ຣາຟາເອວ ວາຣານ ກອງຫຼັງຂອງ ແມນເຊັສເຕີ ຢູໄນເຕັດ ປະກາດຢ່າງເປັນທາງການ ຂໍຢຸດເຊົາການລົງສະໜາມຮັບໃຊ້ທີມຊາດຝຣັ່ງແລ້ວ ກອງຫຼັງອາຍຸ 29 ປີ ຄວ້າແຊັມບານໂລກເມື່ອປີ 2018 ຍິງໄປ 5 ປະຕູ ຈາກການລົງສະໜາມ 93 ເກມໃຫ້ກັບທີມຊາດຝຣັ່ງ ນັບຕັ້ງແຕ່ເປີດຕົວຢ່າງເປັນທາງການເມື່ອປີ 2013. ເກມສຸດທ້າຍທີ່ເຂົາຮັບໃຊ້ທີມຊາດ ຄືນັດຊີງຊະນະເລີດເຕະບານໂລກ 2022 ເຊິ່ງຝຣັ່ງ ເສຍໃຫ້ ອາກຊັງຕິນ ໃນລະຫວ່າງການຍິງຈຸດໂທດຕັດສິນ.
” ການເປັນຕົວແທນຂອງປະເທດທີ່ຍິ່ງໃຫຍ່ຂອງເຮົາສໍາລັບທົດສະວັດ ຄືໜຶ່ງໃນກຽດສັກສີທີ່ຍິ່ງໃຫຍ່ທີ່ສຸດໃນຊີວິດຂອງຂ້ອຍ ” ວາຣານ ເປີດເຜີຍ. “ ທຸກໆຄັ້ງທີ່ຂ້ອຍໃສ່ເສື້ອສີຟ້າແສນພິເສດຕົວນີ້ ຂ້ອຍຮູ້ສຶກເຖິງຄວາມພູມໃຈຢ່າງຍິ່ງ ເປັນພາລະກິດທີ່ຕ້ອງທຸ່ມເທຢ່າງສຸດຕົວ ແລະ ຫົວໃຈ ເອົາຊະນະທຸກເກມທີ່ລົງໄປໃນສະໜາມ.” “ ຂ້ອຍໄຕ່ຕອງກ່ຽວກັບເລື່ອງນີ້ມາຫຼາຍເດືອນແລ້ວ ແລະ ຕັດສິນໃຈວ່າ ນີ້ຄືເວລາທີ່ເໝາະສົມສຳລັບຂ້ອຍໃນການຢຸດເຊົາຈາກທີມຊາດ.” ວາຣານ ເປັນນັກເຕະຝຣັ່ງຄົນຫຼ້າສຸດ ທີ່ໂບກມືອໍາລາທີມຫຼັງຈາກຈົບການແຂ່ງຂັນທີ່ປະເທດກາຕາ ໂດຍ ອູໂກ ຢໍຣິສ ຕັດສິນໃຈອອກໄປເມື່ອເດືອນມັງກອນທີ່ຜ່ານມາ.
“ ຕອນຍັງນ້ອຍ ຂ້ອຍຈື່ໄດ້ວ່າຕິດຕາມທີມຝຣັ່ງ 98 ທີມນີ້ ແລະ ນັກເຕະເຫຼົ່ານີ້ທີ່ເຮັດໃຫ້ເຮົາສໍາຜັດກັບອາລົມທີ່ເໜືອຄໍາບັນຍາຍ “ “ ຂ້ອຍຝັນທີ່ຈະໄດ້ເປັນໜຶ່ງໃນວິລະບູລຸດເຫຼົ່ານັ້ນ ແລະ 20 ປີຖັດມາ ຂ້ອຍໃຊ້ຊີວິດຢູ່ໃນໜຶ່ງປະສົບການທີ່ດີທີ່ສຸດໃນຊີວິດ ປະສົບການທີ່ເຮັດໃຫ້ຂ້ອຍພູມໃຈຢ່າງຍິ່ງ ເຮົານໍາຂັນກັບມາບ້ານ ” ” ຂ້ອຍບໍ່ມີທາງລືມເລືອນ ຂ້ອຍຍັງສໍາຜັດໄດ້ເຖິງທຸກໄລຍະອາລົມທີ່ຮູ້ສຶກໃນມື້ນັ້ນ ວັນທີ 15 ກໍລະກົດ 2018 ມັນຄືໜຶ່ງໃນຄວາມຊົງຈຳທີ່ໜ້າມະຫັດສະຈັນ ແລະ ມີຄຸນຄ່າໃນຊີວິດຂອງຂ້ອຍ. “
