ໃນວັນທີ 13 ມັງກອນ 2023 ນີ້ ພະແນກການຕ່າງປະເທດ ແຂວງວຽງຈັນ ໄດ້ຈັດກອງປະຊຸມ ສະຫຼູບການຈັດຕັ້ງປະຕິບັດວຽກງານ ປີ 2022 ແລະ ວາງທິດທາງແຜນການ ປີ 2023, ພ້ອມຍ້ອງຍໍຜູ້ທີ່ມີຜົນງານດີເດັ່ນໃນໄລຍະ 5 ປີຜ່ານມາ ໂດຍການເປັນກຽດເຂົ້າຮ່ວມຂອງ ທ່ານ ທອງສະຫວັນ ວົງສຳພັນ ຮອງເລຂາພັກແຂວງວຽງຈັນ, ຜູ້ຊີ້ນຳວຽກພັກ-ພະນັກງານ, ມີຕາງໜ້າພະແນກການອ້ອມຂ້າງ, ພ້ອມດ້ວຍພະນັກງານພາຍໃນພະແນກດັ່ງກ່າວເຂົ້າຮ່ວມ.
ທ່ານ ສັນຕິພາບ ນິລະເກດ ຫົວໜ້າພະແນກການຕ່າງປະເທດ ແຂວງວຽງຈັນ ໄດ້ກ່າວໃນບົດສະຫຼູບບາງຕອນວ່າ : ແຂວງວຽງຈັນໄດ້ມີການພົວພັນຮ່ວມມືກັບຫຼາຍປະເທດ ເປັນຕົ້ນແມ່ນ ໃນ 1 ປີຜ່ານມາໄດ້ເອົາໃຈໃສເພີ່ມທະວີເສີມຂະຫຍາຍ ການພົວພັນມິດຕະພາບແບບພິເສດ ແລະ ການຮ່ວມມືຮອບດ້ານກັບບັນດາແຂວງຂອງ ສສ ຫວຽດນາມ, ຍົກສູງການຮ່ວມມືຂອງສອງຝ່າຍໃນທຸກຂົງເຂດວຽກງານ ໃຫ້ສົມຄູ່ກັບການພົວພັນມິດຕະພາບ ແລະ ການຮ່ວມມືຮອບດ້ານຊ່ວຍເຫຼືອເຊິ່ງກັນ ແລະ ກັນຕະຫຼອດມາ ເປັນຕົ້ນແມ່ນໄດ້ຮັບການຊ່ວຍເຫຼືອດ້ານການກ່ໍສ້າງພື້ນຖານໂຄງລ່າງ ແລະ ການຊ່ວຍເຫຼືອກໍ່ສ້າງຊັບພະຍາກອນມະນຸດ ເຊິ່ງໄດ້ໃຫ້ທຶນແຂວງວຽງຈັນໄປສຶກສາຮ່ຳຮຽນວິຊາສະເພາະຢູ່ ສສ ຫວຽດ ໃນສົກປີ 2022-2023 ຈຳນວນ 45 ທຶນ, ການພົວພັນຮ່ວມມື ແຂວງຢຸນນານ ສປ ຈີນ ຜ່ານມາ ແຂວງວຽງຈັນ ໄດ້ຮັບການຊ່ວຍເຫຼືອອຸປະກອນປ້ອງກັນພະຍາດໂຄວິດ 19 ລວມມູນຄ່າ 200.000 ຢວນ, ການພົວພັນຮ່ວມມືປະເທດຍີ່ປຸ່ນ ໄດ້ສຳເລັດການປະສານງານກັບສະຖານທູດ ແລະ ລາຍງານການນຳແຂວງກ່ຽວກັບການໃຫ້ທຶນຊ່ວຍເຫຼືອຂອງສະຖານເອກອັກຄະລັດຖະທູດຍີ່ປຸ່ນ ປະຈຳ ສປປ ລາວ ໃນການກ່ໍສ້າງໂຮງໝໍແມ່ ແລະ ເດັກ ທີ່ຈຸດສຸມຜາສັງ ເມືອງເຟືອງ, ມູນຄ່າການຊ່ວຍເຫຼືອແມ່ນ 90.359 USD ແລະ ໄດ້ຕ້ອນຮັບການມາຢ້ຽມຢາມຂອງ ທ່ານ ໂທຊິໂອະ ນາກາເຊະ ຫົວໜ້າອົງການໄຈກາປະຈຳ ສປປ ລາວ ແລະ ສະມາຄົມໂກຈິ ກໍໄດ້ມາຢ້ຽມຢາມບັນດາໂຮງຮຽນທີ່ສະມາຄົມດັ່ງກ່າວໃຫ້ການຊ່ວຍເຫຼືອຜ່ານມາ, ການພົວພັນຮ່ວມມືກັບ ສ ເກົາຫຼີ ແມ່ນໄດ້ຮັບການສະໜັບສະໜູນທຶນຊ່ວຍເຫຼືອລ້າ ເພຶ່ອປັບປຸງສິ່ງອຳນວຍຄວາມສະດວກທາງດ້ານສາທາລະນະສຸກ, ສະນອງເຄື່ອງມືການແພດ ແລະ ສິ່ງຈຳເປັນອື່ນໆ ມູນຄ່າ 30.000-70.000 ໂດລາສະຫາລັດ ຕ່ໍປີ ເປັນໄລຍະ 2-3ປີ, ການພົວພັນຮ່ວມມືຣາຊະອານາຈັກໄທ ໄດ້ສືບຕ່ໍເສີມຂະຫຍາຍການພົວພັນ ຖານບ້ານໃກ້ເຮືອນຄຽງທີ່ດີຕ່ໍກັນ ກັບແຂວງເລີຍ ຣາຊະອານາຈັກໄທ ໂດຍມີຊາຍແດນຕິດກັນຍາວປະມານ 84 ກິໂລແມັດ, ໄດ້ຮັບຕ້ອນຮັບສົມເດັດພະຣາຊາ ອັງຣີ ແຫ່ງຣາຊະອານາຈັກລຸກຊຳບວກ, ພ້ອມດ້ວຍຄະນະ ທີ່ໄດ້ເດີນທາງມາຢ້ຽມຢາມ ແລະ ຢ້ຽມຊົມໂຮງໝໍແຂວງ ແລະ ໂຮງໝໍເມືອງວັງວຽງ ເຊິ່ງແມ່ນໂຄງການທີ່ໄດ້ຮັບການຊ່ວຍເຫຼືອຂອງຣາຊາອານາຈັກລຸກຊຳບວກ, ໄດ້ຮັບການຊ່ວຍເຫຼືອທາງການເພື່ອການພັດທະນາ (ODA) ທັງໝົດ 2 ໂຄງການ ລວມມູນຄ່າທັງໝົດ 27 ຕື້ດົງຫຼື ເທົ່າກັບ 21 ຕື້ກວ່າກີບ, ນອກຈາກນີ້ໃນບັນດາອົງການຈັດຕັ້ງສາກົນທີ່ບໍ່ສັງກັດລັດຖະບານ (INGOs) ໄດ້ໃຫ້ການຈັດຕັ້ງປະຕິບັດຢູ່ບັນດາຂະແໜງການຕ່າງໆຢູ່ແຂວງວຽງຈັນ ທັງໝົດ 27 ໂຄງການ ເຊິ່ງມີມູນຄ່າທັງໝົດ 32 ລ້ານກວ່າໂດລາ, 2 ລ້ານກວ່າຢູໂຣ, 2 ລ້າກວ່າບາດ, 1 ລ້ານກວ່າສະວິດ ແລະ 5 ຕື້ກວ່າກີບ, ໃນນີ້ມີ 4 ໂຄງການ ສີ້ນສຸດການຈັດຕັ້ງປະຕິບັດໂຄງການໃນເດືອນ 12/2022.
ໃນກອງປະຊຸມຄັ້ງນີ້ ຍັງໄດ້ມີການປະດັບຫຼຽນໄຊແຮງງານ, ຫຼຽນກາແຮງງານ ແລະ ມອບໃບຍ້ອງຍໍ ໃຫ້ແກ່ບຸກຄົນ ແລະ ກົມກອງທີ່ໄດ້ປະກອບສ່ວນດ້ານເຫື່ອແຮງ ແລະ ສະຕິປັນຍາ ເຂົ້າໃນຂະບວນການແຂ່ງຂັນຮັກຊາດ,ສ້າງບ້ານພັດທະນາ ແລະ ຜັນຂະຫຍາຍວຽກງານ 3 ສ້າງເຂົ້າສູ່ລວງເລິກໃນທົ່ວແຂວງໄລຍະ 5 ປີຜ່ານມາ (2016-2020), ໃນນັ້ນໄດ້ຮັບ ຫຼຽນໄຊແຮງງານ ຊັ້ນ II ໄດ້ 1 ກົມກອງ ແລະ ບຸກຄົນໄດ້ 1 ທ່ານ, ຫຼຽນໄຊແຮງງານ ຊັ້ນ III ຈຳນວນ 3 ທ່ານ,
ຫຼຽນກາແຮງງານ ຈຳນວນ 5 ທ່ານ ແລະ ໃບຍ້ອງຍໍລັດຖະບານ ຈຳນວນ 6 ທ່ານ.
ພາບ+ຂ່າວ : ບຸນມາ ແກ້ວບຸດດາ
