WHO ຊີ້ບອກວ່າ ໂຄວິດ-19 ຍັງເປັນພາວະສຸກເສີນດ້ານສາທາລະນະສຸກ

ຂ່າວຕ່າງປະເທດລາຍງານ ເມື່ອວັນທີ 30 ມັງກອນ ຜ່ານມາ, ອົງການອະນາໄມໂລກ (WHO) ໄດ້ອອກຖະແຫຼງການວ່າ ສະຖານະການໆແຜ່ລະບາດຂອງພະຍາດໂຄວິດ-19 ຍັງຖືວ່າເປັນພາວະສຸກເສີນດ້ານສາທາລະນະສຸກສາກົນ ໂດຍ WHO ໄດ້ປະກາດຄັ້ງທໍາອິດເມື່ອວັນທີ 30 ມັງກອນ 2020. ຖະແຫຼງການລະບຸວ່າ ສະຖານະການໆແຜ່ລະບາດຂອງພະຍາດໂຄວິດ-19 ມາເຖິງຈຸດປ່ຽນ ເຖິງຢ່າງໃດກໍຕາມ, ການບໍລິຫານຈັດການສະຖານະການຍັງຄົງຕ້ອງເປັນໄປດ້ວຍຄວາມລະມັດລະວັງ ເພື່ອບັນເທົາຜົນກະທົບທາງລົບ ແລະ ຍັງຄົງມີຄວາມຈຳເປັນໃນລະດັບສູງເຊັ່ນດຽວກັນທີ່ກຸ່ມສ່ຽງສູງ ແລະ ກຸ່ມປະເທດທີ່ອ່ອນແອຕ້ອງໄດ້ຮັບການສັກວັກຊິນຢ່າງທົ່ວເຖິງ. ອີກຢ່າງໜຶ່ງ, ທ່ານ ດຣ. ເທໂດຣສ ອາດຮານອມ ເກເບຣເຢຊຸສ ຜູ້ອຳນວຍການ WHO ເຄີຍກ່າວໃນລະຫວ່າງການປະກາດເພີ່ມເວລາການໃຫ້ພະຍາດໂຄວິດ-19 ຍັງຄົງເປັນສະຖານະການສຸກເສີນເມື່ອເດືອນຕຸລາ 2022 ຜ່ານມາວ່າ ພະຍາດໂຄວິດ-19 ເປັນພະຍາດທີ່ສ້າງຄວາມປະຫຼາດໃຈໃຫ້ແກ່ມະນຸດຫຼາຍຄັ້ງແລ້ວ ແລະ ອາດຈະເກີດຂຶ້ນອີກກໍໄດ້.