ພິທີມອບ-ຮັບ ແລະ ເປີດການນຳໃຊ້ເສັ້ນທາງຄອນກຣີດ ພາຍໃຕ້ໂຄງການສຳຫຼວດ-ທົດລອງນຳໃຊ້ຜະລິດຕະພັນຄອນກຣີດສຳເລັດຮູບ ສຳລັບການກໍ່ສ້າງເສັ້ນທາງເພື່ອສົ່ງເສີມການນຳໃຊ້ ແລະ ດຳເນີນທຸລະກິດຂອງພາກເອກະຊົນແບບຍືນຍົງໄດ້ຈັດຂຶ້ນໃນວັນທີ 30 ມີນາ ນີ້ ທີ່ສະໜາມກໍ່ສ້າງເຂດບ້ານດົງໂດກ ເມືອງໄຊທານີ ນະຄອນຫຼວງວຽງຈັນ ໂດຍການເປັນກຽດເຂົ້າຮ່ວມ ແລະ ເປີດນໍາໃຊ້ຂອງທ່ານນາງ ວິໄລຄຳ ໂພສາລາດ ຮອງລັດຖະມົນຕີ ກະຊວງໂຍທາທິການ ແລະ ຂົນສົ່ງ (ຍທຂ), ມີທ່ານ ໂຄງາ ໂທຊິມິຈິ ( KOGA TOSHIMICHI ) ເລຂາເອກ ສະຖານທູດຍີ່ປຸ່ນ ປະຈຳລາວ, ທ່ານ ພູໂຂງ ບັນນະວົງ ຮອງເຈົ້າຄອງ ນະຄອນຫຼວງວຽງຈັນ (ນວ), ທ່ານ ໂນຣິຢູກິ ອີໂຕະ ( Noriyuki ITO) ຮອງຫົວໜ້າຫ້ອງການອົງການໄຈກາ (Jica) ປະຈຳລາວ, ບັນດາແຂກຖືກເຊີນ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ສິລິພອນ ອິນທິລາດ ຫົວໜ້າສະຖາບັນ ຍທຂ ໄດ້ລາຍງານຫຍໍ້ກ່ຽວກັບຄວາມເປັນມາຂອງໂຄງການດັ່ງກ່າວວ່າ: ໃນໄລຍະຜ່ານມາ ລັດຖະບານລາວໄດ້ສຸມໃສ່ການພັດທະນາດ້ານໂຄງລ່າງພື້ນຖານເປັນຈຳນວນຫຼວງຫຼາຍ, ໂດຍສະເພາະແມ່ນການກໍ່ສ້າງເສັ້ນທາງໃນທົ່ວປະເທດ. ເວົ້າລວມ, ເວົ້າສະເພາະແມ່ນຢູ່ໃນ ນວ ຊຶ່ງເປັນສູນກາງຂອງການພັດທະນາເສດຖະກິດ-ສັງຄົມ ຕິດພັນກັບການເຕີບໂຕຢ່າງຕໍ່ເນື່ອງທາງດ້ານເສດຖະກິດ ຊຶ່ງສົ່ງຜົນໃຫ້ ນວ ໄດ້ຮັບການພັດທະນາຫັນເປັນຕົວເມືອງທີ່ທັນສະໄໝເປັນກ້າວໆ; ຄຽງຄູ່ກັບການເຕີບໂຕດັ່ງກ່າວ, ການຂະຫຍາຍ ແລະ ປັບປຸງເສັ້ນທາງຍັງບໍ່ທັນຕອບສະໜອງໄດ້ຕໍ່ຄວາມຮຽກຮ້ອງຕ້ອງການໃນການພັດທະນາດ້ານໂຄງລ່າງພື້ນຖານ, ເປັນຕົ້ນໃນລະດູຝົນມັກເກີດມີນ້ຳຖ້ວມໃນບາງພື້ນທີ່ໃນ ນວ ຊຶ່ງມີສາເຫດມາຈາກລະບົບລະບາຍນ້ຳບໍ່ທັນໄດ້ຮັບການປັບປຸງເທົ່າທີ່ຄວນ, ການບູລະນະ ການບຳລຸງຮັກສາຍັງບໍ່ທັນເປັນປົກກະຕິ. ອີກດ້ານໜຶ່ງລະບົບໂຄງສ້າງ ລະບົບລະບາຍນ້ຳໃນຕົວເມືອງສ່ວນຫຼາຍເປັນທໍ່ກົມເຮັດໃຫ້ມີຄວາມຫຍຸ້ງຍາກໃນການບໍາລຸງຮັກສາ, ການອະນາໄມ ແລະ ການປ່ຽນຖ່າຍ, ເປັນສາເຫດໃຫ້ການລະບາຍນ້ຳຝົນ ແລະ ນ້ຳເປື້ອນຈາກຄົວເຮືອນຈຶ່ງມັກເກີດມີການອຸດຕັນພ້ອມທັງລະບາຍນໍ້າບໍ່ໄດ້ດີເທົ່າທີ່ຄວນ. ດັ່ງນັ້ນການນຳໃຊ້ຜະລິດຕະພັນຄອນກຣີດສຳເລັດຮູບທີ່ເປັນຮູບສີ່ລ່ຽມ, ເສີມເຫຼັກທີ່ຫຼໍ່ສຳເລັດມາຈາກໂຮງງານໂດຍມີການຄວບຄຸມຄຸນນະພາບ, ທາງດ້ານຄວາມແຂງແກ່ນທົນທານ ແລະ ມີຄວາມໜາສະໝໍ່າສະເໝີ, ມີຝາປິດທີ່ແຂງແຮງ, ນຳໃຊ້ເຂົ້າໃນການກໍ່ສ້າງຮ່ອງລະບາຍນໍ້າແຄມທາງ ຊຶ່ງເຫັນວ່າເປັນອີກທາງເລືອກໜຶ່ງທີ່ມີຄວາມເໝາະສົມກັບສະພາບພື້ນທີ່ ແລະ ສະພາບເສດຖະກິດ-ສັງຄົມຢູ່ລາວ.
