ງປະຕິບັດໜ້າທີ່ຢ່າງເປັນທາງການ ໃນວັນທີ 2 ມິຖຸນານີ້ ເປັນຕົ້ນໄປ ໂດຍຮັບ ໜ້າທີ່ ຕໍ່ຈາກທ່ານ ເດວິດ ມໍລພາສ (David Malpass) ໄດ້ປະກາດ ລາອອກ ກ່ອນກຳນົດ. ໃນໂອກາດນີ້ ທ່ານ ໂຈ ໄບເດນ(Joe Biden),ປະທານາທິບໍດີ ສ.ອາເມລິກາ ໄດ້ຖະແຫລງວ່າ: ທ່ານ ບັງກາ ຈະຊ່ວຍ ຊຸກຍູ້ ທະນາຄານໂລກ ໃຫ້ມີບົດ ບາດ ແກ້ໄຂບັນຫາ ທ້າທາຍຕ່າງໆ ຂອງໂລກ ທີ່ສົ່ງຜົນກະທົບ ໂດຍກົງກັບ ພາລະກິດຫລັກ ຂອງທະນາຄານ ໃນການຊ່ວຍ ຫລຸດຜ່ອນ ບັນຫາ ຄວາມທຸກຍາກ ຊຶ່ງສິ່ງທ້າທາຍນີ້ ລວມເຖິງ ການປ່ຽນແປງ ດິນຟ້າ ອາກາດ ແລະ ການແກ້ໄຂ ບັນຫາ ເລື່ອງເງິນທຶນ ສຳລັບ ການແກ້ໄຂ ບັນຫາ ຂອງໂລກ./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
