ວັນທີ 26 ມີນາ 2023 ນີ້, ທ່ານ ທອງລຸນ ສີສຸລິດ ປະທານປະເທດແຫ່ງ ສປປ ລາວ ພ້ອມດ້ວຍການນຳຂັ້ນສູນກາງ, ການນຳແຂວງຈຳປາສັກ ແລະ ພາກສ່ວນກ່ຽວຂ້ອງ ໄດ້ເຄື່ອນໄຫວຢ້ຽມຢາມກຸ່ມຜູ້ຜະລິດເຂົ້າເປັນສິນຄ້າບ້ານ ນາ, ຜູ້ປະກອບການລ້ຽງປານ້ຳຂອງ ບ້ານ ພຽງດີ ແລະ ຢ້ຽມຢາມພົບປະໂອ້ລົມພໍ່ແມ່ປະຊາຊົນຊາວບ້ານ ໂພນສະອາດ ທີ່ເປັນເປົ້າໝາຍບ້ານພັດທະນາປະຊາຊົນຢູ່ດີກິນດີ ແລະ ກຸ່ມຜູ້ຜະລິດເຄື່ອງຈັກສານ ສິນຄ້າໂອດ໋ອບ; ໃຫ້ກຽດຕ້ອນຮັບຢ່າງອົບອຸ່ນຄັ້ງນີ້ ໂດຍທ່ານນາງ ຄຳພູ ລິດທິສັກ ກຳມະການພັກແຂວງ ເລຂາພັກເມືອງ ເຈົ້າເມືອງໆໂຂງ, ມີບັນດາທ່ານໃນຄະນະບໍລິຫານງານພັກເມືອງ, ຕະຫຼອດພໍ່ແມ່ປະຊາຊົນເຖົ້າແກ່ແນວໂຮມຮັບຕ້ອນຢ່າງຫຼວງຫຼາຍ.
ທ່ານ ຄຳພັນ ສິດມະນີ ເລຂາພັກບ້ານ, ນາຍບ້ານໆນາ ລາຍງານວ່າ: ບ້ານພວກເຮົາປະກອບມີ 140 ຫຼັງຄາເຮືອນ, ມີ 122 ຄອບຄົວ, ປະຊາຊົນປະກອບອາຊີບເຮັດນາເປັນຕົ້ນຕໍ, ຄ້າຂາຍເປັນອາຊີບສຳຮອງ, ປັດຈຸບັນ ພໍ່ແມ່ປະຊາຊົນຊາວນາໄດ້ທຳການຜະລິດເຂົ້າເປັນສິນຄ້າສົ່ງອອກເພື່ອສ້າງຖານລາຍຮັບໃຫ້ເຂັ້ມແຂງ ແລະ ຍືນຍົງ ໂດຍຫັນໄປສູ່ສັງຄົມການຜະລິດ, ໄດ້ສ້າງຕັ້ງກຸ່ມການຜະລິດເຂົ້າ ໂດຍມີການຜູກພັນສັນຍາສອງສົ້ນກັບບໍລິສັດ ໄອດີພີ ແລະ ບໍລິສັດ ພູເງິນ ສົ່ງເສີມການຜະລິດເຂົ້າເປັນສິນຄ້າມີ 4 ກຸ່ມ, ມີ 51 ຄອບຄົວ, ການຜະລິດເຂົ້ານາປີຜ່ານມາປະຕິບັດໄດ້ 215 ເຮັກຕາ, ຜະລິດເຂົ້າເປັນສິນຄ້າມີ 90 ເຮັກຕາ, ສາມາດຜະລິດເຂົ້າໄດ້ 335,7 ໂຕນ, ຂາຍອອກໄດ້ຮັບເປັນເງິນທັງໝົດ 1.779 ລ້ານກວ່າກີບ, ສະເພາະການຜະລິດເຂົ້ານາແຊງປີນີ້ມີເນື້ອທີ່ 85 ເຮັກຕາ, ໂດຍສະເພາະຜະລິດເຂົ້າເປັນສິນຄ້າມີ 63 ເຮັກຕາ, ຄາດຄະເນສະມັດຕະພາບ 4,5 ໂຕນ/ເຮັກຕາ, ຄາດຄະເນຜົນຜະລິດຈະໄດ້ຮັບທັງໝົດ 283,5 ໂຕນ ແລະ ຄາດຄະເນລາຍຮັບຈາກການຂາຍເຂົ້າ 1.732 ລ້ານກີບ. ຈາກນັ້ນ ທ່ານ ທອງລຸນ ສີສຸລິດ ປະທານປະເທດແຫ່ງ ສປປ ລາວ ກໍໄດ້ໄປຢ້ຽມຢາມຄອບຄົວຕົວແບບ ເບິ່ງການລ້ຽງ ແລະ ຂະຫຍາຍພັນປານ້ຳຂອງ ຢູ່ບ້ານ ພຽງດີ ຄອບຄົວທ່ານ ຄຳຈັນ ໄຊສົມບັດ ໃນສົກປີ 2017-2018 ໄດ້ລົງມືບຸກເບີກເນື້ອທີ່ຈຳນວນ 30 ເຮັກຕາໃນການເຮັດໜອງສະເພື່ອລ້ຽງປາຈຳນວນ 50 ໜອງ, ໜອງສຳລັບປ່ອຍປາຈຳນວນ 25 ໜອງ ແລະ ໜອງອະນຸບານລູກປາ 25 ໜອງ, ປັດຈຸບັນ ພາຍໃນໜອງມີປາທັງໝົດ 17 ສາຍພັນເປັນຕົ້ນ: ປາເຄິງ, ປາເພ້ຍ, ປາພອນ, ປາປື່ງ, ປາຍອນ, ປາສ້ອຍ, ປາກົດ, ປາຄໍ່, ປາເຂັງ, ປາປາກ, ປາດຸກ, ປານິນ, ປາເຈລະມິດ, ປາສະຫວາຍ, ປາຕອງ, ປາວ່າ ແລະ ປາໂຈກ ລວມທັງໝົດປ່ອຍແລ້ວຈຳນວນ 1 ລ້ານກວ່າໂຕ, ໄລຍະຜ່ານ ມາສາມາດນຳປາຂຶ້ນໄປຈຳໜ່າຍທັງໝົດ 12 ໂຕນ, ໂດຍການຈຳໜ່າຍທັງຕະຫຼາດພາຍໃນເມືອງ ແລະ ຕ່າງແຂວງກໍມີ.
ຕອນບ່າຍຂອງວັນດຽວກັນ ປະທານປະເທດແຫ່ງ ສປປ ລາວ ພ້ອມຄະນະ ກໍໄດ້ໄປຢ້ຽມຢາມພໍ່ແມ່ປະຊາຊົນບ້ານໂພນສະອາດ ເຊິ່ງເປັນຊົນເຜົາປາເລົາ, ທ່ານ ຄຳເຜືອກ ຫານຊະນະ ເລຂາໜ່ວຍພັກ ນາຍບ້ານໂພນສະອາດ ລາຍງານວ່າ: ພາຍໃນບ້ານປະກອບມີ 286 ຫຼັງຄາເຮືອນ, ມີ 272 ຄອບຄົວ, ພົນລະເມືອງ 1.893 ຄົນ, ຍິງ 986 ຄົນ, ເປັນບ້ານທີ່ມີເສັ້ນທາງຫຼວງແຫ່ງຊາດເລກທີ 13 ໃຕ້ຜ່ານ, ມີເນື້ອທີ່ກວ້າງຂວາງ ເໝາະໃຫ້ແກ່ການປູກຝັງ-ລ້ຽງສັດໃຫຍ່, ເໝາະສົມໃນການສ້າງເປັນເຂດທ່ອງທ່ຽວບ້ານວັດທະນະທຳຊົນເຜົ່າ, ຈາກຈຸດພິເສດ ແລະ ທ່າແຮງຫຼາຍດ້ານ ເມືອງໄດ້ກຳນົດສ້າງບ້ານໃຫຍ່ກາຍເປັນຕົວເມືອງນ້ອຍໃນຊົນນະບົດ ແລະ ສ້າງເປັນບ້ານພັດທະນາຢູ່ດີກິນດີ. ພິເສດ ບ້ານໂພນສະອາດ ມີສະຫະກອນຜະລິດເຄື່ອງຫັດຖະກຳຈັກສານໄມ້ປ່ອງ ມີສະມາຊິກ 150 ຄອບຄົວ, ໃນໜຶ່ງປີຜ່ານມາສາມາດຂາຍຜະລິດຕະພັນເປັນຕົ້ນ: ຫວດ 52 ພັນໜ່ວຍ, ກະບຽນ 20 ພັນກວ່າໃບ, ກະຕ່າ 13 ພັນກວ່າໜ່ວຍ ໄດ້ຮັບເງິນທັງໝົດ 754 ລ້ານກວ່າກີບ.
————————————
#medialaos#ສື່ມວນຊົນແຂວງຈຳປາສັກ
ຂ່າວ-ພາບ: ພຸດທະສິນ ວົງວິໄລທອງ ສະຖານີວິທະຍຸ-ໂທລະພາບເມືອງໂຂງ
