ການສົ່ງອອກລົດຖີບສ້າງລາຍໄດ້ໃຫ້ແກ່ກຳປູເຈຍເຖິງ 966 ລ້ານໂດລາ

ຂ່າວຕ່າງປະເທດລາຍງານ ເມື່ອວັນທີ 31 ມັງກອນ ຜ່ານມາ, ກະຊວງການຄ້າຂອງກຳປູເຈຍລະບຸວ່າ ມູນຄ່າການສົ່ງອອກລົດຖີບສູ່ຕະຫຼາດຕ່າງປະເທດຂອງກຳປູເຈຍໃນປີ 2022 ຜ່ານມາ ຢູ່ທີ່ 966 ລ້ານໂດລາ ເພີ່ມຂຶ້ນ 48% ເມື່ອທຽບກັບສະຖິຕິ 651 ລ້ານໂດລາ ໃນປີກ່ອນໜ້າ. ທ່ານ ແປນ ໂສວິເຊດ ຮອງລັດຖະມົນຕີ ແລະ ໂຄສົກກະຊວງການຄ້າຂອງກຳປູເຈຍກ່າວວ່າ ການສົ່ງອອກລົດຖີບຄວບຄຸມຫຼາຍກວ່າ 50 ປະເທດ ແລະ ພາກພື້ນ ຊຶ່ງລວມເຖິງສະຫະພາບເອີຣົບ (EU), ອັງກິດ, ອາເມຣິກາ, ການາດາ, ຍີ່ປຸ່ນ ແລະ ຈີນ. ປັດຈຸບັນ, ລົດຖີບກາຍເປັນໜຶ່ງໃນຜະລິດຕະພັນທາງອຸດສາຫະກຳຫຼັກເພື່ອການສົ່ງອອກຂອງກຳປູເຈຍຮອງຈາກເສື້ອຜ້າ, ເກີບ ແລະ ສິນຄ້າເພື່ອການເດີນທາງ ໂດຍກຳປູເຈຍເປັນຜູ້ສົ່ງອອກລົດຖີບອັນດັບໜຶ່ງຂອງອາຊຽນ ຊຶ່ງໃນຂະນະນີ້ມີໂຮງງານເປີດດຳເນີນການ 5 ແຫ່ງ ຕັ້ງຢູ່ໃນເຂດເສດຖະກິດພິເສດທີ່ເມືອງບາເວດ ໃນແຂວງສະວາຍຣຽງ ທາງຕາເວັນອອກສ່ຽງໃຕ້ຂອງປະເທດ.