ກອງປະຊຸມສະຫລຸບວຽກງານການເງິນ ປີ 2022 ແລະ ເຜີຍແຜ່ນິຕິກຳສຳຄັນ ໃຫ້ບັນດາກົມອ້ອມຂ້າງ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ(ຖວທ) ຈັດຂຶ້ນໃນ ວັນທີ 14 ກຸມພາ 2023 ໂດຍການເຂົ້າຮ່ວມ ແລະ ເປີດກອງປະຊຸມ ຂອງ ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງ ຖວທ, ຫົວໜ້າກົມ, ຮອງກົມ ແລະ ວິຊາການກ່ຽວຂ້ອງບັນດາກົມ-ກອງ ຂອງກະຊວງ ຖວທ ເຂົ້າຮ່ວມ.
ກອງປະຊຸມຄັ້ງນີ້, ໄດ້ຮັບຟັງບົດສະຫລຸບການຈັດຕັ້ງປະຕິບັດງົບປະມານ ປະຈຳປີ 2022 ແລະ ທິດທາງແຜນການຈັດຕັ້ງງົບປະມານ ປີ 2023. ພ້ອມທັງ ຮັບຟັງການເຜີຍແຜ່ເອກະສານນິຕິກຳສຳຄັນຄື: ດຳລັດວ່າດ້ວຍການປະຢັດ ແລະ ຕ້ານການຟຸມເຟືອຍ ເລກທີ 205/ລບ ລົງວັນທີ 22/07/2022, ຂໍ້ຕົກລົງວ່າດ້ວຍກຳນົດໝາຍ ໃຊ້ຈ່າຍງົບປະມານຂອງລັດ ສະບັບເລກທີ 0200/ກງ ລົງວັນທີ 25 ມັງກອນ 2023, ຄຳແນະນໍາວ່າດ້ວຍການຈັດຕັ້ງປະຕິບັດແຜນງົບປະມານ ປະຈຳປີ 2023 ເລກທີ 3736/ກງ ລົງວັນທີ 25/11/2022, ລາຍງານຜົນການກວດສອບ, ຂໍ້ຄົງຄ້າງໄລຍະຜ່ານມາ ແລະ ເຜີຍແຜ່ການກວດສອບການຈັດລຽງປະຕິບັດງົບປະມານ ປີ 2021, ຄຳແນະນໍາກ່ຽວກັບການຈັດຕັ້ງປະຕິບັດ ກົດໝາຍວ່າດ້ວຍການຈັດຊື້-ຈັດຈ້າງດ້ວຍທຶນຂອງລັດ, ຄຳແນະນໍາກ່ຽວກັບການປະກອບເອກະສານ ແລະ ການກວດກາເອກະສານລາຍຈ່າຍງົບປະມານແຫ່ງລັດ ແລະ ທຶນຊ່ວຍເຫລືອທາງການ ເພື່ອການພັດທະນາຢູ່ຄັງເງິນແຫ່ງຊາດ ສະບັບເລກທີ່ 0866/ກງ ລົງວັນທີ 22 ມີນາ 2019, ແນະນໍາການຄິດໄລ່ບັນຊີເງິນເດືອນ ແລະ ແນະນໍາການສ້າງແຜນ(ຖານລາຍຮັບ) ລາຍຮັບ-ລາຍຈ່າຍ, ລາຍຮັບວິຊາການ ປີ 2023.
ພ້ອມນີ້, ຜູ້ເຂົ້າຮ່ວມ ໄດ້ພ້ອມກັນຄົ້ນຄວ້າປະກອບຄຳຄິດຄຳເຫັນ, ພິຈາລະນາ ຊອກໃຫ້ເຫັນດ້ານດີ ແລະ ດ້ານອ່ອນຂໍ້ຄົງຄ້າງ ຂອງວຽກງານຕິດຕາມກວດກາຢ່າງພາວະວິໄສ ແລະ ກົງໄປກົງມາ.
ຂ່າວ: ວຽງສະຫວັນ
