ວິທະຍຸກະຈາຍສຽງຫວຽດນາມລາຍງານວ່າ: ເມື່ອບໍ່ດົນຜ່ານມາ, ທ່ານ ຟ້າມມິງຈິງ ນາຍົກລັດຖະ ມົນຕີ ຫວຽດນາມ ແລະ ຄະນະປະຕິບັດງານຂອງລັດຖະບານ ໄດ້ລົງສຳຫຼວດເສັ້ນທາງດ່ວນເຊື່ອມຕໍ່ລະຫວ່າງ ແຂວງນິງບິງ – ແຂວງນາມດິງ – ແຂວງທາຍບິ່ງ – ແຂວງຫາຍຟອງ.
ຂ່າວລະບຸວ່າ: ພາຍຫຼັງການສຳຫຼວດ ແລະ ຮັບຟັງການລາຍງານສະພາບການໃນຕົວຈິງ, ທ່ານ ຟ້າມມິງຈິງ ເນັ້ນໜັກວ່າ: ເສັ້ນທາງດ່ວນເຊື່ອມຕໍ່ລະຫວ່າງ ແຂວງນິງບິງ – ແຂວງນາມດິງ – ແຂວງທາຍບິ່ງ – ແຂວງຫາຍຟອງ ແມ່ນເສັ້ນທາງສຳຄັນ, ມີຄວາມໝາຍຍຸດທະສາດ ຕໍ່ເຂດທົ່ງພຽງແມ່ນ້ຳແດງທາງພາກຕາເວັນອອກສ່ຽງໃຕ້. ເສັ້ນທາງນີ້ຈະປະກອບສ່ວນຊຸກຍູ້ການເຊື່ອມຕໍ່ເຂດຍຸດທະສາດສຳຄັນ, ແມ່ນເສັ້ນທາງສັ້ນທີ່ສຸດທີ່ເຊື່ອມຕໍ່ກັບທ່າກຳປັ່ນຫາຍຟອງ ກັບຊາຍແດນຂອງຈີນ. ເມື່ອກໍ່ສ້າງສຳເລັດ ຈະສ້າງບາດກ້າວບຸກທະລຸໃຫ້ແກ່ບັນດາທ້ອງຖິ່ນ, ເປັນຕົ້ນແມ່ນການດຶງດູດນັກລົງທຶນ. ທ່ານ ຟ້າມມິງຈິງ ໄດ້ຮຽກຮ້ອງບັນດາກະຊວງ, ຂະແໜງການ, ທ້ອງຖິ່ນທີ່ກ່ຽວຂ້ອງ ຈົ່ງສຸມທຸກແຫຼ່ງກຳລັງເພື່ອກໍ່ສ້າງເສັ້ນທາງນີ້ໃຫ້ສຳເລັດຕາມກຳນົດ.
