ພະແນກອຸດສາຫະກຳ ແລະ ການຄ້າ ນະຄອນຫລວງວຽງຈັນ ໃນຖານະເປັນຜູ້ຄຸ້ມຄອງວຽກງານລາຄາສິນຄ້າ ແລະ ບໍລິການ ໄດ້ມີການຄົ້ນຄວ້າ ແລະ ປຶກສາຫາລື ພ້ອມອອກແຈ້ງການກ່ຽວກັບການຫ້າມສວຍໂອກາດຂຶ້ນລາຄາສິນຄ້າ ແລະ ການກັກຕຸນສິນຄ້າ ລວມໄປເຖິງການກະກຽມກະຕ່າຂອງຕ້ອນຂອງຝາກ, ຂອງຂວັນ ທີ່ໝົດອາຍຸ ແລະ ເສື່ອມຄຸນນະພາບ ອອກມາຂາຍ ແລະ ວາງຈຳໜ່າຍໃນໄລຍະບຸນປີໃໝ່ລາວ ພສ 2566 ທີ່ຈະມາເຖິງ; ທັງນີ້ເປັນການກຽມພ້ອມ ຮັບມືກັບວິກິດການ ທີ່ອາດສົ່ງຜົນກະທົບແກ່ຜູ້ບໍລິໂພກ. ແນະນຳໃຫ້ຜູ້ປະກອບການ ນຳເອົາສິນຄ້າດີ ມີຄຸນນະພາບ ມາວາງສະແດງ ຫລື ຂາຍໃຫ້ເປັນປົກກະຕິ, ຫ້າມບໍ່ໃຫ້ນຳເອົາສິນຄ້າທີ່ຫມົດອາຍຸ ແລະ ເສຍຄຸນ, ພ້ອມທັງຂາຍຕາມລາຄາທີ່ລັດກຳນົດ ໂດຍສະ ເພາະປະເພດສິນຄ້າຄວບຄຸມ ເປັນຕົ້ນ ຊີ້ນໝູ, ໄກ່, ຊີ້ນງົວ ແລະ ເຂົ້າ.
ທ່ານ ນັນຕາ ສານຸວົງ ຫົວຫນ້າພະແນກອຸດສາຫະກຳ ແລະ ການຄ້າ ນະຄອນຫລວງວວຽງຈັນ ໃຫ້ສຳພາດຕໍ່ສື່ມວນຊົນ ເມື່ອບໍ່ດົນມານີ້ ວ່າ: ມາດຕະການດັ່ງກ່າວ ແມ່ນພວກເຮົາເຄີຍປະຕິບັດກັນມາ ໃນແຕ່ລະປີ ເຊິ່ງໄດ້ແຈ້ງເຖິງບັນດາຜູ້ປະກອບການ, ຊາວຄ້າຂາຍທົ່ວໄປ ແລະ ບັນດາຫ້ອງການອຸດສາຫະກໍາ ແລະ ການຄ້າ 9 ຕົວເມືອງ ທົ່ວນະ ຄອນຫລວງວຽງຈັນ ໃຫ້ຮັບຮູ້ ແລະ ພ້ອມກັນຈັດຕັ້ງປະຕິ ບັດ. ນອກຈາກນີ້, ເພື່ອເຮັດໃຫ້ແຈ້ງການດັ່ງກ່າວ ມີຜໄນສັກສິດ ພວກເຮົາກໍໄດ້ແຕ່ງຕັ້ງເຈົ້າໜ້າທີ່ກວດກາການຄ້າ ໂດຍສົມທົບກັບເມືອງ ແລະ ຜູ້ຈັດສັນຕະຫລາດ ລົງຕິດບັນດາຕະຫລາດເມືອງໃນ ຂອງນະຄອນຫລວງວຽງຈັນ ເພື່ອກວດກາລາຄາສິນຄ້າ ຖ້າພົບເຫັນມີການກັກຕຸນ ຫລື ຂຶ້ນລາຄາ ແມ່ນຈະຖືກປັບໄໝຕາມລະບຽບກົດໝາຍ. ພ້ອມກັນນີ້. ທາງພະແນກອຸດສາຫະກຳ ແລະ ການຄ້າ ໄດ້ເຊີນເອົາຜູ້ປະກອບການຕະຫລາດ 12 ແຫ່ງເຂົ້າມາເຮັດບົດບັນທຶກ ເພື່ອຄ້ຳປະກັນທາງດ້ານການຕອບສະໜອງສິນຄ້າເຂົ້າຕະຫລາດ ເຮັດແນວໃດບໍ່ໃຫ້ສິນຄ້າຂາດຕະ ຫລາດ ໃນໄລຍະບຸນປີໃໝ່ລາວ ໂດຍສະເພາະ ແຕ່ວັນທີ 14-20 ເມສາ ນີ້, ໄດ້ມີບັນທຶກກັບຊາວຄ້າຂາຍ ໂດຍສະ ເພາະ ຊາວຄ້າຂາຍຊີ້ນ, ປາ ໃຫ້ມີການຜັດປ່ຽນ ຫລື ໝູນ ວຽນກັນໃຫ້ມີສິນຄ້າເຂົ້າມາຂາຍ ຢູ່ພາຍໃນຕະຫລາດຕະ ຫລອດເວລາ. ເພາະໃນໄລຍະຜ່ານມາເຮົາໄດ້ມີບົດຮຽນ ໃກ້ຮອດປີໃໝ່ລາວ ຕອນແລງ ສິນຄ້າບໍ່ມີຂາຍຢູ່ຕະຫລາດ.
