ຕາມຂ່າວຈາກ China Media Group ວັນທີ21ກຸມພານີ້ ລົດໄຟຄວາມໄວສູງຈາກາຕາ-ບັນດຸງ (Jakarta-Bandung) ເປັນລົດໄຟຄວາມໄວສູງແຫ່ງທຳອິດທີ່ສ້າງຂຶ້ນຢູ່ອິນໂດເນເຊຍ ແລະ ອາຊຽນ.
ຫລັງຈາກລົງມືກໍ່ສ້າງມາແຕ່ປີ 2018 ຫລ້າສຸດວຽກງານກໍ່ສ້າງສະຖານີ, ຂົວ ແລະ ວຽກງານພື້ນຖານໂຄງລ່າງ ໄດ້ສຳເລັດແລ້ວ ຄາດວ່າເລີ່ມເປີດໃຫ້ບໍລິການໃນໄລຍະ ກາງປີນີ້. ລົດໄຟດັ່ງກ່າວແລ່ນດ້ວຍຄວາມໄວ ສູງສຸດ 350 ກິໂລແມັດຕໍ່ຊົ່ວໂມງ ຊ່ວຍຫລຸດຜ່ອນໄລຍະເວລາເດີນທາງຈາກຈາກາຕາ ເຖິງບັນດຸງຈາກຫລາຍກວ່າ 3 ຊົ່ວໂມງ ເຫລືອພຽງ 40 ນາທີເທົ່ານັ້ນ.
ສຳລັບການວາງລາງແບບບໍ່ໃຊ້ຫີນປູນທາງ (ballastless track) ຕະຫລອດແລວທາງລົດໄຟຄວາມໄວສູງຈາກາຕາ-ບັນດຸງສຳເລັດສົມບູນ. ຂະນະທີ່ການວາງລາງແບບບໍ່ໃຊ້ຫີນປູທາງມີຄວາມຍາວ ປະມານ 85 ກິໂລແມັດ ກວມເອົາ 60% ຂອງຄວາມຍາວທາງລົດໄຟທັງໝົດ 142 ກີໂລແມັດ ໃຊ້ແຜ່ນລາງ ຈຳນວນ 30.177ແຜ່ນ. ການໃຊ້ແຜ່ນລາງແບບບໍ່ໃຊ້ຫີນປູທາງ CRTS III ແມ່ນເຕັກໂນໂລຊີ ຂອງ ສປ ຈີນ ມີຂໍ້ດີເປັນໂຄງສ້າງແບບລຽບງ່າຍແຕ່ທົນທານມີຄວາມປອດໄພສູງສຸດ.
(ບັນນາທິການຂ່າວ: ຕ່າງປະເທດ)
ຮຽບຮຽງຂ່າວໂດຍ: ສະໄຫວ ລາດປາກດີ
