ກະຊວງແຮງງານ ແລະ ສະຫັວດດີການສັງຄົມ (ຮສສ) ໄດ້ຈັດພິທີປາຖະກະຖາວັນສ້າງພັກປະຊາຊົນປະຕິວັດລາວ ຄົບຮອບ 68 ປີ, ວັນນັກຮົບເສຍອົງຄະ ແລະ ເສຍສະຫຼະຊີວິດເພື່ອປະເທດຊາດ ຄົບຮອບ 77 ປີ ແລະ ເຊື່ອມຊຶມເອກະສານຕ່າງໆຂອງພັກຂຶ້ນໃນວັນທີ 24 ມີນາ ນີ້ ທີ່ເຮືອນຮັບແຂກກະຊວງ ຮສສ ໃຫ້ກຽດ ປາຖະກະຖາໂດຍທ່ານນາງ ໃບຄໍາ ຂັດທິຍະ ລັດຖະມົນຕີກະຊວງ ຮສສ, ມີຮອງລັດຖະມົນຕີ, ພະນັງງານຫຼັກ ແຫຼ່ງກ່ຽວຂ້ອງເຂົ້າຮ່ວມ.
ທ່ານນາງ ໃບຄໍາ ຂັດທິຍະ ກ່າວວ່າ: ການປາຖະກະຖາຄັ້ງນີ້ເພື່ອໃຫ້ຄະນະພັກກະຊວງ-ອົງການອ້ອມຂ້າງສູນກາງ, ຄະນະພັກນະຄອນຫຼວງວຽງຈັນ ແລະ ຄະນະພັກແຂວງໃນທົ່ວປະເທດຕະຫຼອດຮອດສະມາຊິກພັກພະນັກງານ, ທະຫານ, ຕໍາຫຼວດ, ປະຊາຊົນບັນດາເຜົ່າ ແລະ ຊັ້ນຄົນຕ່າງໆໃນສັງຄົມໄດ້ຮັບຮູ້, ເຂົ້າໃຈ, ເຊື່ອມຊຶມ ແລະ ກໍາແໜ້ນເນື້ອໃນຂອງກອງປະຊຸມວຽກງານການເມືອງ-ແນວຄິດທົ່ວປະເທດຄັ້ງທີ V ຢ່ງເລິກເຊິ່ງ. ບົນພື້ນຖານດັ່ງກ່າວເພື່ອຍົກສູງນໍ້າໃຈຮັກຊາດ, ຈິດໃຈເອກະລາດ, ເປັນເຈົ້າຕົນເອງບົນພື້ນຖານຫັນເປັນທິດທາງ, ແຜນການ ແລະ ວຽກງານຈຸດສຸຸມໃນການຈັດຕັ້ງປະຕິບັດໜ້າທີ່ການເມືອງຂອງບັນດາໜ່ວຍພັກ, ຍົກສູງຄວາມເປັນເຈົ້າການ ແລະ ຄວາມສາມາດໃນການນໍາພາຈັດຕັ້ງຜັນຂະຫຍາຍ, ເຊື່ອມຊຶມໃນທົ່ວຄະນະພັກກະຊວງ ຮສສ ແລະ ເສີມສ້າງຄວາມສາມັກຄີເປັນປຶກແຜ່ນ, ເພິ່ງຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ, ເພື່ອສ້າງກໍາລັງແຮງແຫ່ງຄວາມເປັນເອກະພາບດ້ານການເມືອງ, ແນວຄິດ ແລະ ກໍາລັງແຮງໃນການຈັດຕັ້ງປະຕິບັດພາລະກິດປະຕິວັດຂອງພັກໃນການປົກປັກຮັກສາ ແລະ ສ້າງສາພັດທະນາປະເທດຊາດ, ຮັບປະກັນໃຫ້ປະເທດຊາດມີສະຖຽນລະພາບທາງດ້ານການເມຶອງ, ມີຄວາມໜັ່ນຄົງ ແລະ ຄວາມສະຫງົບສຸກໃນສັງຄົມ, ເສດຖະກິດສືບຕໍ່ໄດ້ຮັບການພັດທະນາ ແລະ ຊີວິການເປັນຢູ່ຂອງປະຊາຊົນບັນດາເຜົ່ານັບມື້ນັບດີຂຶ້ນ, ບົດບາດອິດທິພົນຂອງຊາດໄດ້ພົ້ນເດັ່ນຂຶ້ນໃນເວທີສາກົນ, ເພື່ອໃຫ້ຄະນະພັກແຕ່ລະຂັ້ນ, ຜູ້ນໍາພາແຕ່ລະບ່ອນເຮັດສຳເລັດໜ້າທີ່ການ ເມືອງຂອງຕົນນັ້ນ ຕ້ອງຍົກສູງຄວາມສາມາດ ແລະ ຄວາມຮັບຜິດຊອບຂອງຕົນໃນການເຄື່ອນໄຫວວຽກງານການເມືອງ-ແນວຄິດຢູ່ໃນທ່າບຸກ ໂດຍຫັນເອົາເນື້ອໃນຂອງກອງປະຊຸມ ແລະ ຄວາມເຫັນຊີ້ນໍາຂອງສະຫາຍເລຂາທິການໃຫຍ່ ປະທານປະເທດໃຫ້ເປັນນິຕິກໍາລະອຽດ ແລະ ເປັນແຜນການເຄື່ອນໄຫວຕົວຈິງໃນການໂຄສະນາສຶກສາອົບຮົມການເມືອງ-ແນວຄິດໃຫ້ສະມາຊິກພັກ, ພະນັກງານ, ທະຫານ, ຕໍາຫຼວດ, ປະຊາຊົນບັນດາເຜົ່າ ແລະ ຊັ້ນຄົນຕ່າງໆໃນສັງຄົມຢ່າງກວ້າງຂວາງ, ທົ່ວເຖິງ ແລະ ເລິກເຊິ່ງ.
ຂ່າວ-ພາບ: ບຸນອູ້ມ
