ໃນໄລຍະການສະເຫລີມສະຫລອງສົ່ງທ້າຍປີເກົ່າ-ຕ້ອນຮັບ ປີໃໝ່ລາວ ພສ 2566 ທີ່ຈະມາເຖິງນີ້, ກົມຕຳຫລວດຈະລາຈອນ ກະຊວງປ້ອງກັນຄວາມສະຫງົບ ໄດ້ອອກແຈ້ງການ ເຖິງພໍ່ແມ່ ປະຊາຊົນ, ພະນັກງານ, ທະຫານ, ຕ່ຳຫລວດ ແລະ ຜູ້ໃຊ້ລົດ, ໃຊ້ຖະໜົນ ໃນຂອບເຂດທົ່ວປະເທດ ໃຫ້ເປັນເຈົ້າການ ປະຕິບັດຕາມກົດລະບຽບຈະລາຈອນ ຢ່າງເຂັ່ງຂັດ ເພື່ອຫລີກລ້ຽງການເກີດອຸປະຕິເຫດ ຕາມທ້ອງຖະໜົນ ທີ່ອາດຈະພາໃຫ້ເກີດຜົນເສຍຫາຍທາງດ້ານຊີວິດ ແລະ ຊັບສິນ, ພ້ອມທັງໃຫ້ມີຄວາມສະຫງົບ, ເປັນລະບຽບຮຽບຮ້ອຍ ແລະ ປອດໄພໃນການສັນຈອນ, ເຮັດໃຫ້ການສະເຫລີມ ສະຫລອງປີໃໝ່ລາວ ມີຄວາມເບີກບານມ່ວນຊື່ນ ແລະ ຖືກຕ້ອງຕາມຮີດຄອງປະເພນີອັນດີງາມຂອງຊາດລາວ.
ໃນແຈ້ງການດັ່ງກ່າວ ໄດ້ລະບຸວ່າ: ຜູ້ຂັບຂີ່ລົດຕ້ອງເຄົາລົບ ແລະ ປະຕິບັດຕາມກົດລະບຽບຈະລາຈອນທາງບົກ ຢ່າງເຂັ້ມງວດ ເປັນຕົ້ນ ຜູ້ຂັບຂີ່ລົດຈັກ ຕ້ອງໃສ່ໝວກກັນກະທົບ ທັງຜູ້ຂັບ ແລະ ຜູ້ຊ້ອນທ້າຍ (ຖ້າຫາກລະເມີດຈະໄດ້ສຶກສາອົບຮົມ, ກັກລົດໄວ້ ແລະ ປັບໄໝຕາມລະບຽບການ) ເພື່ອຄວາມປອດໄພຂອງຜູ້ຂັບຂີ່, ສຳລັບ ຜູ້ຂັບຂີ່ລົດໃຫຍ່ ຕ້ອງຮັດສາຍແອວນິລະໄພ ເພື່ອຮັບປະກັນຄວາມປອດໄພ ໃຫ້ແກ່ຜູ້ຂັບຂີ່ ແລະ ຜູ້ໂດຍສານ. ພ້ອມກັນນັ້ນ, ກ່ອນຈະນຳໃຊ້ຍານ ພາຫະນະ ຕ້ອງກວດສະພາບເຕັກນິກ, ຄວາມພ້ອມຂອງຍານພາຫະນະ ໃຫ້ມີຄວາມຮັບປະກັນເປັນຢ່າງດີ, ສ່ວນລົດຂົນສົ່ງໂດຍສານທາງໄກ ຕ້ອງມີໂຊເຟີສຳຮອງທຸກຄັ້ງເວລາເດີນທາງ ແລະ ປະຕິບັດລະບຽບກົດໝາຍ ກ່ຽວກັບການຂົນສົ່ງທາງບົກຢ່າງເຂັ້ມງວດ.
