ພິທີມອບ-ຮັບເຮືອຈຳນວນ 1 ລຳ ແລະ ລົດຕູ້ລົງເຄື່ອນໄຫວຮັບບໍລິຈາກເລືອດ 1 ຄັນ ໃຫ້ແກ່ອົງການກາແດງແຂວງໄຊຍະບູລີ ຈັດຂຶ້ນໃນວັນທີ 28 ມີນາ 2023 ຜ່ານມາ, ກ່າວມອບໂດຍ ທ່ານ ພູທອນ ເມືອງປາກ ປະທານອົງການກາແດງແຫ່ງຊາດລາວ ແລະ ກ່າວຮັບໂດຍທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ, ມີບັນດາເຈົ້າເມືອງ, ຮອງເຈົ້າເມືອງ, ຫົວໜ້າຫ້ອງການ, ຫົວໜ້າພະແນກ, ຮອງພະແນກ, ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມ.
ເຮືອທີ່ມອບ-ຮັບໃນຄັ້ງນີ້, ເປັນເຮືອຜະລິດຈາກໂລຫະແບບຕິດຕັ້ງເຄື່ອງຈັກ, ລວງຍາວ ຕາມມາດຕະ ຖານ, ເຊິ່ງໄລຍະຜ່ານມາ ແມ່ນເກີດໄພພິບັດ ແລະ ມີຄວາມຈຳເປັນຫລາຍ. ສະນັ້ນ, ສູນອົງການກາແດງແຫ່ງຊາດລາວ ຈຶ່ງໄດ້ແບ່ງປັນໄປນຳໃຊ້ ແລະ ລົດຕູ້ເພື່ອຂົນຂວາຍເຄື່ອນໄຫວວຽກງານບໍລິຈາກເລືອດ ໃຫ້ກາແດງແຂວງໄຊຍະບູລີ ເພື່ອເຮັດການບໍລິຈາກເລືອດບັນລຸໄດ້ຕາມຄວມຕ້ອງການ ໂດຍໄດ້ຮັບການສະໜັບສະໜູນຈາກ ສະພາກາຊາດໄທ ແລະ ກາແດງ ສ ເກົາຫລີ, ການຊ່ວຍເຫລືອເປັນມູນຄ່າ 740 ລ້ານກີບ.
ໂອກາດນີ້, ທ່ານເຈົ້າແຂວງໄຊຍະບູລີ ໄດ້ສະແດງຄວາມຂອບໃຈ ແລະ ຢືນຢັນວ່າຈະເອົາໃຈໃສ່ຊຸກຍູ້ກາແດງແຂວງໄຊຍະບູລີ ໃຫ້ເອົາໃຈໃສ່ຄຸ້ມຄອງປົກປັກຮັກສາເຮືອ ແລະ ລົດ ທີ່ໄດ້ຮັບການຊ່ວຍເຫລືອໃນຄັ້ງນີ້, ໃຫ້ເປັນຊັບສິນລວມ ເພື່ອຈະໄດ້ນໍາມາໃຊ້ຍາມມີວຽກສຸກສີນ ໂດຍສະເພາະໃນເວລາຫາກມີນໍ້າຖ້ວມ ແລະ ການເຄື່ອນ ໄຫວຮັບບໍລິຈາກເລືອດໃຫ້ບັນລຸຕາມຄາດໝາຍທີ່ໄດ້ກຳນົດໄວ້.
