ພິທີເປີດການນໍາໃຊ້ການແຈ້ງພາສີ ດ້ວຍລະບົບເອເລັກໂຕຣນິກ (NSWA+) ແລະ ເປີດການນໍາໃຊ້ ລະບົບການ ຊໍາລະຜ່ານ FinLink ຫລື ລະບົບການຊໍາລະສະສາງແບບລວມສູນ ຈັດຂຶ້ນໃນວັນທີ 2 ກຸມພາ 2023 ຢູ່ດ່ານພາສີສາກົນ ທ່າບົກ-ທ່ານາແລ້ງ ນະຄອນຫລວງວຽງຈັນ ໂດຍການເຂົ້າຮ່ວມຂອງທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ ແລະ ທ່ານ ບຸນປອນ ວັນນະຈິດ ຮອງລັດຖະມົນຕີກະຊວງການເງິນ, ມີທ່ານ ພູເຂົາຄໍາ ວັນນະວົງໄຊ ຫົວໜ້າກົມພາສີ, ມີຮອງຫົວໜ້າຫ້ອງການກະຊວງ, ຮັກສາການຫົວໜ້າກົມເຕັກໂນໂລຊີ ຂໍ້ມູນຂ່າວສານການເງິນ, ປະທານບໍລິສັດຜູ້ພັດທະນາ AIF, ພ້ອມດ້ວຍໜ່ວຍງານກ່ຽວຂ້ອງຈາກພາກລັດ ແລະ ພາກເອກະຊົນ ເຂົ້າຮ່ວມ.
ໃນພິທີ, ທ່ານ ພູເຂົາຄໍາ ວັນນະວົງໄຊ ໄດ້ໃຫ້ຮູ້ວ່າ: ລະບົບ NSWA+ ແມ່ນການເຊື່ອມຕໍ່ລະບົບ ASYCUDA ເຂົ້າກັບລະບົບແຈ້ງພາສີປະຕູດຽວແຫ່ງຊາດ ໃຫ້ເປັນອັນດຽວກັນ ແລະ ລວມສູນ ເພື່ອໃຫ້ຜູ້ປະ ກອບການ, ຕົວແທນຊິບປິ້ງ ແລະ ເຈົ້າໜ້າທີ່ພາສີ ໄດ້ນຳໃຊ້ໃນຈຸດດຽວ, ເຮັດໃຫ້ຂັ້ນຕອນ ຫລື ເວລາໃນການປ້ອນ ຂໍ້ມູນຂອງສິນຄ້າ, ເຄື່ອງຂອງລົງໃນລະບົບຂອງຜູ້ປະກອບການຫລຸດລົງ, ຊ່ວຍຫຼຸດຂັ້ນຕອນ, ຄ່າໃຊ້ຈ່າຍໃນການ ເດີນທາງ, ຢຸດການນໍາໃຊ້ເຈ້ຍໃນການແຈ້ງເສຍພາສີ ແລະ ຜູ້ບໍລິການແຈ້ງພາສີສາມາດແຈ້ງພາສີດ້ວຍຕົນເອງຢູ່ຫ້ອງ ການ, ສໍານັກງານຂອງຕົນໂດຍບໍ່ຈໍາເປັນຕ້ອງເດີນທາງເຂົ້າມາດ່ານເພື່ອແຈ້ງ ແລະ ພິມໃບແຈ້ງພາສີເປັນລາຍລະອຽດ ອອກຈາກລະບົບ ເພື່ອຍື່ນຕໍ່ເຈົ້າໜ້າທີ່ພາສີປະຈຳດ່ານອີກຕໍ່ໄປ, ຊຶ່ງໄດ້ທົດທອງຈັດຕັ້ງປະຕິບັດຢູ່ດ່ານພາສີສາກົນ ທ່າບົກ-ທ່ານາແລ້ງ ແລະ ໄດ້ຈະຜັນຂະຫຍາຍໄປລົງສູ່ບັນດາດ່ານສາກົນ, ເຂດເສດຖະກິດພິເສດ, ເຂດເສດຖະກິດ ສະເພາະໃນຂອບເຂດທົ່ວປະເທດ ແລະ ກ້າວສູ່ການເຊື່ອມໂຍງກັບລະບົບປະຕູດຽວອາຊຽນ (ASW).
