ກົມກໍ່ສ້າງ-ຄຸ້ມຄອງຊັບສິນກົມໃຫຍ່ພະລາທິການກອງທັບໄດ້ເປີດກອງປະຊຸມສະຫຼຸບຖອດຖອນບົດຮຽນວຽກງານຄຸ້ມຄອງໄຟຟ້າພາຍໃນກອງທັບ ຮ່ວມກັບ ລັດວິສາຫະກິດໄຟຟ້າລາວ ແລະ ພາກສ່ວນທີ່ກ່ຽວຂ້ອງໃນເຂດໃຈກາງນະຄອນຫຼວງຂຶ້ນໃນວັນທີ 30 ມັງກອນຜ່ານມາໂດຍເປັນກຽດເຂົ້າຮ່ວມເປັນປະທານຂອງ ສະຫາຍພົນຈັດຕະວາ ວົງສັກ ສີພັນດອນ ຮອງຫົວໜ້າກົມໃຫຍ່ພະລາທິການກອງທັບ, ມີ ສະຫາຍພັນ ເອກ ສົມໃຈຄໍາມະນີ ຫົວໜ້າກົມກໍ່ສ້າງ-ຄຸ້ມຄອງຊັບສິນກົມໃຫຍ່ພະລາທິການກອງທັບ, ມີຜູ້ຕາງໜ້າບໍລິສັດໄຟຟ້າລາວ, ໄຟຟ້ານະຄອນຫຼວງ, ມີພາກສ່ວນທີ່ກ່ຽວຂ້ອງເຂົ້າຮ່ວມ. ໃນກອງປະຊຸມ, ສະຫາຍພັນເອກ ສຸກ ພະມີໄຊ ຮອງຫົວໜ້າກົມກໍ່ສ້າງ-ຄຸ້ມຄອງຊັບສິນກົມໃຫຍ່ພະລາທິການກອງທັບໄດ້ຂຶ້ນຜ່ານບົດສະຫຼຸບວຽກງານການຄຸ້ມຄອງໄຟຟ້າພາຍໃນກອງທັບໃນໄລຍະຊຸມປີຜ່ານມາ, ໄດ້ຍົກໃຫ້ເຫັນສະພາບການລວມທີ່ສົ່ງຜົນກະທົບຕໍ່ກອງທັບ, ດ້ານດີທີ່ພົ້ນເດັ່ນ, ຈຸດອ່ອນຄົງຄ້າງ, ບົດຮຽນທີ່ຖອດຖອນໄດ້ ແລະ ທິດທາງແກ້ໄຂໃນຕໍ່ໜ້າ, ຜ່ານການລົງຊີ້ນຳ, ຕິດຕາມກວດກາຂອງກົມກໍ່ສ້າງ-ຄຸ້ມຄອງຊັບສິນເຫັນວ່າແກ້ໄຂໄດ້ 100% ແລະ ມີຫຼາຍກົມກອງກຳລັງຫຼວງໄດ້ສະຫຼຸບສັງລວມສົ່ງສະຖິຕິການຊົມໃຊ້ນໍ້າ-ໄຟຟ້າ ແລະ ໃບຄ່ານໍ້າ-ຄ່າໄຟຟ້າໃຫ້ກົມກໍ່ສ້າງ-ຄຸ້ມຄອງຊັບສິນ ໄດ້ຕາມກຳນົດເວລາ, ໂດຍຄະນະພັກ-ຄະນະບັນຊາແຕ່ລະກອງ ເຫັນໄດ້ຄວາມສຳຄັນຕໍ່ວຽກງານຄຸ້ມຄອງລະບົບນໍ້າ-ໄຟຟ້າ ແລະ ໄດ້ຫັນເຂົ້າສູ່ລະບົບ, ລະບຽບການກໍຄືແບ່ງຄວາມຮັບຜິດຊອບຕາມສາຍວິຊາສະເພາະ ຈຶ່ງເຮັດໃຫ້ສະດວກໃນການຄຸ້ມຄອງ ແລະ ຕິດຕາມການຊົມໃຊ້ໃນແຕ່ລະເດືອນ, ບັນດາກົມກອງໄດ້ເປັນເຈົ້າການປະສານສົມທົບ ກັບ ບໍລິສັດນໍ້າປະປາ ແລະ ໄຟຟ້າ ທີ່ກົມກອງຕົນເອງຕັ້ງທັບຢູ່, ໃນການກວດກາ, ຕິດຕາມຢ່າງເປັນປົກກະຕິໃນກໍລະນີມີນ້ຳຮົ່ວໄຫຼ ຫຼື ໄຟຟ້າຂັດຂ້ອງ, ລວມທັງການຈົດກ່າຍໂຕເລກໝໍ້ນັບໄຟຟ້າຕ່າງໆ.
