ໂຄງການຊົນລະກະເສດ ແລະ ຜະລິດເປັນສິນຄ້າຂະໜາດນ້ອຍຈັດກິດຈະກໍາວັນສົ່ງເສີມໂພສະນາການຢູ່ບ້ານນາຫຼາ

ໃນຕອນເຊົ້າວັນທີ 15 ທັນວາ 2022 ນີ້ໂຄງການຊົນລະກະເສດ ແລະ ຜະລິດເປັນສິນຄ້າຂະໜາດນ້ອຍໄດ້ຈັດກິດຈະກໍາວັນສົ່ງເສີມໂພສະນາການໃນຫົວຂໍ້ ການປູກພຶດປະສົມປະສານກັບການລ້ຽງສັດເຮັດໃຫ້ຄອບຄົວມີອາຫານໄວ້ບໍລິໂພກຕະຫຼອດປີ ແລະ ກິນອາຫານທີ່ຫຼາກຫຼາຍໃນແຕ່ລະມື້ຈະເຮັດໃຫ້ສຸຂະພາບສະມາຊີກໃນຄອບຄົວແຂງແຮງຢູ່ທີ່ບ້ານນາຫຼາ. ໂດຍການໃຫ້ກຽດເຂົ້າຮ່ວມຂອງທ່ານ ຄຳພຸດ ອິນທະວົງ ຮອງເຈົ້າເມືອງໄຊຍະບູລີ, ທ່ານ ບຸນຫຼາຍ ຄຳພູມີ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ, ມີກຳມະການພັກເມືອງ, ຫົວໜ້າ, ຮອງຫົວໜ້າຫ້ອງການ, ອົງການປົກຄອງບ້ານ ແລະ ນ້ອງນ້ອຍນັກຮຽນເຂົ້າຮ່ວມ.

ໃນພິທີ ທ່ານ ຄຳພຸດ ອິນທະວົງ ຮອງເຈົ້າເມືອງໄຊຍະບູລີໄດ້ກ່າວເປີດພິທີບາງຕອນທ່ານກ່າວວ່າ: ຈຸດປະສົງຂອງການຈັດກິດຈະກຳໃນຄັ້ງນີ້ ກໍ່ແມ່ນເພື່ອເປັນການສົ່ງເສີມວັນໂພສະນາການ, ເພື່ອເປັນການແລກປ່ຽນບົດຮຽນຂອງກຸ່ມແມ່ຍິງທີ່ໄດ້ເຂົ້າຮ່ວມໃນການຮຽນຮູ້, ບົດຮຽນດ້ານໂພສະນາການ, ດ້ານກະສິກຳ ແລະ ຍັງເປັນການສົ່ງເສີມ ແລະ ປູກຈິດສໍານືກກ່ຽວກັບວຽກໂພສະນາການ, ການກິນອາຫານຄົບໝວດໝູ່ທີ່ຕິດພັນກັບວຽກກະສິກຳພາຍໃນຊຸມຊົນບ້ານເປົ້າໝາຍ ແລະ ໂຮງຮຽນເປົ້າໝາຍຂອງໂຄງການ. ເຊີ່ງໂຄງການຊົນລະກະເສດ ແລະ ຜະລິດເປັນສິນຄ້າຂະໜາດນ້ອຍແມ່ນການຮ່ວມມືຂອງລັດຖະບານແຫ່ງ ສປປລາວ ແລະ ກອງທືນສາກົນເພື່ອພັດທະນາກະສິກຳ, ໂຄງການດັ່ງກ່າວນີ້ແມ່ນການຈັດຕັ້ງປະຕິບັດຂອງກະຊວງກະສິກຳ ແລະ ປ່າໄມ້ ໂດຍຜ່ານກົມຊົນລະປະທານ, ສຳລັບຂັ້ນແຂວງແມ່ນພາຍໃຕ້ການສະໜັບສະໜູນດ້ານຍຸດທະສາດໂດຍພະແນກກະສິກຳ ແລະ ປ່າໄມ້ແຂວງ ແລະ ຂັ້ນເມືອງແມ່ນຜູ້ຈັດຕັ້ງປະຕິບັດໂດຍຫ້ອງການກະສິກຳ ແລະ ປ່າໄມ້ເມືອງ, ໂຄງການຊົນລະກະເສດ ແລະ ຜະລິດເປັນສິນຄ້າຂະໜາດນ້ອຍຢູ່ເມືອງໄຊຍະບູລີສຳລັບປີ 2022 ລວມມີບ້ານເປົ້າໝາຍໂພສະນາການຢູ່ 6 ບ້ານ ແລະ 6 ໂຮງຮຽນ. ຈາກນັ້ນໃນພິທີກໍ່ໄດ້ຜ່ານບົດສະຫຼຸບການຈັດຕັ້ງປະຕິບັດວຽກງານໂພສະນາການໃນໄລຍະ 1 ປີຜ່ານມາ ແລະ ຊົມກິດຈະກຳທີ່ທາງບ້ານ ນາຫຼາ ແລະ ທີມງານໄດ້ຈັດຕັ້ງປະຕິບັດເພື່ອສົ່ງເສີມວຽກງານໂພສະນາການ.

………………………

ຂ່າວ-ພາບ: ສົມພົງ ສີສະຫວັດ

#Media Laos #sayaboury.