ປັດຈຸບັນ, ມີຫລາຍກວ່າ 150 ບໍລິສັດ ເຂົ້າມາລົງທະບຽນລາຍເຊັນເອເລັກໂຕຣນິກ, ເພື່ອກະກຽມໃນການ ຈັດຕັ້ງປະຕິບັດນຳໃຊ້ລະບົບການແຈ້ງພາສີເອເລັກໂຕຣນິກລະບົບດັ່ງກ່າວ. ທັງນີ້, ເພື່ອເປັນການຍົກລະດັບມາດຕະ ຖານການບໍລິການຂອງຂະແໜງການລັດ, ເພີ່ມທະວີການອຳນວຍຄວາມສະດວກທາງດ້ານການຄ້າ ໃຫ້ນັບມື້ນັບສູງ ຂຶ້ນ, ອຳນວຍຄວາມສະດວກ, ໃຫ້ແກ່ບໍລິສັດຜູ້ນຳເຂົ້າ-ສົ່ງອອກ, ຮັບປະກັນໃນການຈັດຕັ້ງປະຕິບັດໜ້າທີ່ວິຊາສະ ເພາະຂອງເຈົ້າໜ້າທີ່ພາສີ.
ພ້ອມນີ້, ທ່ານ ວິໄລທອງ ສຸດທະວິໄລ ຮັກສາການຫົວໜ້າກົມເຕັກໂນໂລຊີຂໍ້ມູນຂ່າວສານ ການເງິນ ຍັງໄດ້ ລາຍງານກ່ຽວກັບການເປີດນໍາໃຊ້ລະບົບການຊໍາລະ FinLink ຫລື ລະບົບການຊໍາລະສະສາງແບບລວມສູນ, ຊຶ່ງໃນ ໄລຍະຜ່ານມາກົມເຕັກໂນໂລຊີຂໍ້ມູນຂ່າວສານການເງິນ ກະຊວງການເງິນ, ໄດ້ສົມທົບກັບບັນດາກົມກ່ຽວຂ້ອງ ເພື່ອ ພັດທະນາລະບົບເຊື່ອມຕໍ່ຮັບໃຊ້ວຽກງານເກັບລາຍຮັບງົບປະມານແຫ່ງລັດ ຜ່ານທະນາຄານທຸລະກິດ, ການພັດ ທະ ນາລະບົບທີ່ຜ່ານມາ ຍັງບໍ່ທັນລວມສູນເຮັດໃຫ້ມີຄວາມຫຍຸ້ງຍາກໃນການຄຸ້ມຄອງ, ເຊື່ອມຕໍ່, ສະຫລຸບລາຍງານ ໃຫ້ທັນສະພາບການ. ກະຊວງການເງິນ ຈຶ່ງໄດ້ພັດທະນາລະບົບຊຳລະພາສີ-ອາກອນ, ຄ່າທຳນຽມ ແລະ ຄ່າບໍລິການ ແບບລວມສູນ (ລະບົບ FINLINK) ຊຶ່ງແມ່ນໜຶ່ງໃນໂຄງການພັດທະນາຄຸ້ມຄອງການເກັບລາຍຮັບເປັນທັນສະໄໝ (ດີຈິຕອນ), ລະບົບ FINLINK ເປັນລະບົບໃຈກາງລວມສູນການເຊື່ອມຕໍ່ລະຫວ່າງ ລະບົບຄຸ້ມຄອງລາຍຮັບ-ລາຍຈ່າຍພາຍໃນຂອງກະຊວງການເງິນ ແລະ ເຊື່ອມຕໍ່ຫາລະບົບຊຳລະສະສາງຂອງທະນາຄານ ແຫ່ງ ສປປ ລາວ (ລະບົບ LAPASS/LapNET), ສາມາດຮອງຮັບການຊໍາລະຜ່ານທະນາຄານທຸລະກິດທັງໝົດ (ທີ່ເປັນສາມັກຊິກ ຂອງ LapNET) ໃນຂອບເຂດທົ່ວປະເທດ ເປັນຕົ້ນ ການຊໍາລະພາສີ-ອາກອນໃນການນໍາເຂົ້າ-ສົ່ງອອກສິນຄ້າເຄື່ອງ ຂອງ, ຄ່າທຳນຽມ ແລະ ຄ່າບໍລິການທັງໝົດຢູ່ດ່ານສາກົນ. ປັດຈຸບັນ, ການພັດທະນາສຳເລັດ ແລະ ໄດ້ເປີດນໍາໃຊ້ ລະບົບການຊໍາລະສະສາງແບບລວມສູນ, ສະເພາະການນໍາເຂົ້າ-ສົ່ງອອກສິນຄ້າເຄື່ອງຂອງຜ່ານແດນ, ການຊໍາລະພາ ສີ-ອາກອນ, ຄ່າທໍານຽມຄ່າບໍລິການທັງໝົດ ຢູ່ດ່ານພາສີສາກົນທ່າບົກ-ທ່ານາແລ້ງ ຕ້ອງຊໍາລະຜ່ານລະບົບ FINLINK.
ຂ່າວ-ພາບ: ກະຊວງການເງິນ