ສະເພາະເສັ້ນທາງດ່ວນນະຄອນຫລວງວຽງຈັນ-ວັງວຽງ, ການໃຊ້ຄວາມໄວສູງສຸດບໍ່ໃຫ້ເກີນ 120 ກິໂລແມັດ/ຊົ່ວໂມງ ແລະ ຄວາມໄວຕໍ່າສຸດບໍ່ໃຫ້ຫລຸດ 80 ກິໂລແມັດ/ຊົ່ວໂມງ (ເຈົ້າໜ້າທີ່ຕໍາຫລວດຈະໄດ້ຈັບຄວາມໄວ). ພ້ອມກັນນີ້, ກໍຫ້າມຜູ້ຂັບຂີ່ດື່ມສິ່ງມືນເມົາ(ເມົາຫ້າມຂັບຂີ່ລົດ) ຢ່າງເດັດຂາດ, ຖ້າຫາກກວດກາພົບເຫັນ ເຈົ້າໜ້າທີ່ຕຳຫລວດຈະລາຈອນ ຈະໄດ້ກັກຜູ້ຂັບຂີ່ໄວ້ ເພື່ອສຶກສາອົບຮົມ, ສວ່າງເມົາແລ້ວຈຶ່ງອະນຸຍາດໃຫ້ໄປ ຫລື ໃຫ້ຍາດພີ່ນ້ອງ, ໝູ່ຄູ່ມາຮັບເອົາ ເພື່ອຮັບປະກັນຄວາມປອດໄພ ພ້ອມດຳເນີນຕາມຂັ້ນຕອນ ຂອງລະບຽບກົດໝາຍ ໃນເວລາຕໍ່ໄປ; ຫ້າມຂັບຂີ່ຍານພາຫະນະ ເກີນຄວາມໄວ ທີ່ກົດໝາຍລະບຽບການ ແລະ ປ້າຍສັນຍານຈະລາຈອນ ກຳນົດໄວ້; ຫ້າມຂີ່ລົດຈັກ ເປັນພຶງເປັນແພ ກີດຂວາງການສັນຈອນ ຕາມເສັ້ນທາງ ຢ່າງເດັດຂາດ; ຫ້າມຜູ້ໂດຍສານ ນັ່ງຂອບກະບະລົດ ຫລື ນັ່ງຝາທ້າຍລົດ ໃນເວລາລົດກຳລັງສັນຈອນ ຢ່າງເດັດ ຂາດ; ຫ້າມນຳໃຊ້ລົດຂົນສົ່ງໂດຍສານ, ບັນທຸກສິນຄ້າ ແລະ ບັນທຸກຄົນໂດຍສານເກີນຈໍານວນ ແລະ ຊ່ວງຊິງເອົາຄົນໂດຍສານ ຢ່າງເດັດຂາດ; ຫ້າມຜູ້ປົກຄອງປະປ່ອຍໃຫ້ເດັກນ້ອຍທີ່ອາຍຸບໍ່ເຖິງກະສຽນ ຂັບຂີ່ຍານພາຫະນະ ຢ່າງເດັດຂາດ; ຫ້າມຈອດລົດໃນເສັ້ນທາງດ່ວນຢ່າງເດັດຂາດ (ຍົກ ເວັ້ນກໍລະນີຍານພາຫະນະເປ່ເພ່); ຖ້າບຸກຄົນໃດຫາກລະເມີດ ຕໍ່ບັນດາຂໍ້ຫ້າມ ດຳລັດວ່າດ້ວຍກົດຈະລາຈອນທາງບົກ ຈະຖືກສຶກສາອົບຮົມ ແລະ ປັບໃໝ ຕາມລະບຽບກົດໝາຍກໍານົດໄວ້ ຢ່າງເຂັ້ມງວດ.
ພ້ອມດຽວກັນນີ້, ກຳລັງຕຳຫລວດຈະລາຈອນແຕ່ລະແຂວງ ຈະຕ້ອງໄດ້ເຮັດໜ້າທີ່ຕິດຕາມກວດກາການສັນຈອນ, ຈັດສັນຄວາມເປັນລະບຽບການສັນຈອນ, ການຍ່າງ ແລະ ການຈອດ ຂອງຍານພາຫະນະ ຢ່າງເຂັ້ມງວດ ຕະຫລອດໄລຍະເວລາສະເຫລີມສະຫລອງ ປີໃໝ່ລາວ ທີ່ຈະມາເຖິງນີ້.
ໃນໄລຍະປີໃໝ່ລາວ ພສ 2565 ທົ່ວປະເທດ ມີອຸບັດເຫດເກີດຂຶ້ນ ທັງໝົດ 312 ລາຍ, ພາຫະນະເປ່ເພ 545 ຄັນ, ຄົນໄດ້ຮັບບາດເຈັບຈຳນວນ 552 ຄົນ, ຄົນເສຍຊີວິດ 35 ຄົນ, ສ້າງຜົນເສຍຫາຍທາງດ້ານສຸຂະພາບ, ຊີວິດ ແລະ ຊັບສິນຢ່າງມະຫາສານ.
ຂ່າວ: ທະນູທອງ
