ວັນທີ 29 ມີນາ 2023 ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ ພ້ອມຄະນະ ໄດ້ລົງຢ້ຽມຢາມ ແລະ ພົບປະໂອ້ລົມປະຊາຊົນບ້ານດອນຊິງຊູ້ ເມືອງສີໂຄດຕະບອງ ນວ ຕ້ອນຮັບຄະນະດັ່ງກ່າວ ໂດຍທ່ານ ທະວີໄຊ ເໝົາຊົມພູ ເຈົ້າເມືອງສີໂຄດຕະບອງ ມີອຳນາດການປົກຄອງບ້ານ ແລະ ປະຊາຊົນພາຍໃນບ້ານເຂົ້າຮ່ວມ.
ທ່ານ ສຸນັນ ເຮືອງປະເສີດ ນາຍບ້ານດອນຊິງຊູ້ ກ່າວວ່າ: ບ້ານດອນຊິງຊູ້ ຕັ້ງຢູ່ໃຈກາງຂອງແມ່ນ້ຳຂອງ ມີເນື້ອທີ່ທັງໝົດ 133,29 ເຮັກຕາ ມີພົນລະເມືອງຈຳນວນ 253 ຄົນ ຍິງ 122 ຄົນ ມີ 56 ຄອບ ຄົວ 57 ຫຼັງຄາເຮືອນ ມີວັດ 1 ແຫ່ງ ໂຮງຮຽນຊັ້ນປະຖົມ 1 ແຫ່ງ (ປ1 ແລະ ປ2) ແລະ ກອງຮ້ອຍຊາຍແດນ ພາຍໃນບ້ານມີ 2 ຊົນເຜົ່າຄື:ຊົນເຜົ່າລາວລຸ່ມ ແລະ ລາວເທິງ ບ້ານດອນຊິງຊູ້ມີເນື້ອທີ່ທຳການຜະລິດປະເພດພືດລົ້ມລຸກທັງໝົດ 64 ເຮັກຕາ ປະຊາ ຊົນ ພາຍໃນບ້ານສ່ວນໃຫຍ່ທຳການຜະລິດກະສິກຳ ແລະ ລ້ຽງສັດເປັນອາຊີບຫຼັກ ປັດຈຸບັນ ປະຊາຊົນພາຍໃນບ້ານໄດ້ຊົມໃຊ້ໄຟຟ້າໝົດທຸກຄອບຄົວ ສ່ວນນ້ຳໃຊ້ປະຈຳວັນແມ່ນຍັງອາໃສ່ນ້ຳຂອງ ແລະ ນ້ຳບາດານ.
ໂອກາດນີ້ ທ່ານ ເຈົ້າຄອງ ນວ ໄດ້ເນັ້ນບາງບັນຫາຄື: ໃຫ້ພໍ່ແມ່ປະຊາຊົນ ເຂົ້າຮ່ວມຢ່າງຕັ້ງໜ້າໃນວຽກງານປ້ອງກັນຊາດ-ປ້ອງກັນຄວາມສະຫງົບ ຕ້ານ ແລະ ສະກັດກັ້ນບັນດາປະກົດການຫຍໍ້ທໍ້ຢູ່ ພາຍໃນບ້ານ ເປັນຕົ້ນບັນຫາຢາເສບຕິດ ອອກແຮງຊ່ວຍກຳລັງຫຼວງ ສົມທົບກັບອົງການປົກຄອງບ້ານ ອອກແຮງຊີ້ນຳ ປກສ ແລະ ກອງຫຼອນ ໃຫ້ຮູ້ຈັກເຄື່ອນໄຫວຕາມພາລະບົດບາດ ໜ້າທີ່ ກວດກາສະລະເວຮ່ວມກັບກອງຮ້ອຍຊາຍແດນທີ່ປະຈຳຢູ່ບ້ານ ເອົາໃຈໃສ່ຄຸ້ມຄອງບຸກຄົນທີ່ຈະລັກລອບເຂົ້າ-ອອກ ຕາມສາຍແດນປະເທດ ລວມທັງເປົ້າໝາຍລັກລອບຂົນສົ່ງສິ່ງທີ່ຜິດກົດໝາຍ ຢາເສບຕິດ ສິນຄ້າລົບຫຼີກພາສີ ແລະ ເປົ້າໝາຍອື່ນໆ ເພື່ອປົກປັກຮັກສາຄວາມສະຫງົບ ຄວາມເປັນລະບຽບຮຽບຮ້ອຍ ມີຄວາມສະຫງົບຕາມຈຸດຫຼໍ່ແຫຼມໃຫ້ເປັນປົກກະຕິ.
ເອົາໃຈໃສ່ຊຸກຍູ້ການຜະລິດຂອງປະຊາຊົນພາຍໃນບ້ານ ພາກັນປູກ-ການລ້ຽງໃຫ້ຫຼາຍ ກາຍເປັນສິນຄ້າ ສຸມໃສ່ແກ້ໄຂຄອບຄົວທຸກຍາກ ແລະ ສູ້ຊົນສ້າງບ້ານດອນຊິງຊູ້ ໃຫ້ເປັນບ້ານພັດທະນາ ແລະ ສ້າງບ້ານພັດທະນາໃຫ້ໄດ້ ໃນປີ 2025 ພ້ອມດຽວກັນ ທ່ານເຈົ້າຄອງ ນວ ພ້ອມຄະນະ ຍັງໄດ້ໄປເບິ່ງຈຸດຫຼໍ່ແຫຼມແຄມຕາຝັງຂອງ ເບິ່ງໂຄງການກໍ່ສ້າງນໍ້າປະປາທີ່ຍັງສ້າງບໍ່ສຳເລັດ ເບິ່ງຢ້ຽມຢາມໂຮງ ຮຽນປະຖົມ ແລະ ເບິ່ງຢ້ຽມຢາມກອງຮ້ອຍຊາຍແດນ.
