ກະຊວງການຕ່າງປະເທດ ໄດ້ຈັດພິທີແນະນໍາປຶ້ມ “ການພົວພັນການທູດ ລາວ-ຫວຽດນາມ 60 ປີ” ຢ່າງເປັນທາງການ, ເພື່ອເປັນການສະເຫຼີມສະຫຼອງວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ (5/9/1962-5/9/2022) ແລະ ເປັນການລະນຶກເຖິງມູນເຊື້ອການພົວພັນຮ່ວມມືທີ່ແໜ້ນແຟ້ນ, ພ້ອມທັງຄວາມສາມັກຄີພິເສດ ລະຫວ່າງສອງຊາດ ສປປ ລາວ ແລະ ສສ ຫວຽດນາມ ນັບແຕ່ອະດີດ ຈົນເຖິງປັດຈຸບັນ. ສາຍສໍາພັນ ລາວ-ຫວຽດນາມ, ຫວຽດນາມ-ລາວ ໄດ້ຮັບການຈັດຕັ້ງ ແລະ ຜັນຂະຫຍາຍຮອບດ້ານຢ່າງຕໍ່ເນື່ອງລຽນຕິດ ໂດຍປິ່ນອ້ອມຂະແໜງການເມືອງ-ການທູດ, ເສດຖະກິດ-ການຄ້າ ແລະ ວັດທະນະທໍາ-ສັງຄົມ ເວົ້າລວມ, ເວົ້າສະເພາະ ວຽກງານການຕ່າງປະເທດ ສອງພັກ-ສອງລັດ ໄດ້ມີການຊີ້ນໍາ ແລະ ນໍາພາຢ່າງໃກ້ຊິດສະໜິດແໜ້ນ ແລະ ມີການພົວພັນເຊິ່ງກັນ ແລະ ກັນ ທີ່ດີສະເໝີມາ.
ພິທີດັ່ງກ່າວ ໄດ້ຈັດຂຶ້ນໃນວັນທີ 28 ທັນວາ 2022 ທີ່ສະຖາບັນການຕ່າງປະເທດ ໂດຍມີທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດ, ທ່ານ ຫງວຽນ ບ໋າ ຮຸ່ງ ເອກອັກຄະລັດຖະທູດ ແຫ່ງ ສສ ຫວຽດນາມ ປະຈໍາ ສປປ ລາວ ແລະ ທ່ານ ໄມ ໄຊຍະວົງສ໌ ຫົວໜ້າສະຖາບັນການຕ່າງປະເທດ, ມີພາກສ່ວນກ່ຽວຂ້ອງເຂົ້າຮ່ວມ.
ປຶ້ມ “ການພົວພັນການທູດ ລາວ-ຫວຽດນາມ 60 ປີ” ເປັນອີກຜົນງານໜຶ່ງຂອງ ສະຖາບັນການຕ່າງປະເທດ ທີ່ໄດ້ມີການລິເລີ່ມແນວຄວາມຄິດ ແລະ ລົງມືຄົ້ນຄວ້າຮຽບຮຽງ ມາແຕ່ຕົ້ນປີ 2022. ນັບຈາກການສະເໜີແຕ່ງຕັ້ງຄະນະຮັບຜິດຊອບທີ່ປະກອບດ້ວຍ ສະຖາບັນການຕ່າງປະເທດ, ຫ້ອງການກະຊວງ, ກົມອາຊີປາຊີຟິກ ແລະ ອາຟຣິກາ ແລະ ຄະນະພົວພັນຕ່າງປະເທດສູນກາງພັກ ເປັນຕົ້ນມາ, ໂດຍຜ່ານການເອົາໃຈໃສ່ຊີ້ນໍາຢ່າງໃກ້ຊິດ ຈາກຄະນະນໍາກະຊວງການຕ່າງປະເທດທຸກຂັ້ນ, ຄະນະບັນນາທິການອາວຸໂສ ແລະ ສະຖາບັນການຕ່າງປະເທດ ທີ່ມີປະສົບການໃນການເຮັດວຽກຕົວຈິງ ເພື່ອກວດແກ້ເນື້ອໃນໃຫ້ມີຄວາມສົມບູນຍິ່ງຂຶ້ນ ຢ່າງມີຄວາມຮັບຜິດຊອບສູງ ຊຶ່ງເຮັດໃຫ້ເນື້ອໃນມີຄວາມຫຼາກຫຼາຍ ແລະ ກວມ ລວມເຖິງດ້ານການເມືອງ-ຄວາມໝັ້ນຄົງ, ເສດຖະກິດ-ການຄ້າ ແລະ ວັດທະນະທຳ-ສັງຄົມອື່ນໆ ທີ່ໄດ້ຮັບການຮ່ວມມື ແລະ ສະໜອງຂໍ້ມູນ ຈາກບັນດາພາກສ່ວນກ່ຽວຂ້ອງ ທັງຈາກພາຍໃນກະຊວງການຕ່າງປະ ເທດ ແລະ ກະຊວງອ້ອມຂ້າງສູນກາງຂອງລາວ ຈົນສາມາດສໍາເລັດຈັດພິມເຜີຍແຜ່ອອກສູ່ສາຍຕາໃນມື້ນີ້.
ປຶ້ມຫົວນີ້ ໄດ້ຈັດພິມເປັນຄັ້ງທໍາອິດ ຈໍານວນ 1.000 ເຫຼັ້ມ, ໂດຍໄດ້ມີການຮວບຮວມ ແລະ ສັງລວມເອົາເນື້ອໃນທາງດ້ານປະຫວັດສາດ ແລະ ຄວາມເປັນມາໃນການພົວພັນຮ່ວມມື; ໂດຍສະເພາະໃນຂະແໜງການຕ່າງປະເທດ ລະຫວ່າງ ລາວ ແລະ ຫວຽດນາມ ໃນການສ້າງຕັ້ງສາຍພົວພັນການທູດຮ່ວມກັນ, ການຮ່ວມມືສອງຝ່າຍ ແລະ ຫຼາຍຝ່າຍ ຢູ່ໃນພາກພື້ນ ແລະ ສາກົນ, ການພົວພັນແຕ່ລະໄລຍະ ກ່ອນ ແລະ ຫຼັງ ການສະຖາປະນາ ສປປ ລາວ ຢ່າງເປັນທາງການ ໃນປີ 1975 ແລະ ໄດ້ລົງເລິກການຮ່ວມມື ແລະ ສ້າງສາພັດທະນາປະເທດຊາດຮ່ວມກັນຂອງສອງຊາດ ລາວ ແລະ ຫວຽດນາມ. ປຶ້ມຫົວດັ່ງກ່າວ ຈະເປັນແຫຼ່ງຂໍ້ມູນ ທີ່ເປັນປະໂຫຍດ ສໍາລັບນັກການທູດ, ນັກຄົ້ນຄວ້າ, ນັກຮຽນຮູ້ປັນຍາຊົນ ກໍຄື ຜູ້ອ່ານທົ່ວໄປ ທີ່ມີຄວາມສົນໃຈ ກ່ຽວກັບ ການພົວພັນຮ່ວມມື ລາວ-ຫວຽດນາມ ໃນຂອບສອງຝ່າຍ ແລະ ຫຼາຍຝ່າຍ ທີ່ພົ້ນເດັ່ນ ເພື່ອເປັນບ່ອນອີງທີ່ສໍາຄັນໃນການສຶກສາ ແລະ ຄົ້ນຄວ້າ-ວິໄຈ ດ້ານການສົ່ງເສີມການພົວພັນຮ່ວມມື ລາວ-ຫວຽດນາມ.
ຂ່າວ: ກະຊວງການຕ່າງປະເທດ-ພາບ: ສໍານານ
