ຂ່າວສານຊີອາໄອລາຍງານ ເມື່ອບໍ່ດົນມານີ້, ອົງການກອງທຶນເງິນຕາສາກົນ (IMF) ໄດ້ເຜີຍແຜ່ບົດລາຍງານການສັງເກດເສດຖະກິດໂລກ ສະບັບປັບປຸງ ໂດຍໄດ້ປັບໂຕເລກການຄາດຄະເນການເຕີບໂຕທາງດ້ານເສດຖະກິດຈີນໃຫ້ສູງຂຶ້ນເຖິງລະດັບ 5,2% ແລະ ເຫັນວ່າ ຈີນໄດ້ປັບປຸງນະໂຍບາຍປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ແລະ ປັດໄຈອື່ນໆ ຈະປັບປຸງການເຕີບໂຕຂອງເສດຖະກິດຈີນກໍຄືເສດຖະກິດໂລກໃນອະນາຄົດ.
IMF ຄາດວ່າ ເສດຖະກິດຈີນຈະເຕີບໂຕ 5,2% ໃນປີນີ້, ສູງກວ່າ 0,8% ເມື່ອທຽບໃສ່ໂຕເລກການຄາດຄະເນໄວ້ກ່ອນໜ້ານີ້ ແລະ ປີໜ້າຈະສາມາດສືບຕໍ່ຮັກສາການເຕີບໂຕຢູ່ໃນລະດັບ 4,5%. ໃນກຸ່ມເສດຖະກິດຕົ້ນຕໍອື່ນໆ, ຈັງຫວະການເຕີບໂຕຂອງເສດຖະກິດອາເມຣິກາ ຈະເພີ່ມຂຶ້ນ 1,4% ແລະ 1% ໃນປີ 2023 ແລະ ປີ 2024 ຕາມລຳດັບ; ເສດຖະກິດຂອງເຂດໃຊ້ເງິນເອີໂຣອາດຈະສາມາດເຕີບໂຕ 0,7% ແລະ 1,6% ໃນປີນີ້ ແລະ ປີ 2024 ຕາມລຳດັບ. ນອກຈາກນີ້, IMF ຍັງເຫັນວ່າ ການເຄື່ອນໄຫວດ້ານເສດຖະກິດໂລກຍັງປະເຊີນໜ້າກັບຄວາມກົດດັນຈາກທະນາຄານກາງຂອງກຸ່ມເສດຖະກິດຕ່າງໆທີ່ປັບອັດຕາດອກເບ້ຍໃຫ້ສູງຂຶ້ນ ແລະ ສະຖານະການໂລກທີ່ຍັງຄົງແກ່ຍາວເວລາ ແຕ່ວ່າຈີນໄດ້ປັບປ່ຽນນະໂຍບາຍປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ໃຫ້ດີຂຶ້ນ ຈະເປີດທາງໃຫ້ແກ່ເສດຖະກິດເຕີບໂຕໄດ້ໄວກວ່າເກົ່າ ແລະ ສະພາບໄພເງິນເຟີ້ໃນທົ່ວໂລກກໍອາດຈະສາມາດຜ່ອນຄາຍລົງ.
