ສະຖາບັນຄົ້ນຄວ້າວິທະຍາສາດການສຶກສາ (ສວສ) ກະຊວງສຶກສາທິການ ແລະ ກິລາ ໄດ້ຈັດກອງປະຊຸມຄະນະກຳມະການກວດຜ່ານຮັບຮອງຫຼັກສູດ ແລະ ອຸປະກອນການສອນ, ປຶ້ມແບບຮຽນ ແລະ ປຶ້ມຄູ່ມືຄູພາສາຍີ່ປຸ່ນຊັ້ນມັດທະຍົມສຶກສາປີທີ 5 (ມ.5) ເມື່ອວັນທີ 13 ກຸມພາ ຜ່ານມາ ທີ່ສະຖາບັນດັ່ງກ່າວ, ໂດຍໃຫ້ກຽດເຂົ້າຮ່ວມຂອງທ່ານ ປອ ອ່ອນແກ້ວ ນວນນະວົງ ຜູ້ອຳນວຍການ ສະຖາບັນຄົ້ນຄວ້າວິທະຍາສາດການສຶກສາ, ທ່ານ ນາງ ໂຢຊິຮະຊິ ອະຊຸກະ ຫົວໜ້າພະແນກວັດທະນະທຳ ແລະ ຖະແຫຼງຂ່າວ ສະຖານທູດຍີ່ປຸ່ນ ປະຈຳ ສປປ ລາວ, ທ່ານ ໂຢຊຸເກະ ຄຸຊາກາເບະ ຜູ້ອຳນວຍການມູນນິທິຍີ່ປຸ່ນ ປະຈຳ ສປປ ລາວ, ພ້ອມດ້ວຍພະນັກງານ ວິຊາການ ແລະ ພາກສ່ວນທີ່ກ່ຽວຂ້ອງຢ່າງພ້ອມພຽງ.
ໃນກອງປະຊຸມ, ທ່ານ ປອ ອ່ອນແກ້ວ ນວນນະວົງ ໄດ້ກ່າວວ່າ: ກອງປະຊຸມໃນຄັ້ງນີ້ ແມ່ນມີຄວາມໝາຍຄວາມສຳຄັນຫຼາຍ ເພາະທຸກທ່ານທີ່ເຂົ້າຮ່ວມຈະໄດ້ພ້ອມກັນຄົ້ນຄວ້າ, ປັບປຸງ, ກວດຜ່ານ, ຮັບຮອງປຶ້ມແບບຮຽນ ແລະ ຄູ່ມືຄູພາສາຍີ່ປຸ່ນ ມ.5 ໃຫ້ສົມບູນ ແລະ ຖືກຕ້ອງ. ພ້ອມກັນນັ້ນ, ຍັງຮຽກຮ້ອງໃຫ້ທຸກທ່ານທີ່ເຂົ້າຮ່ວມກອງປະຊຸມ ຈົ່ງພ້ອມກັນສຸມຈິດສຸມໃຈປະກອບຄຳຄິດຄຳເຫັນໄປໃນທາງທີ່ມີລັກສະນະສ້າງສັນ, ຖືກຕ້ອງ, ເໝາະສົມ ເພື່ອເຮັດໃຫ້ປຶ້ມແບບຮຽນດັ່ງກ່າວສົມບູນແບບຂຶ້ນ.
ເພື່ອເປັນການຕອບສະໜອງຄວາມຮຽກຮ້ອງຕ້ອງການໃນການພັດທະນາການສຶກສາ (ດ້ານພາສາ) ໂດຍສະເພາະແມ່ນພາສາຍີ່ປຸ່ນຢູ່ໂຮງຮຽນຊັ້ນມັດທະຍົມປີທີ 5 ຂອງລາວ, ມູນນິທິຍີ່ປຸ່ນໄດ້ສົ່ງຊ່ຽວຊານດ້ານພາສາຍີ່ປຸ່ນມາປະຈຳຢູ່ ສວສ ເພື່ອເຂົ້າຮ່ວມໃນການພັດທະນາຫຼັກສູດປະສານສົມທົບສືບຕໍ່ເປົ້າໝາຍການສ້າງປຶ້ມແບບຮຽນຂຶ້ນໃນທຸກໆປີ. ສໍາລັບປຶ້ມແບບຮຽນພາສາຍີ່ປຸ່ນຊັ້ນມັດທະຍົມປີທີ 5 ແມ່ນຜົນງານການຮ່ວມມືຂອງບັນດາຂະແໜງການກ່ຽວຂ້ອງ ເພື່ອໃຫ້ບັນລຸຕາມຄວາມຮຽກຮ້ອງຕ້ອງການຂອງນັກຮຽນທີ່ຮຽນພາສາຍີ່ປຸ່ນເພີ່ມຂຶ້ນໃນແຕ່ລະປີ; ປຶ້ມຄູ່ມືຄູເຫຼັ້ມດັ່ງກ່າວ ຮຽບຮຽງຂຶ້ນເພື່ອແນະນຳໃຫ້ເຂົ້າໃຈກ່ຽວກັບວິທີການສອນໃຫ້ໄປຕາມເວລາທີ່ກຳນົດໄວ້ສຳລັບຄູສອນພາສາຍີ່ປຸ່ນເປັນພາສາຕ່າງປະເທດພາສາທີ 2, ໃນປຶ້ມເຫຼັ້ນນີ້ໄດ້ຈັດແບ່ງຈຳນວນຄັ້ງຂອງການຂຶ້ນຫ້ອງຢ່າງລະອຽດ ໂດຍແຕ່ລະຄັ້ງເນັ້ນໃສ່ 4 ທັກສະ ຄື: ການຟັງ, ເວົ້າ, ອ່ານ ແລະ ການຂຽນ ໃຫ້ນັກຮຽນມີສ່ວນຮ່ວມໃນການປະຕິກິດຈະກໍາ ໂດຍປະຕິບັດຕົວຈິງໃນການແກ້ບົດຝຶກຫັດ, ນໍາສະເໜີຜົນງານ ແລະ ກິດຈະກໍາຕ່າງໆ.
ໂດຍ ບົວລະພາ
