ໃນປີ 2022 ນີ້, ລັດຖະບານ ກໍຄື ຄະນະພັກ-ຄະນະນໍາກະຊວງການເງິນ ໄດ້ເອົາໃຈໃສ່ຊີ້ນຳ-ນຳພາຂະແໜງສ່ວຍສາອາກອນ ລວມເຖິງຄະນະພັກ-ຄະນໍາຂອງຂະແໜງສ່ວຍສາອາກອນທຸກໆຂັ້ນໃນຂອບເຂດທົ່ວປະເທດ ຮ່ວມກັບບັນດາຂະແໜງການກ່ຽວຂ້ອງ ຕັດສິນໃຈສູ້ຊົນເກັບລາຍຮັບໃຫ້ບັນລຸຕາມແຜນການປີ 2022, ນັບແຕ່ຕົ້ນປີມາຮອດວັນທີ 20 ທັນວາ 2022 ສາມາດເກັບລາຍຮັບໄດ້ 19.714 ຕື້ກີບເທົ່າກັບ 99,5% ທຽບໃສ່ແຜນການປີ. ໃນນີ້, ສະເພາະລາຍຮັບສ່ວຍສາອາກອນສາມາດເກັບລາຍຮັບໄດ້ 12.984 ຕື້ກີບເທົ່າກັບ 90,02% ຂອງແຜນການປີ, ທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 15%, ລາຍຮັບຊັບສິນສາມາດເກັບລາຍຮັບໄດ້ 4.955 ຕື້ກີບ ເທົ່າກັບ 127,5% ຂອງແຜນການປີ, ລາຍຮັບຂະແໜງປະຕິຮູບລັດວິສາຫະກິດເກັບໄດ້ 1.774 ຕື້ກີບເທົ່າກັບ 117,4%, ຄາດຄະເນໝົດປີສາມາດເກັບລາຍຮັບໄດ້ 21.675,4 ຕື້ກີບເທົ່າກັບ 109,4% ຂອງແຜນການປີ.
ຂໍມູນດັ່ງກ່າວໄດ້ຮັບການລາຍງານຈາກ ທ່ານ ບຸນປະເສີດ ສີກຸນລະບຸດຫົວໜ້າກົມສ່ວຍສາອາກອນ ໃນກອງປະຊຸມສະຫລຸບຕີລາຄາຄືນ ການຈັດຕັ້ງປະຕິບັດວຽກງານສ່ວຍສາອາກອນປະຈໍາປີ 2022 ແລະ ທິດທາງແຜນການປະຈໍາປີ 2023 ທີ່ຈັດຂຶ້ນໃນວັນທີ 22-23 ທັນວາ 2022 ຜ່ານມາ. ໂດຍມີ ທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ, ມີຄະນະກົມ, ຮອງຫົວໜ້າກົມ, ຫົວໜ້າພະແນກ, ຮອງພະແນກ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ໂອກາດນີ້, ທ່ານ ບຸນໂຈມ ອຸບົນປະເສີດ ໄດ້ໃຫ້ກຽດມີຄໍາເຫັນຊີ້ນໍາ ໃນການຈັດຕັ້ງປະຕິບັດວຽກງານຂະແໜງສ່ວຍສາອາກອນ, ຊຶ່ງທ່ານໄດ້ເນັ້ນໃຫ້ຄຸ້ມຄອງຖານອາກອນໃຫ້ເລິກເຊິ່ງ, ເນັ້ນຫົວໜ່ວຍເຂົ້າໃນລະບົບຄຸ້ມຄອງທີ່ທັນສະໄໝ, ປັບປຸງກົງຈັກການຈັດຕັ້ງແຕ່ລະຂັ້ນ, ແກ້ໄຂປະກົດການຫຍໍ້ທໍ້ຂອງພະນັກງານຂະແໜງສ່ວຍສາອາກອນ ໂດຍສະເພາະຂັ້ນເມືອງ ໃຫ້ມີການຕິດຕາມກວດກາການປະຕິບັດໜ້າທີ່ຂອງພະນັກງານ, ກວດກາຄືນສັນຍາມອບເໝົາຂອງວິສາຫະກິດ, ຮັບປະກັນການເຊື່ອມຕໍ່ຂະແໜງການທີ່ກ່ຽວຂ້ອງ, ສຸມໃສ່ຂະຫຍາຍຖານອາກອນມູນຄ່າເພີ່ມໃຫ້ໄດ້ທັງປະລິມານ ແລະ ຄຸນນະພາບ.
ຂ່າວ-ພາບ: ກະຊວງການເງິນ
