ສ ເກົາຫຼີ ປັບຂຶ້ນອັດຕາດອກເບ້ຍ ເພື່ອສະກັດກັັ້ນເງິນເຟີ້

ຂ່າວຕ່າງປະເທດລາຍງານ ເມື່ອທ້າຍອາທິດຜ່ານມາ, ທະນາຄານແຫ່ງປະເທດ ສ ເກົາຫຼີ (BOK) ໄດ້ປະກາດປັບຂຶ້ນອັດຕາດອກເບ້ຍ 0,25% ສູ່ລະດັບ 3,5% ຖືວ່າເປັນການປັບຂຶ້ນອັດຕາດອກເບ້ຍຄັ້ງທີ 8 ນັບຕັ້ງແຕ່ເດືອນມັງກອນ 2022 ແລະ ເປັນການປັບຂຶ້ນອັດຕາດອກເບ້ຍສູງທີ່ສຸດນັບຕັ້ງແຕ່ປີ 2008. BOK ໄດ້ອອກຖະແຫຼງການວ່າ ການປັບເພີ່ມອັດຕາດອກເບ້ຍແມ່ນເພື່ອໃຫ້ລາຄາສິນຄ້າຄົງທີ່ ເນື່ອງຈາກອັດຕາເງິນເຟີ້ຍັງຄົງເພີ່ມສູງຂຶ້ນ ແລະ ອາດຈະສູງກວ່າທີ່ຄາດຄະເນໄວ້ອີກໄລຍະໜຶ່ງ. ການປັບຂຶ້ນອັດຕາດອກເບ້ຍຂອງ ສ ເກົາຫຼີ ສອດຄ່ອງກັບທະນາຄານກາງຂອງປະເທດອື່ນໆ ທີ່ພະຍາຍາມຄວບຄຸມລາຄາສິນຄ້າທີ່ເພີ່ມສູງຂຶ້ນເມື່ອປີ 2022 ທີ່ຜ່ານມາ ຫຼັງຈາກເກີດສະຖານະການໂລກໃນປັດຈຸບັນ ສົ່ງຜົນໃຫ້ຕົ້ນທຶນພະລັງງານ ແລະ ອາຫານແພງຂຶ້ນ. ທັງນີ້, ຍັງເປັນຜົນມາຈາກຄວາມຈຳເປັນທີ່ຕ້ອງຂຶ້ນອັດຕາດອກເບ້ຍໃຫ້ເທົ່າທັນທະນາຄານກາງອາເມຣິກາ (ເຟດ) ເພື່ອປ້ອງກັນເງິນທຶນຕ່າງປະເທດໄຫຼອອກ ແລະ ຮັກສາສະຖຽນລະພາບສະກຸນເງິນວອນທີ່ອ່ອນຄ່າທີ່ສຸດໃນຮອບ 13 ປີ ເມື່ອປີທີ່ຜ່ານມາ. ທັງນີ້, ດັດຊະນີລາຄາຜູ້ບໍລິໂພກ ສ ເກົາຫຼີ ເພີ່ມຂຶ້ນສູ່ລະດັບສູງທີ່ສຸດເປັນປະຫວັດສາດ 5% ເມື່ອເດືອນທັນວາ 2022 ຜ່ານມາ ສ້າງຄວາມກັງວົນຕໍ່ BOK ຢ່າງຕໍ່ເນື່ອງ ຊຶ່ງຄາດວ່າ ລາຄາສິນຄ້າຈະເພີ່ມຂຶ້ນຈົນເຖິງທ້າຍເດືອນກຸມພາ 2023 ແລະ ຈະເລີ່ມຫຼຸດລົງສູ່ລະດັບ 3,6% ໃນໄລຍະທ້າຍປີ 2023.