ສະຖາບັນຄົ້ນຄວ້າວິທະຍາສາດການສຶກສາ ແລະ ໂຄງການອາຫານທ່ຽງໃນໂຮງຮຽນ ອົງການອາຫານໂລກ ໄດ້ຈັດກອງປະຊຸມເຜີຍແຜ່ບົດລາຍງານການປະເມີນການນໍາໃຊ້ສື່ການຮຽນການສອນກ່ອງສີຂຽວ ຊັ້ນປະຖົມສຶກສາ ເມື່ອບໍ່ດົນມານີ້ ທີ່ຫ້ອງປະຊຸມໂຮງແຮມຄລາວພາຊາ ນະຄອນຫຼວງວຽງຈັນ, ໂດຍໃຫ້ກຽດເປັນປະທານຮ່ວມຂອງ ທ່ານ ອຸທິດ ທິບມະນີ ຮອງຜູ້ອໍານວຍການສະຖາບັນຄົ້ນຄວ້າວິທະຍາສາດການສຶກສາ ແລະ ທ່ານ ຊາມານ ກາລູປາຮານາ ຫົວໜ້າໂຄງການອາຫານທ່ຽງໃນໂຮງຮຽນ ອົງການອາຫານໂລກ, ມີຜູ້ອໍານວຍການສູນ, ຕາງໜ້າຈາກກົມ, ພະແນກ, ຄູ່ຮ່ວມພັດທະນາ ແລະ ຄະນະຮັບຜິດຊອບວຽກງານກ່ຽວຂ້ອງເຂົ້າຮ່ວມ.
ກອງປະຊຸມດັ່ງກ່າວ, ແມ່ນເພື່ອເຜີຍແຜ່ຜົນການປະເມີນນໍາໃຊ້ສື່ການຮຽນການສອນກ່ອງສີຂຽວສໍາລັບ ຊັ້ນປະຖົມສຶກສາ ໃນໂຮງຮຽນເປົ້າໝາຍທົດລອງ ຂອງໂຄງການຈາກ 3 ແຂວງ, 9 ເມືອງ ແລະ 77 ໂຮງຮຽນ ໃນລະຫວ່າງວັນທີ 31 ຕຸລາ ຫາ 11 ພະຈິກ 2022 ຈາກຜົນການວິໄຈພົບວ່າ ຄຳຄິດເຫັນຂອງຜູ້ອຳນວຍການໂຮງຮຽນ, ຄູສອນ ແລະ ຄູຝຶກ ໄດ້ສະແດງຄໍາຄິດເຫັນຕໍ່ບັນດາອົງປະກອບຕ່າງໆຂອງສື່ການຮຽນການສອນໃນກ່ອງສີຂຽວ ຊຶ່ງປະກອບມີ ໂປສະເຕີ, ບັດຮູບພາບ ແລະ ບັດຄຳສັບ, ປຶ້ມເລື່ອງ ແລະ ເກມ ມີຜົນການສໍາຫຼວດຢູ່ລະດັບດີ. ສ່ວນວ່າການຕິດຕາມຊຸກຍູ້ຂອງຄູຝຶກໃຫ້ແກ່ຄູສອນມີ ຜົນການປະເມີນຢູ່ໃນລະດັບປານກາງ ແລະ ການກະຈາຍຂອງຂໍ້ມູນຄໍາຄິດເຫັນຂ້ອນຂ້າງສູງ; ຄວາມເຂົ້າໃຈຂອງຜູ້ອຳນວຍການໂຮງຮຽນ, ຄູສອນ ແລະ ສຶກສານິເທດຕໍ່ກັບສື່ການຮຽນການສອນໃນກ່ອງສີຂຽວ ໂດຍສະເລ່ຍມີຜົນການປະເມີນຢູ່ໃນລະດັບຫຼາຍ; ການນຳໃຊ້ສື່ການຮຽນການສອນໃນກ່ອງສີຂຽວຂອງຄູຈາກການສັງເກດການສອນເຫັນວ່າ ຄູມີການກະກຽມສື່ການຮຽນການສອນ ສໍາລັບກິດຈະກໍາການຮຽນ, ໄດ້ແນະນໍາການໃຊ້ສື່ແກ່ນັກຮຽນກ່ອນເລີ່ມປະຕິບັດກິດຈະກຳ, ນໍາໃຊ້ສື່ເໝາະສົມກັບ ປະເພດຂອງກິດຈະກຳ ແລະ ລະດັບຂອງຜູ້ຮຽນ, ມີຄວາມຄ່ອງແຄ້ວໃນການໃຊ້ສື່, ເຮັດໃຫ້ນັກຮຽນຄວາມສົນໃຈ ຕໍ່ກັບສີທີ່ນຳມາສອນ ແລະ ຄວາມກະຕືລືລົ້ນກັບການປະຕິບັດກິດຈະກຳຜ່ານການນຳໃຊ້ສື່ໃນກອງສີຂຽວ, ຄູມີການນໍາໃຊ້ໃນການປະເມີນະປັບປຸງການຮຽນ ແລະ ແບບກິດຈະກຳ.
