ຂ່າວຕ່າງປະເທດລາຍງານ ເມື່ອບໍ່ດົນມານີ້, ອົງການອະນາໄມໂລກ (WHO) ໄດ້ເພີ່ມຄຳແນະນຳສຳລັບການສັກວັກຊິນປ້ອງກັນພະຍາດໂຄວິດ-19 ໂດຍລະບຸວ່າ ເດັກນ້ອຍ ແລະ ໄວໜຸ່ມທີ່ມີສຸຂະພາບແຂງແຮງອາດຈະບໍ່ຈຳເປັນຕ້ອງໄດ້ສັກວັກຊິນ ແຕ່ຜູ້ສູງອາຍຸ ແລະ ກຸ່ມສ່ຽງສູງ ຄວນໄດ້ຮັບການສັກວັກຊິນເຂັມກະຕຸ້ນພາຍໃນເວລາ 6-12 ເດືອນ ຫຼັງຈາກການສັກວັກຊິນເຂັມຫຼ້າສຸດ.
WHO ລະບຸວ່າ ຄໍາແນະນໍາດັ່ງກ່າວມີຈຸດປະສົງ ເພື່ອໃຫ້ຄວາມສໍາຄັນຕໍ່ການສັກວັກຊິນໃຫ້ແກ່ຜູ້ທີ່ມີຄວາມສ່ຽງສູງ ເພື່ອປ້ອງກັນການເຈັບປ່ວຍຢ່າງຮຸນແຮງ ແລະ ການເສຍຊີວິດຈາກພະຍາດໂຄວິດ-19 ເນື່ອງຈາກປະຊາກອນສ່ວນໃຫຍ່ທົ່ວໂລກເລີ່ມມີພູມຄຸ້ມກັນຫຼັງຈາກການປຸກລະດົມສັກວັກຊິນ ແລະ ການແຜ່ລະບາດຂອງພະຍາດກ່ອນໜ້ານີ້. ທັງນີ້, WHO ລະບຸວ່າ ຜູ້ທີ່ຢູ່ໃນກຸ່ມຄວາມສ່ຽງປານກາງ ຖ້າຫາກໄດ້ຮັບການສັກວັກຊິນຄົບໂດສຈຳນວນ 2 ເຂັມ ລວມທັງເຂັມກະຕຸ້ນອີກ 1 ເຂັມ ກໍບໍ່ມີຄວາມຈຳເປັນທີ່ຈະຕ້ອງສັກວັກຊິນເພີ່ມເຕີມ ເນື່ອງຈາກມີປະໂຫຍດພຽງເລັກນ້ອຍເທົ່ານັ້ນ.
