ສະພາການຄ້າ ແລະ ອຸດສາຫະກຳແຫ່ງຊາດລາວ ຮ່ວມກັບ ກະຊວງແຮງງານ ແລະ ສະ ຫວັດດີການສັງຄົມ, ກະຊວງສຶກສາທິການ ແລະ ກິລາ ແລະ ສະຫະພັນກຳມະບານລາວ ຈັດມະຫະກຳກຽມຄວາມພ້ອມສູ່ການເຮັດວຽກ “Ready 4 Work festival 2023 ລະຫວ່າງ ວັນທີ 27-29 ມີນາ 2023 ທີ່ ສູນການຄ້າວຽງຈັນເຊັນເຕີ, ນະຄອນຫລວງວຽງຈັນ, ຄາດວ່າຈະມີນັກສຶກສາ, ຜູ້ວ່າງງານ, ຜູ້ຊອກຫາວຽກ, ແຮງງານທີ່ກັບມາຈາກຕ່າງປະເທດ ສົນໃຈເຂົ້າຮ່ວມງານຫລາຍແສນຄົນ.
ທ່ານ ໄຊບັນດິດ ຣາຊະພົນ ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ ໄດ້ໃຫ້ຮູ້ວ່າ: ມະຫະກຳກຽມຄວາມພ້ອມເຮັດວຽກ ໄດ້ວ່າງສະແດງຄວາມຕ້ອງການແຮງງານ, ໃຫ້ຄວາມຮູ້ໃນການປະກອບອາຊີບ, ແນະນໍທຶນການສຶກ, ແນະນຳທຸລະກິດຜູ້ທີ່ຢາກປະກອບອາຊີບອິດສະລະ ແລະ ເຂົ້າເຮັດວຽກພາຍໃນບໍລິສັດ, ການສາທິດແກະສະຫລັກ ແລະ ແນະນໍາວິຊາຊີບ. ນອກຈາກນີ້ ຍັງໄດ້ມີການວາງສະແດງຫລາຍກວ່າ 80 ຫ້ອງເຊັ່ນ: ຂະແໜງໂຮງແຮມ, ອຸດສະຫະກຳຕັດຫຍິບ, ກະສິ ກຳ ແລະ ຂະແໜ່ງທຸລະກິດຕ່າງໆ ແລະ ເກັບກຳຂໍ້ມູນຄວາມຕ້ອງການແຮງງານຈາກບໍລິສັດ, ຕຳແໜ່ງຫວ່າງ, ການສາທິດອາຊີບ, ການນໍາສະເໜີທຶນການສຶກສາ ແລະ ຍັງເປັນການສະແດງໃຫ້ເຫັນເຖິງທຸລະກິດຕ່າງໆ ເພື່ອໃຫ້ນັກສຶກສາໄດ້ເປັນທິດທາງໃນການເລືອກສາຍວິຊາຮຽນ.
ນອກນັ້ນ, ຍັງພິທີມອບການມອບລາງວັນ ພັດທະນາສີມືແຮງງານດີເດັ່ນ ໃຫ້ກັບສະຖານປະ ກອບການ, ວິທະຍາໄລ, ສະຖານປະກອບການ ແລະ ຄູຝຶກສະຖານປະກອບການ, ມີເວທີສົນທະນາ ຫລາຍຫົວຂໍ້ເພື່ອໃຫ້ຄວາມຮູ້ໃນການປະກອບອາຊີບ, ການດຳເນີນທຸລະກິດ, ການກຽມພ້ອມສູ່ການມີວຽກເຮັດງານທຳ ແລະ ອີກຫລາຍໆຫົວຂໍ້ ແລະ ກິດຈະກໍາເພື່ອສັງຄົມ.
ຂ່າວ: ກິດຕາ
ພາບ: ເກດສະໜາ
