ນະຄອນໂຮ່ຈິມິນ ປັບປຸງສະພາບແວດລ້ອມການລົງທຶນ

ວິທະຍຸກະຈາຍສຽງຫວຽດນາມລາຍງານວ່າ: ເມື່ອບໍ່ດົນມານີ້, ຄະນະກຳມະການປະຊາຊົນ ນະ ຄອນໂຮ່ຈິມິນ ໄດ້ຈັດການໂອ້ລົມສົນທະນາກັບ 18 ການນຳນະຄອນ, ການນຳສະມາຄົມວິສາຫະກິດຕ່າງປະເທດ ຢູ່ ນະຄອນໂຮ່ຈິມິນ, ດ້ວຍຫົວຂໍ້: ຍົກສູງປະສິດທິຜົນການເຄື່ອນໄຫວວຽກງານທາງລັດຖະການ, ຊຸກຍູ້ການປະຕິຮູບການບໍລິຫານ ແລະ ປັບປຸງສະພາບແວດລ້ອມແຫ່ງການລົງທຶນ; ຊຸກຍູ້ການພັດທະນາເສດຖະກິດ; ຮັບປະກັນສະຫວັດດີການສັງຄົມ. ຂ່າວລະບຸວ່າ: ທ່ານ ຟານວັນໝາຍ ປະທານຄະນະກຳມະການປະຊາຊົນ ນະຄອນໂຮ່ຈິມິນ ກ່າວຄຳເຫັນໃນກອງປະຊຸມ ຢືນຢັນວ່າ: ນະຄອນໂຮ່ຈິມິນ ພວມສຸມໃສ່ການປັບປຸງສະພາບແວດລ້ອມແຫ່ງການລົງທຶນ, ເຫັນແຈ້ງຄວາມຮັບຜິດຊອບໃນການບໍລິຫານຂອງບັນດາອົງການ, ໜຶ່ງໃນບັນດາໜ້າທີ່ປີ 2023 ແມ່ນສຸມໃສ່ປະສິດທິພາບເຄື່ອນໄຫວວຽກງານທາງລັດຖະການ ປະຕິຮູບລະບຽບການບໍລິຫານໃຫ້ມີປະສິດທິຜົນກວ່າເກົ່າ, ປັບປຸງສະພາບແວດລ້ອມການລົງທຶນໃຫ້ດີຂຶ້ນ. ນະຄອນໂຮ່ຈິມິນ ຈະປະກາດບັນດາຂໍ້ກຳນົດຢ່າງຈະແຈ້ງກ່ຽວກັບສິດອຳນາດ, ຄວາມຮັບຜິດຊອບ, ໄລຍະປະຕິບັດບັນດາລະບຽບການບໍລິຫານ ໃຫ້ສະມາຄົມວິສາຫະກິດ ໂດຍໄວ. ທ່ານ ຟານວັນໝາຍ ເນັ້ນໜັກວ່າ: ນະຄອນຈະສືບຕໍ່ພາຍາຍາມ, ປັບປຸງການບໍລິຫານ, ນຳໃຊ້ການຫັນເປັນດີຈີຕອນຫຼາຍຂຶ້ນກວ່າເກົ່າ, ສ້າງເງື່ອນໄຂສະດວກທີ່ສຸດໃຫ້ແກ່ບັນດາວິສາຫະກິດ ໃນວິວັດການປະຕິບັດບັນດາລະບຽບການບໍລິຫານ. ຈະເປັນນະຄອນທີ່ບັນລຸເປົ້າໝາຍ ການເຄື່ອນໄຫວໂດຍພື້ນຖານຂອງອຳນາດການປົກຄອງ ໃນລະບົບດີຈີຕອນ ໃນປີ 2025.