ວັນທີ 5 ມັງກອນ 2023 ນີ້ ທີ່ສະໂມສອນ #ແຂວງເຊກອງ#ສູນບໍລິຫານລັດດີຈີຕອນ#ກະຊວງເຕັກໂນໂລຊີແລະການສື່ສານ ຮ່ວມກັບ #ພະແນກເຕັກໂນໂລຊີ ແລະການສື່ສານແຂວງເຊກອງ ຈັດກອງປະຊຸມ #ສໍາມະນາກ່ຽວກັບ#ການຫັນເປັນລັດຖະບານດີຈີຕອນ ແລະຝຶກອົບຮົມລະບົບເຄືອຂ່າຍພາກລັດ ( G-Net ). ເຂົ້າຮ່ວມມີທ່ານ ປອ ສົມໄພວັນ ແສງສຸສຸຣິຍະ ຮອງຫົວໜ້າສູນບໍລິຫານລັດດີຈີຕອນ ກະຊວງເຕັກໂນໂລຊີ ແລະການສື່ສານ, ມີທ່ານ ສຸດຊະນະ ສີຫາວົງ ຫົວໜ້າພະແນກ ເຕັກໂນໂລຊີ ແລະການສື່ສານແຂວງເຊກອງ ແລະ ທ່ານ ອ່ຽງຄໍາ ລັດຖະສົມບັດ ຮອງຫົວໜ້າຫ້ອງວ່າການແຂວງເຊກອງ ພ້ອມດ້ວຍຂະແໜງການການ-ກົມກອງອ້ອມຂ້າງແຂວງເຂົ້າຮ່ວມ.
ທ່ານ ອ່ຽງຄໍາ ລັດຖະສົມບັດ ກ່າວວ່າ: ການຫັນເປັນທັນສະໄໝ ແມ່ນວຽກງານໜຶ່ງທີ່ພັກ ແລະ ລັດຖະບານໃຫ້ຄວາມສຳຄັນ, ຊຶ່ງການຫັນເປັນທັນສະໄໝ (ດິຈິຕອນ) ກໍ່ແມ່ນການນຳໃຊ້ເຕັກໂນໂລຊີ ICT ຫຼື ປະຈຸບັນມັກເອີ້ນວ່າ ດິຈິຕອນ (Digital) ເຂົ້າເປັນກົນໄກ ແລະ ເປັນເຄື່ອງມືອັນສຳຄັນໃນການຂັບເຄື່ອນການປະຕິຮູບຂະບວນການບໍລິຫານລັດ, ການຜະລິດ, ການດຳເນີນທຸລະກິດ, ການຄ້າ, ການບໍລິການ, ການສຶກສາ, ສາທາລະນະສຸກ, ລວມທັງກິດຈະກໍາທາງເສດຖະກິດ ແລະ ສັງຄົມອື່ນໆ ເພື່ອຫັນວຽກງານການບໍລິຫານ ແລະ ບໍລິການລັດ ເປັນທັນສະໄໝ, ຮັບໃຊ້ສັງຄົມ ກໍຄືປະຊາຊົນ ໃຫ້ສະດວກ, ວ່ອງໄວ ແລະ ມີປະສິດທິພາບ. ຊຶ່ງການສໍາມະນາຄັ້ງນີ້ ແມ່ນມີຄວາມສຳຄັນຫຼາຍ ໃນການຫັນເປັນລັດຖະບານທັນສະໄໝ ຢູ່ໃນຂັ້ນທ້ອງຖິ່ນ ຊຶ່ງຈະເປັນບາດກ້າວໃໝ່ ໃນການຫັນປ່ຽນ ແລະ ຊຸກຍູ້ສົ່ງເສີມໃຫ້ແກ່ວຽກງານບໍລິຫານລັດ ຂອງແຂວງພວກເຮົາ ໃຫ້ມີຄວາມທັນສະໄໝ ໂດຍສະເພາະແມ່ນວຽກງານການພັດທະນາຊັບພະຍາກອນມະນຸດ, ຊຶ່ງແຂວງຂອງພວກເຮົາແມ່ນຍັງມີຄວາມຕ້ອງການ ທາງດ້ານເຕັກນິກວິຊາການໃນການຄຸ້ມຄອງ ແລະ ນຳໃຊ້ລະບົບດັ່ງກ່າວຫຼາຍ ແລະຫວັງວ່າຜູ້ເຂົ້່າຮ່ວມສຳມະນາໃນຄັ້ງນີ້ ຈະໄດ້ຮັບຂໍ້ມູນ ແລະ ບົດຮຽນທີ່ເປັນປະໂຫຍດ ກ່ຽວກັບການຫັນເປັນທັນສະໄໝ ແລະ ນຳໄປເປັນພື້ນຖານ ເພື່ອຜັນຂະຫຍາຍເຂົ້າໃນການພັດທະນາວຽກງານຂອງຂະແໜງການຕົນ ໃຫ້ມີປະສິດທິຜົນ ແລະ ພັດທະນາຢ່າງກ້າວກະໂດດໃນຕໍ່ໜ້າ.
ຫຼັງຈາກນັ້ນ, ກໍໄດ້ມີການມອບ-ຮັບ ລະບົບ G-Net ໃຫ້ຫ້ອງວ່າການແຂວງເຊກອງ ຄຸ້ມຄອງ ແລະນໍາໃຊ້, ພ້ອມດຽວກັນນີ້ ສູນບໍລິຫານລັດດີຈີຕອນ ໄດ້ຝຶກອົບຮົມກ່ຽວກັບການຫັນເປັນດີຈີຕອນ ( Digital Transfomation )ແລະ ການພັດທະນາລະບົບບໍລິຫານດີຈີຕອນ ໃຫ້ແກ່ຜູ້ເຂົ້າຮ່ວມຕື່ມອີກ.