ສຳລັບຊີ້ນໝູແຊ່ແຂງ ທີ່ນຳເຂົ້າຈາກຕ່າງປະເທດ ຜ່ານມາ ພວກເຮົາກໍໄດ້ມີແຈ້ງການ ຂອງກະຊວງກະສິກຳ ແລະ ປ່າໄມ້ ໃນການຫ້າມນຳເຂົ້າສິ້ນສ່ວນ ເປັດ, ໄກ່ ຫລື ຊີ້ນແຊ່ແຂງຈາກຕ່າງປະເທດ, ພ້ອມທັງມີການຕິດຕາມກວດກາຢູ່ໃນຕະຫລາດ ແລະ ບັນດາຫ້າງຮ້ານຕ່າງໆ ຖ້າພົບເຫັນຢູ່ບ່ອນໃດຂາຍກໍຈະມີການຢຶດ ສິນຄ້າດັ່ງກ່າວທັນທີ ພ້ອມກັບປັບໄໝຕາມລະບຽບກົດໝາຍ. ສະເພາະຢູ່ດ່ານແມ່ນພາກສ່ວນກະສິກຳ ແລະ ປ່າໄມ້ ແລະ ພາສີເປັນຜູ້ກວດກາການນຳເຂົ້າສິນຄ້າ, ແຕ່ກໍບໍ່ປາສະຈາກໄດ້ ເຊິ່ງໄລຍະຜ່ານມາ ຍັງການລັກລອບນຳເຂົ້າ ຊີ້ນປະເພດແຊ່ແຂງມາຂາຍຢູ່ຕະຫລາດ. ຫາກຜູ້ບໍລິໂພກພົບເຫັນຢ່ສະຖານທີ່ໃດກໍຕາມ ໃຫ້ລາຍງານ ຫລື ແຈ້ງຕໍ່ເຈົ້າໜ້າທີ່ພວກເຮົາ. ເນື່ອງຈາກວ່າຊີ້ນທີ່ລັກລອບນຳເຂົ້າ ເປັນຊີ້ນທີ່ບໍ່ມີຄຸນນະພາບ, ຊີ້ນເສຍຄຸນ, ບາງປະເທດມີພະຍາດອະຫິວາໝູລະບາດ ຖ້າຊື້ມາບໍ ລິໂພກ ກໍຈະຕິດພະຍາດນັ້ນໄດ້. ນອກຈາກນີ້ ພວກເຮົາກໍໄດ້ແຈ້ງໃຫ້ບັນດາປ້ຳນ້ຳມັນ ບໍ່ໃຫ້ປິດບໍລິການ ໃນໄລຍະປີໃໝ່, ໃຫ້ສົມທົບກັນເປີດພາກເຊົ້າ ແລະ ເປີດພາກແລງໂດຍໃຫ້ແຈ້ງ ຫລື ຕິດປະກາດຢູ່ໃນປ້ຳຂອງຕົນ ເພື່ອໃຫ້ມວນຊົນຮັບຮູ້. ຫ້າມບໍ່ໃຫ້ປິດພ້ອມກັນ ເຊິ່ງມັນຈະສ້າງຜົນອັບປະໂຫຍດໃຫ້ແກ່ຜູ້ຊົມໃຊ້.
