ຄະນະກຳມະການຄຸ້ມຄອງໄພພິບັດຂັ້ນສູນກາງ ອອກໜັງສືແຈ້ງການ ເຖິງຄະນະກຳມະ ການຄຸ້ມຄອງໄພພິບັດຂັ້ນສູນກາງ, ແຂວງ, ນະຄອນຫລວງໃນຂອບເຂດທົ່ວປະເທດ ໃນການເພີ່ມທະ ວີຄວາມເອົາໃຈໃສ່ ໃນການກຽມຄວາມພ້ອມຮັບມືກັບອັກຄີໄພ ແລະ ໄຟໄໝ້ລາມປ່າໃນໄລຍະລະດູແລ້ງ.
ຄະນະກຳມະການຄຸ້ມຄອງໄພພິບັດຂັ້ນສູນກາງ ແຈ້ງໃຫ້ຊາບວ່າ: ຕໍ່ກັບສະພາບອາກາດທີ່ຮ້ອນອົບເອົ້າ ເຊິ່ງອາດຈະເຮັດໃຫ້ເກີດມີອັກຄີໄພ ຫລື ໄຟໄໝ້ລາມປ່າເປັນວົງກ້ວາງ ຢູ່ໃນຂອບເຂດທົ່ວປະເທດ. ສະນັ້ນ, ເພື່ອກຽມຄວາມພ້ອມຮັບມືກັບສະພາບເຫດການດັ່ງກ່າວ ຄະນະກໍາມະການຄຸ້ມຄອງໄພພິບັດຂັ້ນສູນກາງ ໄດ້ແຈ້ງມາຍັງບັນດາ ຄະນະກໍາມະການຄຸ້ມຄອງໄພພິບັດແຕ່ລະຂັ້ນ ເພີ່ມທະວີຄວາມເອົາໃຈໃສ່ຕິດຕາມ ສະພາບໃນເຂດພື້ນທີ່ສ່ຽງທີ່ອາດເກີດອັກຄີໄພ ຫລື ໄຟໄໝ້ລາມປ່າ ຢ່າງໃກ້ຊິດ, ກຽມຄວາມພ້ອມດ້ານຕ່າງໆ ເປັນຕົ້ນ ກຳລັງພົນ, ພາຫະນະ, ວັດຖຸ-ອຸປະກອນ, ງົບປະມານ, ເຄື່ອງອຸປະໂພກ-ບໍລິໂພກ ເຂົ້າໃນການແກ້ໄຂເຫດການອັກຄີໄພ ຫລື ໄຟໄໝ້ລາມປ່າ ໃຫ້ທັນສະພາບການ.
ນອກຈາກນີ້, ຍັງໄດ້ແຈ້ງການເຕືອນເຖິງ ອຳນາດການປົກຄອງທ້ອງຖິ່ນທຸກຂັ້ນ ແລະ ປະຊາຊົນ ໃຫ້ມີສະຕິ ເຝົ້າລະວັງ ເພື່ອຮັບມືກັບເຫດການອັກຄີໄພ ຫລື ໄຟໄໝ້ລາມປ່າ ທີ່ອາດຈະເກີດຂຶ້ນ, ຫາກເກີດເຫດການອັກຄີໄຟ ຫລື ໄຟໄໝ້ລາມປ່າ ຢູ່ທ້ອງຖິ່ນໃດ ແມ່ນມອບໃຫ້ທ້ອງຖິ່ນນັ້ນຮັບຜິດຊອບໃນ
ການແກ້ໄຂຢ່າງຮີບດ່ວນ ແລະ ລາຍງານໃຫ້ຄະນະກໍາມະການຄຸ້ມຄອງໄພພິບັດ ຕາມແຕ່ລະຂັ້ນຊາບໂດຍໄວ.