ສ່ວນຜົນຂອງການນຳໃຊ້ສື່ການຮຽນການສອນໃນກ່ອງສີຂຽວທີ່ມີຕໍ່ຜົນການຮຽນຂອງນັກຮຽນ ໂດຍສະເພາະສື່ການຮຽນການສອນທີ່ເປັນໂປສະເຕີເຫັນວ່າ ນັກຮຽນຂັ້ນ ປ.1-ປ.5 ໃນໂຮງຮຽນເປົ້າໝາຍທົດລອງ ຂອງໂຄງການໄດ້ນໍາໃຊ້ໂປສະເຕີຫຼາຍກວ່າ 76%, ໃນນີ້ 83,15% ຂອງນັກຮຽນທີ່ໄດ້ນຳໃຊ້ໂປສະເຕີເຂົ້າ ໃນການຮຽນບອກວ່າ ໂປສະເຕີແມ່ນເປັນໜ້າສົນໃຈ ແລະ ໂປສະເຕີຊ່ວຍໃຫ້ນັກຮຽນເຂົ້າໃຈບົດຮຽນທີ່ ກ່ຽວຂ້ອງໄດ້ຫຼາຍກວ່າ 80%; ສື່ການຮຽນການສອນທີ່ເປັນບັດຮູບພາບເຫັນວ່າ ນັກຮຽນຂັ້ນ ປ.1-ປ.5 ໄດ້ນໍາໃຊ້ບັດຮູບພາບຫຼາຍກວ່າ 74%, ໃນນີ້ 88,67% ຂອງນັກຮຽນທີ່ໄດ້ນໍາໃຊ້ບັດຮູບພາບເຂົ້າໃນການຮຽນບອກວ່າ ບັດຮູບພາບແມ່ນເປັນໜ້າສົນໃຈ ແລະ ພວກມັນຊ່ວຍໃຫ້ນັກຮຽນເຂົ້າໃຈບົດຮຽນທີ່ກ່ຽວຂ້ອງໄດ້ເຖິງ 82,24%; ສື່ການຮຽນການສອນທີ່ເປັນປຶ້ມເລື່ອງ ແລະ ເກມ ເຫັນວ່າ ນັກຮຽນຂັ້ນ ປ.2, ປ.4 ແລະ ປ.5 ໄດ້ນໍາໃຊ້ປຶ້ມເລື່ອງ ແລະ ເກມປະມານ 70% ແລະ ພວກມັນຊ່ວຍໃຫ້ ນັກຮຽນເຂົ້າໃຈບົດຮຽນທີ່ກ່ຽວຂ້ອງໄດ້ເກືອບ 70% ເຊັ່ນກັນ.
ຂ່າວໂດຍ: ບົວລະພາ ອິນສີມະນີ
