ທັບນັກກິລາຄົນພິການບານບ້ວງລໍ້ເລື່ອນ ທັງທີມຍິງ ແລະ ທີມຊາຍ ເຈົ້າພາບ ແຂວງຊຽງຂວາງ ຄວ້າ 2 ຫຼຽນຄຳ ການແຂ່ງຂັນບານບ້ວງລໍ້ເລື່ອນ ລາຍການ 3×3 ງານມະຫະກຳກິລາຄົນພິການແຫ່ງຊາດ ຄັ້ງທີ 3 ຫຼື “ຊຽງຂວາງ ພາຣາເກມ” ທີ່ແຂວງຊຽງຂວາງ ເປັນເຈົ້າພາບ. ຂະນະທີ່ ຫຼຽນເງິນ ຕົກເປັນຂອງທັບນັກກິລາຄົນພິການບານບ້ວງລໍ້ເລື່ອນ ນະຄອນຫຼວງວຽງຈັນ ສ່ວນຫຼຽນທອງເປັນຂອງແຂວງຈຳປາສັກ.
ພິທີມອບ-ຮັບຫຼຽນຕ່າງໆໃນການແຂ່ງຂັນບານບ້ວງລໍ້ເລື່ອນ ລາຍການ 3×3 “ຊຽງຂວາງ ພາຣາເກມ” ໄດ້ມີຂຶ້ນໃນຕອນເຊົ້າວັນທີ 15 ກຸມພາ 2023 ທີ່ສະໜາມກິລາໃນຮົ່ມໄຊຊະນະ ເມືອງແປກ ແຂວງຊຽງຂວາງ, ໃຫ້ກຽດເຂົ້າຮ່ວມ ແລະ ມອບໂດຍ ທ່ານ ນາງ ຂັນທະລີ ສີຣິພົງພັນ ຮອງລັດຖະມົນຕີກະຊວງສຶກສາທິການ ແລະ ກິລາ (ສສກ), ປະທານຄະນະກຳມະການພາຣາແລມປິກແຫ່ງຊາດລາວ ຫຼື ຄພລ ທັງເປັນຮອງປະທານຈັດງານ “ຊຽງຂວາງ ພາຣາເກມ” ແລະ ທ່ານ ທອງຜິວ ສີປັນຍາ ຮອງຫົວໜ້າພະແນກສຶກສາທິການ ແລະ ກິລາ ແຂວງຊຽງຂວາງ ພ້ອມດ້ວຍບັນດາຄະນະນຳ, ຄູຝຶກ ແລະ ນັກກິລາ ຕະຫຼອດຮອດກອງເຊຍຊາວແຂວງຊຽງຂວາງເຂົ້າຮ່ວມຢ່າງຫຼວງຫຼາຍ.
ການແຂ່ງຂັນບານບ້ວງລໍ້ເລື່ອນ “ຊຽງຂວາງ ພາຣາເກມ” ໄດ້ດຳເນີນແຂ່ງຂັນລະຫວ່າງວັນທີ 13-17 ກຸມພາ 2023 ຊຶ່ງມີການແຂ່ງຂັນຊີງໄຊຫຼຽນຄຳ 4 ລາຍການ ກໍຄື ລາຍການ 3×3 ຍິງ-ຊາຍ ແລະ ລາຍການ 5×5 ຍິງ-ຊາຍ ທັງສອງລາຍການດັ່ງກ່າວ ມີ 2 ແຂວງ ກໍຄື ແຂວງຈຳປາສັກ, ແຂວງຊຽງຂວາງ ແລະ ນະຄອນຫຼວງວຽງຈັນ ແຂ່ງຂັນໃນຮອບຄັດເລືອກພົບກັນໝົດຄັດເລືອກເອົາທີ 1 ແລະ ທີ 2 ໄປຊີງຫຼຽນຄຳ ສ່ວນທີ 3 ໄດ້ຫຼຽນທອງ ຄ້ອງຄໍເລີຍ ການແຂ່ງຂັນກຳນົດເວລາ 10 ນາທີ ແລະ ຊຸດເຂົ້າບ້ວງໄລ່ໜ່ວຍລະ 1 ແຕ້ມ. ຜ່ານການແຂ່ງຂັນ ລາຍການທຳອິດ ລາຍການ 3×3 ຍິງ-ຊາຍ ຊີງໄຊຫຼຽນຄຳ ໃນວັນທີ 15 ກຸມພານີ້ ຜົນປະກົດວ່າ: ທັບນັກກິລາຄົນພິການບານບ້ວງລໍ້ເລື່ອນ ທັງທີມຍິງ ແລະ ທີມຊາຍ ເຈົ້າພາບ ແຂວງຊຽງຂວາງ ສາມາດຄວ້າ 2 ຫຼຽນຄຳ ໄປຄອງ ດ້ວຍການເອົາຊະນະ ນັກກິລາຈາກ ນະຄອນຫຼວງວຽງຈັນ ໄດ້ທັງຍິງ-ຊາຍ ກໍຄື ທີມຍິງ ແຂວງຊຽງຂວາງ ຊະນະ ນະຄອນຫຼວງ 7-2 ຄະແນນ ແລະ ທີມຊາຍ ແຂວງຊຽງຂວາງ ຊະນະ ນະຄອນຫຼວງ 6-4 ຄະແນນ.
ຂ່າວໂດຍ: ສົງການ ພັນແພງດີ
