ທ່ານກິແກ້ວ ໄຂຄໍາພິທູນ ຮອງນາຍົກລັດຖະມົນຕີ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ເຕດ ບຸນນາກ ເລຂາທິການສະພາກາຊາດແຫ່ງຣາຊະອານາຈັກໄທ ໃນວັນທີ 2ກຸມພານີ້ ທີ່ສໍານັກງານນາຍົກລັດຖະມົນຕີ. ໃນໂອກາດດັ່ງກ່າວ, ທ່ານຮອງນາຍົກ ໄດ້ສະແດງຄວາມຕ້ອນຮັບ,ຊົມເຊີຍຕໍ່ທ່ານເຕດ ບຸນນາກ ທີ່ໄດ້ມາຢ້ຽມຢາມແລະ ເຮັດວຽກຢູ່ ສປປ ລາວ ຊຶ່ງເປັນການປະກອບສ່ວນ ຊ່ວຍເຫຼືອຊຶ່ງກັນແລະກັນ ລະຫວ່າງ ສປປ ລາວ-ຣາຊະອານາຈັກໄທ ເວົ້າລວມ,ເວົ້າສະເພາະ ແມ່ນອົງການກາແດງແຫ່ງຊາດລາວ-ສະພາກາຊາດແຫ່ງຣາຊະອານາຈັກໄທ, ທ່ານຮອງນາຍົກ ຍັງໄດ້ຕີລາຄາສູງຕໍ່ການພົວພັນຮ່ວມມື ຊ່ວຍເຫຼືອ ຂອງສະພາກາຊາດໄທ ຊຶ່ງເປັນການເສີມສ້າງສາຍພົວພັນມິດຕະພາບແລະການຮ່ວມມື ທີ່ເຄີຍມີມາແລ້ວນັ້ນ ໃຫ້ນັບມື້ຂະຫຍາຍຕົວຂຶ້ນເລື້ອຍໆ.
ຈາກນັ້ນ ທ່ານ ເຕດ ບຸນນາກ ຕາງໜ້າໃຫ້ກັບຄະນະ ສະແດງຄວາມຂອບໃຈຕໍ່ທ່ານ ຮອງນາຍົກທີ່ໃຫ້ການຕ້ອນຮັບອັນອົບອຸ່ນກັບຄະນະ ແລະ ພ້ອມທັງລາຍງານຈຸດປະສົງຂອງການມາຢ້ຽມຢາມ ສປປ ລາວໃຫ້ກັບທ່ານຮອງນາຍົກໄດ້ຮັບຊາບຕື່ມອີກ.
ຂ່າວ-ພາບ:ແສງຈັນ