ສ່ວນຈຸດອ່ອນຂໍ້ຄົງຄ້າງແມ່ນເກີດຈາກຄວາມບໍ່ຮັບຜິດຊອບດັ່ງກ່າວ, ເຮັດໃຫ້ພະນັກງານ-ນັກຮົບຈຳນວນໜຶ່ງຍັງນຳໃຊ້ໄຟຟ້າຢ່າງຟຸ່ມເຟືອຍ, ໂດຍບໍ່ໄດ້ຄຳນຶງເຖີງຄວາມສິ້ນເປືອງເຖິງມູນຄ່າ, ການໃຊ້ຈ່າຍຄ່າໄຟຟ້າ ຫຼື ຜົນກະທົບເຖິງເຕັກນິກ ເຮັດໃຫ້ບໍ່ມີຄວາມປອດໄພຕໍ່ຊີວິດ ແລະ ຊັບສິນ ຂອງສ່ວນລວມ ຈຶ່ງເຮັດໃຫ້ມີໜີ້ສິນເພີ່ມຂຶ້ນທຸກໆປີ, ບາງກົມກອງເກີດຈາກການປະສານ ລະຫວ່າງ ພາກສ່ວນໄຟຟ້າ ແລະ ຜູ້ຊົມໃຊ້ໄຟຟ້າ, ເຮັດວຽກບໍ່ທັນໃກ້ຊິດຕິດແທດຊຶ່ງກັນ ແລະ ກັນ, ການຈົດເລກກົງເຕີຍັງບໍ່ຊັດເຈນ, ມີການກະຕວງເຂົ້າບໍ່ເຖິງກົງເຕີໄຟຟ້າ, ການຄິດໄລ່ຕົວຄູນຍັງບໍ່ສອດຄ່ອງກັບລະບຽບການ, ຈາກນັ້ນ ບັນດາຜູ້ແທນ, ວິຊາການທີ່ກ່ຽວຂ້ອງທີ່ເຂົ້າຮ່ວມກອງປະຊຸມກໍໄດ້ຂຶ້ນປະກອບຄໍາຄິດຄໍາເຫັນໃສ່ເນື້ອໃນບົດສະຫຼຸບ ແລະ ທິດທາງແຜນການໃນຕໍ່ໜ້າ, ພ້ອມທັງຄົ້ນຄວ້າແລກປ່ຽນຖອດຖອນບົດຮຽນໃນການຄຸ້ມຄອງນໍາໃຊ້ໄຟຟ້າຂົງເຂດກອງທັບໃນທົ່ວປະເທດ ແລະ ປຶກສາຫາລືແກ້ໄຂບັນຫາໜີ້ສິນຄ່າກະເເສໄຟຟ້າຂອງບັນດາກົມກອງຕ່າງໆຂອງກອງທັບ ໃຫ້ຫຼຸດລົງ ເພື່ອປົດບັນຫາໜີ້ສິນໃນຕໍ່ໜ້າໃຫ້ໝົດໄປ.
ສະຫາຍພົນຈັດຕະວາ ວົງສັກ ສີພັນດອນ ໄດ້ກຽດໂອ້ລົມຕໍ່ກອງປະຊຸມ ແລະ ຊີ້ທິດເຍືອງທາງໃຫ້ຄະນະພັກ-ຄະນະບັນຊາບັນດາກົມກອງ ແລະ ພະນັກງານທຸກພາກສ່ວນຕ່າງໆທີ່ກ່ຽວຂ້ອງ, ຈົ່ງເອົາໃຈໃສ່ສືບຕໍ່ກວດກາ ແລະ ເຜີຍແຜ່ຄຳສັ່ງແນະນຳຂອງກະຊວງປ້ອງກັນປະເທດໃຫ້ເຖິງບັນດາກົມກອງກຳລັງຫລວງ-ກຳລັງທ້ອງຖິ່ນ ເພື່ອຊຸກຍູ້ໃຫ້ຄະນະພັກ-ຄະນະບັນຊາເປັນເຈົ້າການຍົກສູງຄວາມຮັບຜິດຊອບ ແລະ ຈັດຕັ້ງປະຕິບັດຢ່າງເຂັ້ມງວດ, ປັບປຸງນິຕິກຳ, ຂໍ້ກຳນົດ, ລະບຽບການໃນການຊົມໃຊ້ນໍ້າ, ໄຟຟ້າ ຂອງກອງທັບ ໃຫ້ຮັດກຸມຂຶ້ນກວ່າເກົ່າ ເພື່ອຕັດບັນຫາການເກື້ອກູນ, ການຊົມໃຊ້ແບບບໍ່ສອດຄ່ອງ, ການຟຸ່ມເຟືອຍໃຫ້ຫຼຸດລົງ ເພື່ອປົດບັນຫາໜີ້ສິນໃນຕໍ່ໜ້າ, ແກ້ໄຂຂອດປະສານງານ ລະຫວ່າງ ໜ່ວຍງານຂອງໄຟຟ້າ ແລະ ພາກສ່ວນຄຸ້ມຄອງນໍາໃຊ້ໄຟຟ້າໃຫ້ເຂົ້າເຖິງກັນ ແລະ ກັນ, ການຈົດກ່າຍກົງເຕີໂຕເລກຕ້ອງໃຫ້ລະອຽດຈະແຈ້ງ ແລະ ຮັບຮູ້ນຳກັນ, ເອົາໃຈໃສ່ຄຸ້ມຄອງວັດຖຸອຸປະກອນການນໍາໃຊ້ໄຟຟ້າ, ຮັບປະກັນການຕົກເຮ່ຍ, ຄຸ້ມຄອງນຳໃຊ້ໄຟຟ້າໃນທົ່ວຖັນແຖວຂອງກອງທັບ, ນັບແຕ່ກໍາລັງຫຼວງ ລົງຮອດກໍາລັງທ້ອງຖິ່ນ ເພື່ອເຮັດໃຫ້ບັນດາກົມກອງເຂົ້າໃຈ ແລະ ຮັບຮູ້ການໃຊ້ໄຟຟ້າຢ່າງມີປະສິດທິຜົນ ແລະ ປອດໄຟທາງດ້ານຊີວິດ, ຊັບສິນຂອງສ່ວນລວມ, ໂດຍຖືເອົາວຽກງານສຶກສາອົບຮົມການເມືອງແນວຄິດໃຫ້ພະນັກງານ, ນັກຮົບ, ປູກຈິດສຳນຶກໃນການຊົມໃຊ້ຢ່າງປະຢັດ.
ຂ່າວ-ພາບ: ຄໍາປະສົງ ລາດຊະວົງ