ທ່ານກ່າວຕື່ມອີກວ່າ: ການນຳໃຊ້ຄອນກຣີດສຳເລັດຮູບ ໂດຍສະເພາະແມ່ນຮ່ອງສຳເລັດຮູບນີ້ແມ່ນມີຂໍ້ດີຫຼາຍຢ່າງເຊັ່ນ: ຫຼຸດຜ່ອນຄ່າໃຊ້ຈ່າຍໃນການກໍ່ສ້າງ, ໄລຍະເວລາການກໍ່ສ້າງສັ້ນລົງ, ຕິດຕັ້ງງ່າຍມີຄວາມທົນທານດີ, ມີຄວາມສະດວກໃນການບໍາລຸງຮັກສາອະນາໄມຮ່ອງລະບາຍນໍ້າ ແລະ ເຫັນໄດ້ຄວາມສຳຄັນຂອງວຽກງານດັ່ງກ່າວທາງສະຖາບັນ ຍທຂ, ພະແນກ ຍທຂ ນວ ຈຶ່ງໄດ້ມີການຮ່ວມມືທາງດ້ານວິຊາການກັບບໍລິສັດຊັງໂກ້ ເພື່ອແລກປ່ຽນບົດຮຽນນຳກັນໃນໄລຍະຜ່ານມາ ຊຶ່ງໂຄງການດັ່ງກ່າວນີ້ແມ່ນໄດ້ເລີ່ມລົງມືກໍ່ສ້າງໃນວັນທີ 16 ພະຈິກປີ 2022 ແລະ ໄດ້ກໍ່ສ້າງສຳເລັດໃນເດືອນມີນາປີ 2023 ຊຶ່ງນໍາໃຊ້ໄລຍະເວລາໃນການກໍ່ສ້າງທັງໝົດ 4 ເດືອນ. ໃນນັ້ນການກໍ່ສ້າງໂຄງການດັ່ງກ່າວມີດັ່ງນີ້: ຕິດຕັ້ງຮ່ອງລະບາຍນໍ້າຂ້າງທາງທີ່ມີຝາປິດຂະໜາດຄວາມກວ້າງຂອງຮ່ອງ 30 ຊັງຕີແມັດ, ມີຄວາມຍາວ 408 ແມັດ, ຕິດຕັ້ງຮ່ອງລະບາຍນໍ້າທີ່ມີຝາປິດຂະໜາດຄວາມກວ້າງຂອງຮ່ອງ 80 ຊັງຕີແມັດ, ມີຄວາມຍາວຍາວ 460 ແມັດ, ຕິດຕັ້ງແມນໂຮນເພື່ອອະນາໄມຮ່ອງ 6 ຈຸດ, ຕິດຕັ້ງທໍ່ກົມຂະໜາດ 80 ຊັງຕີແມັດ ເພື່ອສົ່ງນໍ້າຍາວ 76 ແມັດ, ກໍ່ສ້າງຊັ້ນພື້ນທາງໜາ 15 ຊັງຕີແມັດ ເພື່ອຮອງພື້ນຊັ້ນເບຕົງ, ກໍ່ສ້າງທາງເບຕົງເສີມເຫຼັກໜາ 20 ຊັງຕີແມັດ, ກວ້າງ 7 ແມັດ, ຍາວ 7 ແມັດ ແລະ ຍາວ 461 ແມັດ. ລວມມູນຄ່າການກໍ່ສ້າງທັງໝົດປະມານ 6 ແສນກວ່າໂດລາ. ໂດຍການສະໜັບສະໜູນຊ່ວຍເຫຼືອຈາກລັດຖະບານຍີ່ປຸ່ນ. ເສັ້ນທາງດັ່ງກ່າວຍັງເປັນສັນ ຍາລັກແຫ່ງມິດຕະພາບ ແລະ ການຮ່ວມມືລະຫວ່າງ ສປປ ລາວ ແລະ ຍີ່ປຸ່ນ.
ທ່ານນາງ ວິໄລຄຳ ໂພສາລາດ ຍັງໄດ້ຕາງໜ້າໃຫ້ລັດຖະບານລາວ, ປະຊາຊົນຂອບໃຈມາຍັງລັດຖະບານຍີ່ປຸ່ນ ທີ່ໃຫ້ການຊ່ວຍເຫຼືອກໍ່ສ້າງເສັ້ນທາງເຂດດັ່ງກ່າວໃຫ້ມີຄວາມສວຍງາມ, ເຮັດໃຫ້ຜູ້ນຳໃຊ້ລົດ-ໃຊ້ຖະໜົນ ເດີນທາງໄປ-ມາສະດວກສະບາຍຂຶ້ນ ເພື່ອໃຫ້ການນໍາໃຊ້ໂຄງການກໍ່ສ້າງເສັ້ນທາງດັ່ງກ່າວໃຫ້ມີການຄຸ້ມຄອງ, ປົກປັກຮັກສາ, ນໍາໃຊ້ໄດ້ຍາວນານ ແລະ ມີປະສິດທິຜົນສູງສຸດໂດຍມອບໃຫ້ອົງການປົກຄອງ ນ.ວ ເປັນຜູ້ຄຸ້ມຄອງປົກປັກຮັກສາ ແລະ ນຳໃຊ້ຕໍ່ໄປ.
(ຂ່າວ-ພາບ: ວັນເພັງ+ ພູວັນ )
