ວິທະຍຸກະຈາຍສຽງຫວຽດນາມລາຍງານວ່າ: ໃນຕອນເຊົ້າວັນທີ 2 ມີນາ ຢູ່ ຮ່າໂນ້ຍ, ສະພາແຫ່ງຊາດ ຫວຽດນາມ ຊຸດທີ XV ໄດ້ດຳເນີນກອງປະຊຸມວິສາມັນເທື່ອທີ 4 ເພື່ອປ່ອນບັດເລືອກຕັ້ງປະທານປະເທດ ອາຍຸການ 2021-2026. ໃນກອງປະຊຸມ, ຄະນະປະຈຳສະພາແຫ່ງຊາດໄດ້ຍື່ນສະເໜີຕໍ່ສະພາແຫ່ງຊາດພິຈາລະນາ, ເລືອກຕັ້ງ ທ່ານ ຫວໍ ວັນ ເຖືອງ ກຳມະການກົມການເມືອງ ຜູ້ປະຈຳການຄະນະເລຂາທິການສູນກາງພັກ ຊຸດທີ XIII, ສະມາຊິກສະພາແຫ່ງຊາດ ຊຸດທີ XV; ໄດ້ຮັບເລືອກຕັ້ງດຳລົງຕຳແໜ່ງເປັນປະທານປະເທດ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ອາຍຸການ 2021-2026.
ບັນດາຜູ້ແທນສະພາແຫ່ງຊາດ ໄດ້ລົງຄະແນນສຽງຮັບຮອງເອົາລາຍຊື່ ແລະ ເລືອກຕັ້ງເອົາປະທານປະເທດໂດຍການປ່ອນບັດເລືອກຕັ້ງ. ຜົນຂອງການປ່ອນບັດເລືອກຕັ້ງ, ທ່ານ ຫວໍ ວັນ ເຖືອງ ໄດ້ຮັບເລືອກຕັ້ງໃຫ້ດຳລົງຕຳແໜ່ງເປັນປະທານປະເທດ ແຫ່ງ ສສ ຫວຽດນາມ.
ທ່ານ ຫວໍ ວັນ ເຖືອງ ເກີດເມື່ອວັນທີ 13 ທັນວາ 1970; ເຂົ້າເປັນສະມາຊິກພັກໃນວັນທີ 18 ພະຈິກ 1993; ບ້ານເກີດ: ຕາແສງ ອານເຟືອກ ເມືອງມ່າງທິດ ແຂວງວິງລອງ; ເປັນພະນັກງານຂັ້ນສູງຂອງພັກ ທີ່ໄດ້ຮັບການຝຶກອົບຮົມຫຼໍ່ຫຼອມ, ມີຄວາມສາມາດ ແລະ ມີປະສົບການເຮັດວຽກຢ່າງຮອບດ້ານ, ມີປະສົບການໃນຫຼາຍຕໍາແໜ່ງການນໍາທີ່ສຳຄັນຢູ່ສູນກາງ ແລະ ທ້ອງຖິ່ນ.
ທ່ານ ຫວໍ ວັນ ເຖືອງ ມີລະດັບທິດສະດີການເມືອງຂັ້ນສູງ, ວິຊາສະເພາະປະລິນຍາຕີປັດຊະຍາ, ປະລິນຍາໂທວິທະຍາສາດສັງຄົມ ແລະ ມະນຸດສາດ. ທ່ານເປັນກຳມະການຄະນະບໍລິຫານງານສູນກາງພັກ ຊຸດທີ X (ສຳຮອງ), ຊຸດທີ XI, XII, XIII; ເລຂາທິການສູນກາງພັກ ຊຸດທີ XII, XIII.
– ກຳມະການກົມການເມືອງ ຊຸດທີ XII, XIII; ເປັນສະມາຊິກສະພາແຫ່ງຊາດຊຸດທີ XII, XIV, XV;
– ເດືອນກຸມພາ ປີ 2021 ມາຮອດປັດຈຸບັນ ທ່ານໄດ້ຮັບມອບໝາຍຈາກກົມການເມືອງດຳລົງຕຳ ແໜ່ງເປັນຜູ້ປະຈຳການຄະນະເລຂາທິການສູນກາງພັກ ຮັບຜິດຊອບວຽກງານການເມືອງພາຍໃນ, ການເງິນ, ເສດຖະກິດ, ການຕ່າງປະເທດຂອງພັກ, ວຽກງານການທູດປະຊາຊົນ.
ພາຍຫຼັງໄດ້ຮັບການເລືອກຕັ້ງ, ທ່ານ ຫວໍ ວັນ ເຖືອງ ໄດ້ສາບານຕົນເຂົ້າຮັບຕຳແໜ່ງຕໍ່ສະພາແຫ່ງຊາດຕາມລະບຽບການ. ກ່າວຄຳເຫັນຕໍ່ສະພາແຫ່ງຊາດ, ທ່ານ ຫວໍ ວັນ ເຖືອງ ໄດ້ສະແດງຄວາມຂອບໃຈຢ່າງຈິງໃຈຕໍ່ຄະນະບໍລິຫານງານສູນກາງພັກ, ສະແດງຄວາມເຄົາລົບຕໍ່ປະທານ ໂຮ່ຈິມິນ – ວິລະຊົນແຫ່ງການປົດປ່ອຍຊາດ, ນັກວັດທະນະທຳໂລກ, ອາຈານຜູ້ຍິ່ງໃຫຍ່ຂອງການປະຕິວັດ ຫວຽດນາມ, ທ່ານ ຫວຽນຟູຈ້ອງ ເລຂາທິການໃຫຍ່ ແລະ ບັນດາການນຳພັກ-ລັດ ທີ່ໃຫ້ຄວາມໄວ້ເນື້ອເຊື່ອໃຈເລືອກຕັ້ງຮັບດຳລົງຕຳແໜ່ງນີ້, ນີ້ແມ່ນກຽດສັກສີອັນຍິ່ງໃຫຍ່ ແລະ ຍັງເປັນຄວາມຮັບຜິດຊອບອັນໜັກໜ່ວງ.
ທ່ານໃຫ້ຄຳໝັ້ນສັນຍາຈະສືບຕໍ່ຮ່ຳຮຽນ, ປະຕິບັດບັນດາອຸດົມການ, ຄຸນສົມບັດສິນທຳປະຕິວັດ, ຕະຫຼອດຮອດຄວາມຮູ້ບຸນຕໍ່ການເສຍສະຫຼະ ແລະ ອັນໃຫຍ່ຫຼວງຂອງການນຳຂັ້ນສູງຮຸ່ນຕ່າງໆ, ສະມາຊິກພັກ, ທະຫານ ແລະ ປະຊາຊົນ ຫວຽດນາມ ທີ່ມີນ້ຳໃຈຮັກຊາດ.
