ການແຂ່ງຂັນເຕະບານ ຢູຟາ ແຊ໋ມປ້ຽນລີກ ລະດູການ 2022-2023 ຮອບ 16 ທີມສຸດທ້າຍນັດທຳອິດ ເມື່ອວັນທີ 14 ກຸມພາ 2023 ທີ່ສະໜາມປາກເດແພຣງ, ສະໂມສອນ ປາຣີດ ແຊງແຊກແມງ ຫຼື ເອແອັດເຊ ທີມຍັກໃຫຍ່ຈາກຝຣັ່ງ ທີ່ຜ່ານເຂົ້າຮອບມາຫຼິ້ນໃນຮອບນີ້ດ້ວຍການເປັນຮອງແຊ໋ມກຸ່ມ ເຮັດ ເປີດບ້ານຕ້ອນຮັບການມາຢາມຂອງ ສະໂມສອນ ບາເຢິນ ມິວນິກ ທີມຈາກເຢຍລະມັນ ແຊ໋ມກຸ່ມ ຊີ ໂດຍຜົນງານທີ່ພົບກັນມາ 5 ນັດຫຼັງ ເປັນ ບາເຢິນ ທີ່ເຮັດໄດ້ດີກວ່າຊະນະ 4 ເສຍ 1 ນັດ.
ເກມໃນເຄິ່ງເວລາທຳອິດ ຮູບເກມເປັນຂອງທີມຢາມທີ່ຫຼິ້ນໄດ້ດີກວ່າ ທັງການຄອງບານ ແລະ ເປີດເກມບຸກເຂົ້າໃສ່ໂດຍມີລຸ້ນຈົບສະກໍເຖິງ 9 ຄັ້ງ ແຕ່ຈັງຫວະສຸດທ້າຍຍັງບໍ່ຄົມພໍ ຍິງເຂົ້າຂອບພຽງ 2 ຄັ້ງ. ສ່ວນເຈົ້າຖິ່ນທີ່ໃສ່ຊື່ ຄີລຽນ ເອັມບັບເປ ເປັນຕົວສຳຮອງເຮັດໃຫ້ເກມບຸກນັ້ນ ຫວັງເພິ່ງພາພຽງ ລີໂອເນວ ເມດຊີ ກັບ ເນມາ ແຕ່ໂອກາດລຸ້ນສະກໍມີພຽງຄັ້ງດຽວ ແຖມຍັງຍິງບໍ່ເຂົ້າຂອບອີກຕ່າງຫາກ ເຮັດໃຫ້ຈົບເກມການແຂ່ງຂັນໃນເຄິ່ງເວລາທຳອິດ ຍັງບໍ່ມີປະຕູເກີດຂຶ້ນສະເໝີກັນຢູ່ 0-0.
ກັບມາເຂົ້າສູ່ເກມການແຂ່ງຂັນໃນເຄິ່ງເວລາທີສອງນາທີ 53 ບາເຢິນ ມາໄດ້ປະຕູຂຶ້ນນຳກ່ອນ 1-0 ຈາກຈັງຫວະອັນຟອນໂຊ ເດວິດ ຕົວສຳຮອງທີ່ລົງສະໜາມມາແທນຊູເອົາການເຊໂລ ໄດ້ບານທີ່ໄຫຼຄືນມາຈາກເອຣິກ ຊູໂປ-ໂມຕິງ ທາງເບື້ອງຊ້າຍ ແລ້ວເປີດບານໂຄ້ງເຂົ້າໄປໃນຂອບເຂດໂທດເສົາສອງໃຫ້ກັບ ຄິງເລ ໂກມັນ ຍິງດ້ວຍຂວາແບບບໍ່ຈັບບານລອຍຜ່ານມື ຈິອັນລຸຍຈິ ດອນນາຣຸມມາ ຜູ້ຮັກສາປະຕູເປແອັດເຊເຂົ້າປະຕູໄປ. ຈາກນັ້ນ ເຈົ້າຖິ່ນຕ້ອງແກ້ເກມດ້ວຍການສົ່ງ ເອັມບັບເປ ລົງມາແທນ ຄາລອດ ໂຊເລ ໃນນາທີ 57 ແລະ ສາມາດຍິງບານເຂົ້າປະຕູໄປ ແຕ່ ນູໂນ ເມນເດດ ຖືກຈັບເປັນຈັງຫວະລ້ຳໜ້າໄປ ພາດໂອກາດຕີສະເໝີຢ່າງໜ້າເສຍດາຍ ຂະນະທີ່ໄລຍະທົດເວລາບາດເຈັບ ເບນຢາແມັງ ປາວາ ກອງຫຼັງ ກໍໄດ້ຮັບໃບເຫຼືອງທີ່ສອງກາຍເປັນໃບແດງໄລ່ອອກຈາກສະໜາມໄປ. ຢ່າງໃດກໍຕາມເຖິງວ່າເຈົ້າບ້ານຈະບຸກຢ່າງໜັກ ແຕ່ກໍບໍ່ສາມາດຍິງປະຕູຕີສະເໝີໄດ້ ເຮັດໃຫ້ຈົບເກມການແຂ່ງຂັນ ປາຣີດ ແຊງແຊກແມງ ເປີດບ້ານເສຍໃຫ້ ບາເຢິນ ມິວນິກ 0-1 ປະຕູ ໃນນັດທຳອິດ ຮອບ 16 ທີມສຸດທ້າຍ ການແຂ່ງຂັນເຕະບານຢູຟາ ແຊ໋ມປ້ຽນລີກ 2022-2023. ສ່ວນເກມນັດທີສອງ ຈະກັບໄປແຂ່ງຂັນທີ່ ສະໜາມອັນລີອັນ ອາຣີນາ ໃນວັນທີ 8 ມີນາ 2023.
ຮຽບຮຽງໂດຍ: ພອນເພັດ ບຸນຄ້ຳ
