ທ່ານນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ ຮອງປະທານປະເທດ ແຫ່ງ ສປປ ລາວ ໄດ້ເຄື່ອນໄຫວຢ້ຽມຢາມ ແລະ ຊີ້ນຳວຽກງານ ຢູ່ ແຂວງຈຳປາສັກໃນວັນທີ 16 ມັງກອນ ນີ້ ທີ່ຫ້ອງວ່າການແຂວງ. ໂດຍການຕ້ອນຮັບ ຂອງ ທ່ານ ວິໄລວົງ ບຸດດາຄຳ ກຳມະການສູນກາງພັກ ເລຂາພັກແຂວງ ເຈົ້າແຂວງຈຳປາສັກ ພ້ອມດ້ວຍຄະນະນຳ, ມີຫົວໜ້າພະແນກການ ໃນຂົງເຂດວຽກງານເສດຖະກິດ ເຂົ້າຮ່ວມ.
ໂອກາດນີ້, ທ່ານຮອງປະທານປະເທດ ໄດ້ຮັບຟັງການລາຍງານ ຈາກບັນດາຫົວໜ້າພະແນກການ ກ່ຽວກັບ ການຈັດຕັ້ງປະຕິບັດວຽກງານປີ 2022 ແລະ ທິດທາງແຜນປີຕໍ່ໜ້າ ໃນຂົງເຂດຂະແໜງການເງິນ; ລາຍງານການປ່ອຍສິນເຊື່ອ ແລະຍອດເຫຼືອເງິນຝາກ; ຮັບຟັງລາຍງານ ຂໍ້ສະດວກ ແລະ ຂໍ້ຫຍຸ້ງຍາກ ກ່ຽວກັບການລົງທຶນຜ່ານປະຕູດຽວ, ການຈັດສັນທຶນຕາມການແບ່ງຂັ້ນຄຸ້ມຄອງຂອງແຂວງ; ຮັບຟັງລາຍງານການສົ່ງເສີມການສົ່ງອອກສິນຄ້າ, ຂໍ້ສະດວກ ແລະ ຂໍ້ຫຍຸ້ງຍາກ ໃນການຈັດຕັ້ງປະຕິບັດນະໂຍບາຍສົ່ງເສີມການຜະລິດ ເປັນສິນຄ້າ; ກົນໄກການຕະຫຼາດ ໃນການສົ່ງເສີມສິນຄ້າລາວ ຈາກ ແຂວງ ຈຳປາສັກສົ່ງໄປຂາຍແຂວງອື່ນໆ ລວມທັງສົ່ງອອກໄປຕ່າງປະເທດ; ການຄຸ້ມຄອງລາຄາສິນຄ້າ ແລະ ການອະນຸຍາດນຳເຂົ້າສິນຄ້າ ແລະ ຮັບຟັງລາຍງານການສົ່ງເສີມການຜະລິດກະສິກຳ ໂດຍສະເພາະສິນຄ້າທີ່ລັດຖະບານລາວໄດ້ເຊັນ ກັບ ຫວຽດນາມ, ຈີນ ແລະໄທ; ກົນໄກການປະສານງານກ່ຽວກັບການສົ່ງເສີມການຜະລິດ ກັບກະຊວງທີ່ກ່ຽວຂ້ອງ ຊີ້ ໃຫ້ເຫັນດ້ານດີ ແລະ ດ້ານອ່ອນ ທີ່ຈະໄດ້ສືບຕໍ່ແກ້ໄຂ.
ໂອກາດດຽວກັນນີ້, ທ່ານນາງ ປານີ ຢາທໍ່ຕູ້ ໄດ້ມີຄຳເຫັນໂອ້ລົມ ໂດຍໄດ້ສະແດງຄວາມຍ້ອງຍໍຊົມເຊີຍຄະນະພັກ-ອົງການປົກຄອງແຂວງ ທີ່ໄດ້ພະຍາຍາມໃນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ; ແຜນງົບປະມານ ຂອງລັດຖະບານ ເວົ້າລວມ, ເວົ້າສະເພາະ ຂອງແຂວງຈຳປາສັກ ທີ່ມີຫຼາຍດ້ານປະຕິບັດໄດ້ດີ, ບັນດາພະແນກການມີຄວາມເປັນເຈົ້າການໃນການຈັດຕັ້ງປະຕິບັດ ສິດ, ໜ້າທີ່ ພາລະບົດບາດ ມີການແບ່ງຂັ້ນຄຸ້ມຄອງ ແລະ ຫັນເຂົ້າສູ່ການຄຸ້ມຄອງລັດດ້ວຍລະບຽບກົດໝາຍ; ພ້ອມນັ້ນ ທ່ານຮອງປະທານປະເທດ ຍັງໄດ້ເນັ້ນໃຫ້ ຄະນະພັກ-ອົງການປົກຄອງແຂວງຈຳປາສັກ ເອົາໃຈໃສ່ໃນການຊີ້ນຳ ການຈັດຕັ້ງປະຕິບັດ 2 ວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ໃຫ້ຫັນເຂົ້າສູ່ແຜນງານ ເປັນໂຄງການລະອຽດ ເປັນຄວາມຮັບຜິດຊອບລວມຂອງທຸກຂະແໜງການ, ລວມທັງ ຜູ້ປະກອບການ ແລະປະຊາຊົນ, ເພີ່ມທະວີການຄຸ້ມຄອງເງິນຕາ, ສົ່ງເສີມການຜະລິດເປັນສິນຄ້າ ດ້ວຍການສ້າງກົນໄກປະສານງານໃນການຮ່ວມມື ແລະ ການແກ້ໄຂວຽກງານດັ່ງກ່າວ ຕ້ອງໄດ້ຮັບການຈັດຕັ້ງປະຕິບັດຢ່າງເຂັ້ມງວດ.
ຂ່າວ: ທັດຊະນະ, ພາບ: ພູທິບສະຫວັນ
