ມູນນິທິຊ່ວຍເຫຼືອພັດທະນະຄົນພິການລາວ, ແມ່ນມີໜ້າທີ່ລະດົມທຶນຈາກພາກສ່ວນຕ່າງໆ ເພື່ອມາຊ່ວຍເຫຼືອປະຊາຊົນໃນຂອບເຂດທົ່ວປະເທດ ທີ່ທຸກຍາກຂາດເຂີນ ໂດຍສະເພາແມ່ນຄົນພິການລາວ.
ທ່ານ ນາງ ຂວັນຕາ ລິດຕິ ປະທານມູນນິທິຊ່ວຍເຫຼືອພັດທະນະຄົນພິການລາວ ໄດ້ເວົ້າວ່າ: ມູນນິທິດັ່ງກ່າວ ໄດ້ຮັບການສ້າງຕັ້ງຂຶ້ນໃນວັນທີ 23 ທັນວາ ປີ 2021 ໂດຍມີຈຸດປະສົງ ເພື່ອລະດົມທຶນຈາກພາກສ່ວນຕ່າງໆ ເພື່ອມາຊ່ວຍເຫຼືອ ປະຊາຊົນໃນຂອບເຂດທົ່ວປະເທດ ທີ່ທຸກຍາກຂາດເຂີນ ໂດຍສະເພາະແມ່ນ ຄົນພິການລາວ ຫຼື ຜູ້ດ້ອຍໂອກາດ. ຫຼ້າສຸດແມ່ນໄດ້ຂໍທຶນນຳອົງການທ່ອງທ່ຽວປະເທດໄທເພື່ອມາມອບໃຫ້ໂຮງຮຽນປະຖົມສົມບູນ ບ້ານຄຳສະໜາດ ເມືອງໄຊເສດຖາ ນະຄອນຫຼວງວຽງຈັນ ແລະ ໂຮງຮຽນປະຖົມສົມບູນ ບ້ານຈອມສີ ເມືອງຫາດຊາຍຟອງ ນະຄອນຫຼວງວຽງຈັນ ລວມມູນຄ່າຫຼາຍກວ່າ 60.000.000 ລ້ານກີບ, ໂດຍແມ່ນພາກສ່ວນທີ່ໃຫ້ທຶນມາມອບດ້ວຍຕົນເອງ ສະເພາະມູນນິທິຂອງພວກເຮົາກະໄດ້ປະກອບສ່ວນເພີ່ມຕື່ມໃສ່, ມູນນິທິເຮົາກໍພະຍາຍາມຊອກແຫຼ່ງທຶນທີ່ຈະມາຊ່ວຍ ບ່ອນໃດຂາດເຂີນຫຍັງ ຫຼືວ່າ ຄົນພິການຂາຂາດລໍ້ນັ່ງ ໄດ້ຊອກຫາການອຸປະຖຳເພື່ອຊ່ວຍເຫຼືອ ໃນໄລຍະຜ່ານມາມູນນິທິແມ່ນເຄື່ອນໄຫວເຮັດແທ້, ເຮົາເຮັດດ້ວຍໃຈ ແລະ ເຮົາຮັກ, ເຮົາຢາກຊ່ວຍເຫຼືອສັງຄົມໃຫ້ມັນດີຂຶ້ນ.
ທ່ານຍັງໄດ້ເວົ້າອີກວ່າ: ການທີ່ສ້າງຕັ້ງມູນນິທິດັ່ງກ່າວຂຶ້ນມາກໍຍ້ອນໄດ້ແນວຄວາມຄິດມາ ຈາກ ທ່ານ ຄຳຮັກ ແສນເພຍວົງ ຊຶ່ງລາວເປັນຄົນພິການຜູ້ໜຶ່ງ ທີ່ມີອຸດົມການທີ່ດີ ເປັນການຊ່ວຍເຫຼືອສັງຄົມໃຫ້ດີຂຶ້ນ, ສຳລັບແຜນການໃນຕໍ່ໜ້າແມ່ນຢາກສ້າງຕັ້ງມູນນິທິໃຫ້ເຂັ້ມແຂງ, ຢາກໄດ້ດິນຕອນ ໜຶ່ງ ເພື່ອສ້າງສູນຝຶກອົບຮົມຄົນພິການລາວທົ່ວປະເທດ ແລະ ບ້ານພັກຄົນຊະລາ ໃຫ້ມັນຍືນຍົງ ໃຫ້ສືບທອດຮອດເຊັ່ນລູກເຊັ່ນຫຼານ, ຢາກເຮັດໄດ້ຄືແນວນັ້ນ ຕ້ອງໄດ້ອາໄສຄົນຮຸ່ນໜຸ່ມທີ່ມີຫົວຄິດປະດິດສ້າງ ແລະ ມີອຸດົມການ, ມູນນິທິຕ້ອງມີອຸດົມການ ຕ້ອງມີໃຈຮັກ ເພາະມັນເປັນການໃຫ້ ຫຼື ຊ່ວຍເຫຼືອສັງຄົມແທ້ໆ. ຖ້າຢູ່ ສປປ ລາວ ຫາກມີບ້ານພັກຄົນຊະລາ ຈະຊ່ວຍສັງຄົມໄດ້ຫຼາຍຂຶ້ນ.
ໂດຍ ບຸນຕອມ
